韓國宵夜推薦
韓國人夜晚肚餓最鍾意食咩？嚴選十款最地道嘅韓式宵夜！
Hello，大家好，我哋係由韓國人話你知每日最新韓國資訊嘅Creatrip。
夜闌人靜好肚餓嘅時候，唔知大家會唔會食宵夜呢？其實韓國嘅外賣文化咁流行，夜晚肚餓嘅時候都好容易可以叫到宵夜！今日小編就同大家分享一下韓國人最鍾意喺夜晚嘅時候食啲咩啦！
韓國宵夜推薦
1. 炸雞
韓國人最愛食嘅宵夜就係炸雞，真係不分男女老幼都鍾意食！雖然係邪惡感十足，但係配埋醃蘿蔔一齊食就真係一個極大嘅享受！加上韓國有好多連鎖店嘅炸雞都有做外賣服務，所以如果大家喺夜晚好想食宵夜嘅時候，都可以嗌炸雞啤酒返去食！唔知大家食過咁多款，邊款炸雞又係大家最鍾意嘅呢？
2. 豬腳
同樣都有好多唔同味嘅豬腳，一樣好受韓國人歡迎！豬腳有醬油味、味噌味同埋辣味，每一種都好有口感，配埋生菜一齊食就真係絕大享受！作為宵夜，豬腳好似健康一啲？如果你食唔晒嘅話都可以放入雪櫃第二日再食過。
3. 拉麵
如果你覺得夜晚食炸雞或者豬腳實在太重口味，簡簡單單煮一個拉麵都係好多韓國人嘅選擇。韓國有好多唔同種類嘅拉麵（公仔麵），只要打開雪櫃揀你鍾意食嘅配料加埋落去，簡簡單單5分鐘就可以搞掂！唔單止平，同時又有飽足感，簡直一流！
4. Pizza
喺外國如果想食宵夜嘅話唔少人都會諗起pizza 。如果想再chill啲嘅話，就可以叫多杯啤酒。其實Pizza係韓國人成日叫嘅美食，鬆軟嘅芝士配埋調味料真係可以一次滿足你嘅慾望！
5. (生菜)包肉
其實包肉可以算係豬腳以外嘅代替品，將煮熟嘅白切豬肉配上泡菜、大蒜同埋生菜一齊食。唔單止有口感之餘仲係宵夜嘅最佳選擇，食起上嚟都唔會有太大罪惡感！
6. 拌飯
對於韓國人嚟講，雪櫃入面永遠都會有食唔完嘅小菜，如果半夜突然間肚餓咁點算呢？直接將雪櫃裏面嘅小菜同飯一齊撈，然後加少少麻油同埋辣醬，就可以自製拌飯啦！除咗可以食埋雪櫃裏面剩低嘅餸菜之外，又有飽肚感真係唔錯！
7. 冷凍餃子
채널CJ
講到韓國宵夜，絕對唔可以睇少呢啲冷凍餃子！呢啲餃子喺便利店、大型超市、都可以買得到，而且仲要有好多唔同口味，只要放入微波爐叮兩叮就食得！
8. 辣炒年糕
辣炒年糕其實喺便利店都買得到，不過小編都係鍾意布帳馬車裏面叫嘅辣炒年糕，夜晚返屋企之前外賣一份辣炒年糕真係好正，而家諗到都流哂口水！
9. 煎餅
講到煎餅，大家都知道韓國人喺落雨天就會食。好多時食煎餅仲會配米酒，有時韓國人為咗方便，喺屋企都會叫外賣或者自己煎。做法一啲都唔辣，大概15分鐘就可以搞掂㗎啦！
10. 雞腳
雞腳都係超級熱門嘅選擇，但係唔係一般嘅雞腳，而係超級辣嘅雞腳！小編都食過一次，真係辣到可以飲水都飽...不過，有好多韓國人都鍾意呢一種辣，食完即刻沖涼瞓覺都係一個好好嘅享受！
以上就係十款韓國人最鍾意食嘅宵夜啦！唔知大家最鍾意邊款呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk