BTS Jin首爾踩點
BTS大哥首爾踩點!原來Jin讀嘅都係貴族學校?成員聚餐去嘅中華料理餐廳係邊呢?
Hello,大家好,我哋係由韓國人每日提供最新韓國旅行資訊嘅Creatrip。
今日要同大家介紹BTS大哥Jin嘅母校同故鄉。除此之外,小編都整理咗BTS成員曾經到過嘅餐廳,全部都係位於首爾,大家可以好好參考一下,下次嚟韓國嘅時候,不妨跟住Jin嘅足跡一齊踩點啦。
BTS Jin首爾踩點
Jin嘅母校
Jin嘅故鄉雖然係喺果川,但係佢由小學開始就一直喺首爾市松坡區嘅學校讀書,對於想去踩點嘅朋友嚟講算係比較方便。
雖然唔肯定Jin當年有冇搬到去首爾讀書,但據了解,Jin嘅小學、中學、高中全部都喺同一個區域㗎!
1. Jin嘅小學:世輪小學(세륜초등학교)
- 地址:서울 송파구 양재대로 1264
由首爾地鐵5號線、9號線奧林匹克公園站(올림픽공원)1號出口出嚟,行5分鐘就可以到世輪小學。
呢度算係首爾知名嘅學校,唔只面積大,仲可以睇到樂天塔,亦都被稱為係「富人區」,可以讀到呢間小學Jin嘅家境應該都唔錯。
大家如果嚟Jin就讀嘅世輪小學踩點,千祈唔好闖入校園或者打擾上緊堂嘅學生呀!
2. Jin嘅中學/高中:普成中學/高中(보성중학교/고등학교)
- 地址:서울 송파구 양재대로 1278
Jin就讀嘅中學同高中都係喺呢度讀,係一間私立男校,由校門就可以感受到呢間學校嘅氣氛稍微比較莊嚴。
聽講Jin喺中二嘅時候就已經收到SM娛樂嘅邀請,但係當時Jin覺得係呃人所以唔信。
直到佢高二睇完由金南佶主演嘅韓劇《善德女王》之後,先開始有演員夢,大家睇下Jin中學嘅相,係唔係好有校草嘅感覺呢?
BTS Jin首爾踩點
東天紅(동천홍)
- 地址:서울 양천구 목동서로 225 2F
大家知唔知呢度係邊度呢?就係柾國高中入學、畢業嘅時候去聚餐嘅餐廳「東天紅」,睇相仲可以見到入學嗰陣仲係好稚嫩嘅柾國寶寶。
東天紅係連鎖中華料理餐廳,BTS成員去嘅係位於木洞嘅分店。
抵達位於2樓嘅東天紅,睇到門口就會見到當初大家等住柾國買單嘅新聞圖。
大家記唔記得呢個位呢?當初Jin同J-Hope後面嘅鯉魚牆紙,就係東天紅「東室」嘅一角。
另外,店門口都可以睇到柾國嘅簽名。
雖然東天紅嘅感覺好高檔,但其實仲有唔少平價嘅菜單,一個人都可以去食。
菜單上都有附上英文、韓文資訊,都好貼心咁寫住「HOT」,提醒客人係有放辣椒。
小編叫咗炸醬麵(₩8,000)同炸醬飯(₩8,000),份量都唔少,仲好好味添!
嚟韓國旅遊嘅時候,應該有唔少人都會想試下韓國嘅中華料理。與其去其他中華料理餐廳食,不如去BTS成員都去過嘅東天紅食下啦。
東天紅係由梧木橋站(오목교역)2號出口直行,喺大馬路過去斜對角嘅建築物2樓。
以上係關於BTS成員同Jin嘅踩點整理,雖然同其他成員嘅踩點行程比,我哋Jin大哥嘅篇幅比較少,但都希望大家可以save底,以後有機會去Jin嘅母校同東天紅踩點。
如果有更多想知嘅內容,都可以隨時留言或者dm話俾我哋知:)
Instagram:creatrip.hk