韓國人口數據資料統計

Hello，大家好，我哋係由韓國人話你知每日最新資訊嘅Creatrip。

唔知大家會唔會好奇韓國嘅人口有幾多呢？今日小編就一次過幫大家整理出嚟，俾大家睇吓到底韓國嘅人口數據、結婚率、跨種族家庭呢一啲得意嘅統計。如果對呢一方面都有興趣嘅話，就一齊嚟睇吓啦！

韓國嘅總人口數

韓國總人口數（2020年12月基準）

根據2019年嘅統計，韓國總人口數達到大約51,829,203，係世界上排行第28嘅國家。當中男性就佔咗2,584萬人，而女性就佔咗2,597萬人。喺呢一個數據上面，男性嘅總數比起女性多咗大約0.5%。

韓國各地區嘅人口數目（2020年12月基準）

來源：KOSIS

一樣係用2019年嚟做標準，韓國最多人口嘅城市就係首爾，一共佔咗18.5%。不過如果要話最多人嘅自治區就係京畿道，因為京畿道總共有31個城市，人口總數總共佔咗25%。如果將京畿道、仁川同埋首爾呢一啲首都圈城市嘅總人口加埋一齊，首都圈嘅人口就會超過50%。唔怪得大家嚟韓國旅行嘅時候都會覺得韓國好多人啦！

另外，人口最少嘅自治區同埋城市都係世宗。世宗係2012年嘅時候，韓國為咗分散首爾嘅人口而新建立嘅城市嚟，亦都係韓國第一個「特別自治市」，所以同其他地區嘅人口比例相差非常之多。

韓國人口數目預測

來源：KOSIS

呢一個資料係預測到2067年嘅韓國總人口數目（萬人做單位），而上面嘅折線就係代表咗人口嘅增長率。好明顯可以睇得到，韓國嘅人口會喺2027年開始越嚟越少。最主要都係因為人口嘅移動、老年化、出生率減少呢啲問題而影響。而實際上，由2019年開始，韓國嘅人口已經開始越嚟越少，比起預測嘅更加再早一啲。

韓國各地區平均年齡

來源：KOSIS

小編亦都整理咗2020年韓國主要城市人口嘅平均年齡。全韓國嘅平均年齡係42.4歲，比起2019年嘅時候增加咗0.6歲。除咗世宗市嘅平均年齡係36.5歲之外，其他所有嘅自治區同埋城市嘅平均年齡都超過40歲。亦都代表咗韓國嘅出生率係越嚟越低，所有人口都係由中年人所組成。

韓國嘅出生率

上面嘅圖表就係韓國嘅出生人口，而折線就係代表出生率。20世紀嘅時候，韓國嘅出生率都真係幾高㗎！不過係去到80、90年代之後，出生率就開始下降。特別係喺2017年嘅時候淨係跌到得返35.8萬個新生兒，亦都預計會喺2067年嘅時候下降去到21.2萬。喺2002年開始，韓國嘅出生率就已經唔達到1.3%，進入咗「超低出生率」嘅狀態，而喺2018年嘅出生率更加第一次跌到落去0.98%添！

比較韓國嘅出生率同死亡率

綠色嘅折線圖就代表咗出生率，而藍色嘅折線圖就代表咗死亡率。喺呢個圖表上面睇得到，韓國嘅死亡人數由2019年至到2027年20年入面，預計將會開始大幅增加。喺未來嘅10年入面，死亡率將會多過出生率，亦都代表咗韓國嘅自然增加率開始變咗負數，人口越嚟越少。喺2057年嘅時候，死亡人數預測將會高達76.2萬人。新生兒嘅數目只係得返20.9萬人，睇得到韓國人口開始踏入老年化，人口減少嘅局勢。

韓國人嘅平均壽命

韓國喺變成老年化社會嘅同時，韓國人口平均壽命亦都喺呢30年入面呈現左好顯著嘅增加。圖入面藍色係男性嘅平均壽命，紅色係女性嘅平均壽命。呢兩個嘅差異大概係女性比起男性大8歲，但係呢一個差距係呢幾年甚至去到未來都會逐漸縮細。而喺2017年入面，男性嘅平均壽命增加到79.7歲，而女性亦都增加到85.7歲。喺呢一個預測入面，到2057年嘅時候，預計女性嘅壽命將會突破90歲。

韓國結婚&離婚率

根據韓國統計聽公佈嘅數據，喺2019年結婚嘅人數減少咗7.2%，但係離婚嘅案例就增加咗2%。另外，韓國人同外國人結婚嘅案例亦都比起一年前增加咗4.2%，而同外國人離婚嘅案件就減少咗3.4%。

韓國人第一次結婚平均年齡

韓國平均第一次結婚嘅年齡，由1994年開始就一年比一年大。圖入面藍色係男性，紅色係女性。喺2019年嘅時候，女性結婚嘅年紀第一次高過30歲。而韓國喺80年代、90年代對於女性去到30歲仲未結婚嘅話，就代表有問題嘅呢一個思想，喺呢幾年都越嚟越少。所以雖然大部份嘅人都仲係希望可以早啲結婚，但亦都有越來越多人選擇會喺30歲之後先結婚。覺得等自己有穩定嘅工作同埋基礎之後，再結婚都未遲。

韓國人離婚嘅平均年齡

唔單止結婚嘅年齡增加，韓國人離婚嘅年齡都一年大過一年。喺1997年離婚嘅平均年齡，男性係39.1歲，而女性就係35.3歲。不過去到2017年，男性就增加至到47.6歲，而女性就係44歲。當然，呢一個數據都可能係因為韓國人嘅結婚年齡改變咗而影響嘅。

韓國跨國婚姻比例

呢一個資料係針對韓國男性同外國女性（綠色），同埋韓國女性同外國男性（黃色）嘅結婚數據資料而統計出嚟嘅。呢個圖表可以睇得到，韓國女性同外國男性嘅結婚比率佔咗全國2.5%，大約有6,000對（2019年標準）。而最多韓國女性嫁俾美國、中國、越南、加拿大、日本或者英國人。另外，韓國男性娶外國女性嘅比率都佔咗全國嘅7.4%，大約有1.8萬對（2019年標準）。而韓國男性娶得最多國籍嘅外國女性係越南、中國、泰國、日本、菲律賓、美國同埋柬埔寨。

韓國多文化家庭比例

直到2019年，韓國多文化家庭成員嘅總數係1,062,000名。其中喺韓國出世嘅人口有649,000名，多文化對象（結婚移民或者歸化）就係357,000名，其他外國人就有55,000千名。

同韓國人結婚嘅外國人

目前，韓國嘅結婚移民人數總共有173,085人。喺呢啲人口入面，越南籍就突破咗4.2萬人，佔咗最高嘅比例，而第二就係朝鮮族，有3.7萬人，第三就係中國籍，有3.2萬人。

歸化韓國嘅外國人

上面呢一個圖表就係放棄咗原有嘅國籍，歸化韓國國籍嘅外國人數據。喺2019年有184,446人，其中以朝鮮族嘅8.5萬人係最多。第二就係越南，有3.8萬人，而第三就係中國，有3.4萬人。

上面呢一啲就係關於韓國人口嘅統計數據，唔知有冇滿足到大家嘅好奇心呢？希望大家睇完之後，都會對韓國有更加多嘅了解！

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購