韓國防疫酒店隔離開箱
韓國防疫酒店係點？台灣小編親身入住！14日要港幣1.1萬？三餐食咩呢？
Hello，大家好，我哋係由韓國人每日提供最新旅行資訊嘅Creatrip。
因為疫情嘅關係，由2020年4月起，無論係有冇打過疫苗，只要係持有短期簽證、入境韓國嘅外國人，都必須無條件隔離14日 （2021年11月起改為10日）。而已經打咗疫苗嘅長期簽證、韓國人可以根據簽證類型免隔離。
網絡上面有好多人分享自己嚟韓國嘅過程，但佢哋都係用一般旅客或者商務人士冇嘅長期簽證，可以居家隔離，關於90日以下嘅短期簽證資料非常少。
所以今次小編就參考咗台灣小編嘅個案，希望將最新嘅資訊帶俾大家。佢就係趁簽證到期換長期簽證之前，用90日以下嘅短期簽證申請入境韓國。
除咗短期簽證申請辦法、入境韓國嘅流程同注意事項 之外，呢一篇仲有針對「韓國防疫酒店」嘅資訊，希望可以幫到有需要嘅朋友。
前往防疫酒店
台灣小編就申請咗短期簽證C-3-4親身實地入住韓國嘅防疫酒店。
入境之後，韓國嘅工作人員帶佢去候車區，大家記得全程都唔可以鬆懈，要隨身帶住消毒工具，因為韓國都同香港一樣有好多境外確輸入個案。
台灣小編就留意到，佢哋好似會根據人種進行分類，例如有一批中亞人遲過佢入境，但唔係等咗好耐就跟咗另一批早到嘅中東人士一齊搭車走；而佢仲留意到，雖然現場等緊嘅人仲有西方人面孔，不過最後同台灣小編搭同一架車走嘅都係日本、台灣、香港或者中國人。
台灣小編就話，佢落飛機嘅時間大約係18:32，出海關大門大約19:10，但等到上防疫巴士已經係21:00之後，最後抵達位於龍仁嘅防疫酒店係22:16……真係好辛苦。
防疫酒店費用/檢疫
到咗防疫酒店之後，台灣小編先知佢去咗位於愛寶樂園附近嘅「華美達酒店（라마다용인호텔）」，距離首爾都真係有啲遠。落車嘅時候，防疫人員會先將大家嘅行李用消毒噴槍噴過，同埋量一量體溫，再帶去一樓大廳分開坐，同埋幫大家下載一個app。
App嘅操作都幾簡單，雖然要本人嘅電話認證，但冇嘅話都可以用簽名代替，所以台灣小編都冇認證。
下載完之後，防疫人員會帶大家去俾隔離費用，呢個時候佢先知道價錢係幾多。
台灣小編係12月13號夜晚到韓國，由當日向後數14日，直到12月26號嘅23:59都唔可以離開酒店間房。韓國防疫酒店嘅費用係一次過俾咗先（避免隔離完咗之後走數），總共係168萬韓元（大約港紙$11,200 ），會提供一日三餐（同埋嗰日到酒店嘅時候仲有一餐宵夜）。
台灣小編冇韓元喺身，所以就碌台灣信用卡，嗰陣佢張Visa碌唔到，要換Mastercard先碌到，真係嚇死佢。櫃檯嘅防疫人員都會將你嘅護照同信用卡拎去影印，同一般酒店一樣會收一筆按金，用嚟避免你喺間房食煙又或者係偷走嘅賠償。
俾完錢之後，現場直接有醫務人員幫你做肺炎嘅檢疫，要連埋啱啱拎住寫咗你護照名嘅試管一齊交俾坐喺度嘅人員。
佢淨係識英文同韓文，台灣小編就叫佢講韓文，不過佢都係講英文，結果發現小編嘅英文仲差就放棄咗，直接俾佢睇張紙上面嘅字（原來張紙仲有中文），上面主要都係問你有冇食退燒藥，或者有冇肺炎相關嘅症狀，冇嘅話就直接去隔離做檢疫。
備註：2021年11月起隔離改為10日
檢查室
首先會用棉花棒篤你喉嚨嘅深處，跟住仲會插支棉花棒入鼻窿入面最底部，大約係軟骨組織嗰個位，轉大約5秒先拎返出嚟，咁就收集咗你嘅檢測樣本。
韓國防疫酒店設施
- 備註：根據目的地，或者係來自唔同嘅國家地區，甚至係防疫人員判斷嘅標準，所住嘅韓國防疫酒店等級、費用可能都會唔同。
龍仁華美達酒店
台灣小編今次入住嘅就係位於愛寶樂園嘅龍仁華美達酒店，仲係有兩張單人床嘅雙人房，空間都幾大，廁所係乾濕分離，不過缺點就係冇洗衣機，都唔可以請酒店幫你洗，只可以自己手洗。
喺窗望出去（可以開窗），可以見到龍仁嘅街景。呢度都幾偏僻，唔知係咪防止有人偷走去人潮密集嘅地方？
日頭仲可以見到好靚嘅山景，都算係14日隔離生活入面最好嘅調節劑。
韓國嘅防疫酒店三餐會按照三個時間提供，分別係朝早八點早餐，晏晝12點食午餐，晚餐就係下晝六點，其他時間都唔會有人嚟搵你。
如果有任何緊急嘅需要，都可以按照室內嘅指示打電話俾櫃檯。
防疫酒店嘅早餐
防疫酒店嘅午餐
防疫旅館嘅晚餐
台灣小編就覺得啲飯都唔差，不過缺點係唔夠熱，間房入面都冇微波爐，得熱水壺可以煲水（不過每一餐都會俾一支水）。
每袋食物會準時咁擺喺門口，同埋酒店會有廣播，小編就會等5分鐘左右先開門拎。
至於垃圾，間房會提供橙色嘅廢棄物垃圾膠袋（上面有醫療廢棄物嘅圖案），每一日下晝6:30至7:00擺喺門口就得（垃圾唔需要分類，全部擺喺同一袋）。
好多人都會問，喺韓國嘅防疫酒店可唔可以見客、嗌外賣等等。
小編就建議大家可以自己帶啲杯麵到時加熱水就食得，畢竟係嚟隔離唔係嚟渡假，最緊要係遵守韓國當局嘅防疫指示。
始終而家非常時期，想嚟渡假嘅都係等全世界嘅疫情好轉之後再嚟啦。
韓國解除隔離之後
解除隔離嘅時候因為有啲倉促，台灣小編嚟唔切影相，所以就用文字同大家講解一下。
韓國隔離時間計法係由入境當日，所以13日到韓國開始，26號23:59後就解除隔離，但呢個時間需要你有喺韓國嘅屋企人、朋友開車嚟接你先可以離開，如果唔係就要等到27號朝早07:00，統一由酒店車到大家去水西站（수서역）或者雲西站（운서역）之後先可以自由活動。
水西站位於江南一帶，小編係去到嗰邊之後再自己搭的士返屋企，而雲西站係喺仁川，大家可以評估一下邊一個站近自己多啲。
備註：2021年11月起隔離改為10日
以上係韓國防疫旅館最新探訪記，如果之後有咩要補充會再一直加落去～ 如果有大家有任何疑問，都歡迎大家可以留言話俾小編聽。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
