Hello，大家好，我哋係由韓國人每日提供最新韓國旅行資訊嘅Creatrip。
作為K-pop嘅忠實粉絲，大家應該聽講過唔同偶像去選秀嘅故事，有啲甚至係行街食野嘅時候俾星探發掘。今日就想同大家分享一啲偶像入選做練習生嘅故事！
12位韓星出道經歷
1. 2PM - 祐榮
祐榮一直嘅目標都係加入JYP成為練習生，完全冇考慮過其他公司，而佢為咗做JYP嘅練習生，甚至去咗參加Wonder Girls成員嘅試鏡，震驚咗成個公司。不過睇嚟就係因為佢呢一個堅強嘅意志同埋熱誠，成功感動到JYP成為練習生之一。
2. SEVENTEEN - 珉奎
珉奎事先完全冇準備過就參加咗Pledis嘅選秀，所以嗰陣時佢就表演咗唱國歌，出乎意料嘅係佢當場就被選中咗。Pledis嘅CEO話，佢哋之所以會揀佢，其實係因為佢好靚仔！
3. GFRIEND - 嚴智
嚴智就係同朋友食飯嘅時候俾Source Music嘅CEO睇中。CEO一見到佢就即刻落車俾卡片嚴智邀請佢參加公司嘅選秀，最後成功選中成為練習生。
4. EXO - 世勳
喺世勳13歲嘅時候，原本佢喺街上面食緊辣炒年糕，結果俾一位SM嘅員工睇中咗，佢仲即刻上前邀請佢成為練習生。世勳原本仲以為係詐騙案所以即刻跑走咗，經過差唔多半個鐘嘅追逐，嗰位星探終於說服到世勳參加SM嘅選秀。
5. Apink - 恩地
恩地就係俾聲樂學院嘅院長推薦佢參加Apink嘅試鏡，而恩地參加完試鏡之後經過兩個月嘅練習即刻獲得出道機會。
6. TVXQ - 昌珉
SM嘅星探自從見到昌珉上體育堂打羽毛球之後，每日都喺學校門口等佢，由於呢位星探實在太執着，昌珉就同自己媽媽講咗呢件事。因為昌珉嘅媽媽係BoA嘅粉絲，佢帶昌珉去參加試鏡就係為咗同BoA見面，結果昌珉通過咗試鏡仲成功喺東方神起出道。
7. Highlight - 斗俊
斗俊原本係想入體育學院，但當佢喺屋企著住睡衣食豬排睇緊Big Bang嘅紀錄片嘅時候，佢就改變咗自己嘅夢想。佢喺公開徵選入面獲得咗第三名，成為JYP嘅一位練習生，仲參加咗節目《Hot Blood》，差啲成為2AM嘅成員。不過最後佢離開咗JYP加入CUBE，成功出道。
8. EXO - 伯賢
經歷咗好多次落選嘅試鏡之後，伯賢幾乎放棄咗入娛樂公司做練習生，反而開始準備入藝術大學。好彩嘅係當佢預備緊大學試嘅時候，俾SM嘅經理人睇中，最後成功喺EXO出道。
9. BTS - Jin
當Jin仲讀緊中學嘅時候，就已經收到過SM嘅選秀邀請，只不過當時嘅佢仲好怕羞所以就冇參加。不過睇嚟佢天生就要成為一位明星，當佢仲讀緊大學一年級嘅時候就收到Big hit嘅邀請，嗰陣時佢先大膽咁參加咗試鏡，仲作為BTS嘅成員出道。
10. NCT - WinWin
WinWin係喺自己高中隔離條街俾SM星探發掘，嗰陣星探問WinWin攞電話，佢以防萬一就俾咗個假電話。不過呢一位員工無放棄，再繼續去搵WinWin同說服佢，邀請佢去參加試鏡。
11. TWICE - 子瑜
有謠言話JYP係因為子瑜嘅外貌，所以派人去台灣招攬子瑜。不過子瑜就澄清呢啲全部都係假嘅謠言，JYP嘅星探係咁啱喺舞蹈學院見到佢所以就邀請咗佢成為練習生。
12. TWICE - Sana
Sana係喺日本同朋友一齊行街嘅時候俾JYP員工發掘。當時Sana都好懷疑係唔係騙案，直到呢位員工同佢講秀智同2PM都係JYP嘅藝人，而Sana係電視劇《Dream High》嘅忠實粉絲，所以即刻同意咗參加試鏡。
上面係關於韓國偶像選秀嘅一啲小趣事，大家仲有無聽過其它出道嘅例子？歡迎喺下面同小編分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
