BTS J-hope 光州打卡點整理
BTS J-hope故鄉「光州」踩點整理，母校/景點/美食全部一一大公開！
Hello，大家好，我哋係由韓國人話你知每日最新韓國旅行資訊嘅Creatrip。
J-hope出生於光州，呢度唔單止有好多美食，同時好多歷史背景都值得我哋深究，唔想錯過咁就要繼續睇落去啦！
BTS j-hope踩點
國立5.18民主墓地（국립518민주묘지）
- 地址：광주 복구 민주로 200
- 時間：09:00至18:00
「518光州民主化運動」相信大家都唔會陌生，1980年五月開始民主化運動，參加者多數為工人、學生，當日有高達400多名學生被拘捕，至今官方認定150多名示威者係死於當時任政府鎮壓，同時呢度埋葬咗好多受害者。
入到去大家可以見到爭取民主化而逝世嘅公民墓碑，令人更加記得呢個重要民主運動，而J-hope喺〈Ma City〉歌曲入面提到518事件，同事表達咗自己嘅諗法。
이젠 현실에서 음악과 무대 위에 뛰어
現在於限時中的音樂與舞台上跳躍
다 봤지 열정을 담았지
都看見了吧！充滿著熱情
내 광주 호시기다 전국 팔도는 기어
我是光州號錫，全國八道跑著
날 볼라면 시간은 7시 모여 집합
如果要叫上我，在七點時集合
모두다 눌러라 062 - 518
全都按下062-518
因為光州位於朝鮮半島七點鐘方向，所以歌詞就寫上「七點」，而062係光州地區號，518代表光州民主化運動。
如果大家對於光州518事件有興趣，不妨都可以睇吓韓國電影《逆權司機》了解更多。
J-hope母校
1. J-hope小學：光州西一小學（서일초등학교）
- 地址：광주 복구 설죽로 590
比起首爾，光州算係一個幾安靜嘅城市，因為學校係禁止外人出入，所以大家嚟到都要靜少少，打卡都唔好騷擾到同學。
不過學校前面就有一間麵包店，話唔定J-hope曾經都喺度買過麵包？
2. 光州日谷中學（일곡중학교）
- 地址：광주 북구 설죽로 570
J-hope就讀嘅日谷中學同小學距離都好近，只要行大約幾分鐘就會到。
小編當日經過呢間小食店，見到唔少學生都會喺度同朋友一齊食年糕，如果大家咁啱肚餓不妨都可以嚟呢度食，相當地道。
3. 光州國際高中（광주 국제고등학교）
- 地址：광주 북구 설죽로 433
日谷中學同光州國際高等學校雖然同樣都係喺雪竹路上，但距離有少少遠，建議大家可以搭26號巴士到「國際橋 / 국제교（Guk-Je-Ryo）」落車，之後要再行一段路先會去到。
Tengo辣燉安康魚（태고아구찜）
- 地址：광주 북구 설죽로 471번길 12
- 時間：11:00至21:00（15:00至16:00午休）；逢星期一、二休息
去完咁多間學校之後，小編就搵到附近一間食辣燉安康魚嘅餐廳，呢度人氣相當之高，小編都要等大約半個鐘先入到去。
小編最後叫咗細份（소）、唔辣（순한맛）以及「多肉（살많이）」。相當特別嘅係呢度可以揀魚肉定係內臟，而選項「多肉」以及「混合」係最多人揀，因為太受歡迎，呢度用餐時間有限一個半鐘。
等咗一陣所有菜都上齊啦！雖然小菜唔算特別多，不過呢度竟然係會送人蔘雞湯，肉好嫩湯亦都好飲。
呢度主打嘅「辣燉安康魚」下面有好多芽菜、蔬菜同超大塊年糕，小編之前去其他辣燉安康魚店，普遍都芽菜量比魚肉多，但呢間光州「Tengo辣燉安康魚」店入面有寫到「我哋係賣魚肉唔係賣芽菜」！
JOY舞蹈實用音樂學院 （조이댄스 플러그인뮤직아카데이）
- 地址：광주 동구 중앙로 185 3F
- 時間：09:00至18:00
- 交通：光州地鐵1號線錦南路4街站（금남로4가역）1號出口隔離
「JOY舞蹈實用音樂學院」係一間好出名嘅舞蹈學校，好似2NE1 Minzy、BIGBANG勝利、KARA Hara、IZ*ONE叡娜都有喺其他分校上過。
只要喺入口都已經可以見到J-hope身影，呢度總共兩層高，一層係歌唱訓練，另一層係舞蹈教室。
呢度有好多唔同試鏡通知，因為外人係唔可以入去，小編都只係可以喺門口影畀大家睇。
忠壯路Kpop明星街（충장로 K팝 스타의거리）
- 交通：光州地鐵1號線錦南路四街站（금남도4가역）1號出口行大約4分鐘
去完舞蹈學院之後，小編去到附近忠壯路，呢度有啲似明洞，2021年正式被規劃成「Kpop明星街」。小編就呢度嘅目的係為咗去「Hope World」，見到Olive Young沿着直行就可以。
呢個色彩繽紛嘅牆就算唔係A.R.M.Y都好適合嚟呢度打卡。
由偶像嘅相組成Kpop大字，另外亦寫上全部光州出身嘅藝人，大家嚟到可以睇吓有冇自己嘅pick。
企鵝村（펭귄마을）
- 地址：광주 남구 천변좌로 446벌길 7
- 交通：光州地鐵1號線南光州站（남광주역）3號出口
光州企鵝村除咗係可以見到好多企鵝壁畫之外，仲可以睇到好多70、80年代傢俱裝飾，令人有種好似返咗去《請回答1988》嘅感覺。
其實喺幾年前呢度曾經發生過嚴重火災，好多嘢都被銷毁，所以唔少居民都拎出嚟裝飾庭院、牆壁，令到企鵝村更有特色。
至於呢度點解會叫做企鵝村？係因為一位大叔之前發生交通意外，因為行路不便，行嘅時候有啲企鵝咁可愛，久而久之就被稱為企鵝村。
呢度每一個角落都可以搵到企鵝嘅蹤影，唔知大家又數唔數到有幾多隻呢？
呢度除咗係企鵝村之外，仲有兩張J-hope打卡牆。
同時呢度仲有一張矮櫈，相框隔離印著J-hope生日、名等等，超值得留念啊！
1. SIGNIFIE（시니피에）
- 地址：광주 남구 백서로 78
- 時間：12:30至22:00；逢星期一休息
喺企鵝村行到攰，可以嚟呢一間韓屋咖啡廳「SIGNIFIE」坐吓，店入面裝修得好靚，好闊落，裝修係以60年代風格為主，每個位都可以感受到老闆嘅用心，大家可以喺度放鬆一下。
小編最後叫咗兩杯美式咖啡（₩4,500）同雪糕蘋果奶酥（₩6,500），味道都幾唔錯。
1913松汀站市場（1913송정역시장）
- 地址：광주 광산구 송정로8번길 13
- 時間：星期一至四11:00至22:00；星期五至日11:00至23:00；逢第二、第四個星期一休息
- 交通：光州地鐵1號線光州松汀站（광주송정역）2號出口
「1913松汀站市場」顧名思義就係1913年建立嘅傳統市場，雖然已經超過100年歷史，不過呢度唔會畀人覺得好亂同污糟嘅感覺，反而係好乾淨同帶有一點復古氣氛。
1. 更少年（갱소년）
- 地址：광주 광산구 송정로8번길 7-4
- 時間：星期日至五11:00至20:00；星期六11:00至21:00
呢間日式羊羹店超級可愛，店名由來係希望令男女老少都鍾意食羊羹（因為普遍覺得係年紀大先會鍾意食）。另外佢亦曾經上過《週三美食匯》，人氣相當之高。
呢度有好多種口味可以揀，老闆亦有提供試食，大家可以先試下再買自己鍾意食嘅一款。如果唔鍾意羊羹嘅朋友呢度仲有賣啫喱。
小編因為好奇所以買咗12粒裝的羊羹杯（₩12,000），包括有核桃、栗子、抹茶紅豆、黑芝麻、忌廉芝士蔓越莓、桃、芒果、柚子、士多啤梨、奇異果、藍莓同菠蘿，推薦大家可以試吓忌廉芝士蔓越莓口味，好好味。
2. 晹胥事笑（역서사소）
- 地址：광주 광산구 송정로8번길 7-4
- 時間：11:00至20:00（12:00至13:00午休）；逢星期一休息
呢間舖頭主要係賣以韓國方言為設計嘅商品，喺其他地區係搵唔到，例如上圖粉色刺繡「야 있나」係全羅道方言，類似香港人講嘅「喂你知唔知？」，相當有趣。
如果想買啲有特色嘅紀念品返去，千祈唔好錯過呢間！
以上係J-hope故鄉「光州」踩點行程整理，唔知大家又會唔會鍾意呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk