韓星宿舍文化
韓星宿舍文化，到底佢哋係點分房？點解要一齊住？
Hello，大家好，我哋係由韓國人每日提供最新韓國旅行資訊嘅Creatrip。
相信唔少Fans應該都會對自己偶像嘅宿舍好奇，到底點解宿舍生活會係點？室友係點決定？沖涼順序又係點安排？今日小編都會一一同大家講！如果有興趣嘅朋友，就要繼續睇落去啦！
韓星宿舍文化
TWICE 宿舍
大部份韓星一開始活動嘅時候，公司都會幫佢哋安排宿舍，因為韓國人會覺得比起個人活動，佢哋更加鍾意以團體生活，一齊生活有嘅好處係大家可以互相照應，出活動都方便啲。加上有啲成員可能本身唔係住首爾地區，又或者係外國成員，所以好自然更加要一齊住宿舍。
BTS V間房
韓國娛樂公司相關人士表示：如果大家都一齊住宿舍嘅話，可以更有效管理好保護到佢哋，如果分開生活嘅話，就好難配合行程，要全體成員聚埋一齊花費嘅時間亦都會變多。
SEVENTEEN經理人
好多時喺韓星紅之前都會要佢哋住宿舍一齊生活，當佢哋有多少少成就，或者有多啲經驗嘅時候，就會畀佢哋有選擇權。如果係已經出咗道5年以上嘅偶像，上頭對佢哋私生活管理都會鬆手啲，好多時偶像可能會想揀同屋企人住，又或者佢哋想自己出嚟住。
就好似已經出咗道6年嘅Oh My Girl隊長效定咁，佢最近都搬離宿舍，出嚟自己租屋住。因為佢本身都有經營自己YouTube Channel，佢都有話喺宿舍真係好難拍，搬出嚟拍都會自在啲。
Oh My Girl 其他成員/ 同一幢樓一齊生活，不過每人有獨立嘅空間
當然亦會有成員選擇繼續住宿舍，雖然唔係同一間屋，不過都可以喺同幢樓，或者係同一層、住樓上樓下咁。
韓星宿舍位置
左：龍山區BIG HIT / 右邊：麻浦YG
無講係大型、中型定小型公司，好多時大部份Idol都係住喺公司附近，一來返工同去練習室近，二來可以方便公司管理佢哋。喺首爾，主要娛樂公司都係喺江南附近，所以偶像宿舍喺清潭洞、永東大橋、建國大學、合井、弘大等地都有好多偶像住緊。
同時為咗追行程同慳時間，佢哋仲會經常去宿舍附近嘅髮型屋去set頭同化妝。
韓星宿舍大小同費用
住緊10億樓嘅BLACKPINK
其實韓星嘅宿舍有時都要睇公司嘅實力同財力，因為喺首爾租屋其實一啲都唔平，如果公司仲係中小企業，可能未必會提供到好好嘅宿舍畀佢哋（月租）。相反，如果係大公司，可能就唔需要住月租，而係住全租。
Stray Kids 宿舍
亦有啲偶像會住喺半地下，平均嚟講，有知名度嘅5、6人組合，通常都會有3間房同2個洗手間。
GFRIEND宿舍前/後
當偶像越嚟越有知名度，宿舍嘅面積都會越嚟越大，一開始出道，偶像可能只係住喺好似Guest House大細嘅屋，不過知名度越嚟越高，好多時佢哋就會搬去睇到漢江嘅apartment。
同一幢唔同層住嘅Winner (秦禹、MINO / 昇勳、昇潤)
聽講有企劃公司相關人士表示：目前有5位成員同緊1位經理人一齊住緊大約30坪嘅屋，其實都算幾唔錯同大㗎啦！
邊個做家務？
平時鍾認清潔同整理嘅Oh My Girl 嘅Binnie
因為平時偶像都要出唔同活動，佢哋嘅Schedule都會好忙，好多時公司都會請鐘點幫手。不過如果仲未話好出名，成員好多時都會自己自動自覺去清潔，等有多啲經濟能力時再請人幫手。
因為請鐘點都會怕佢哋會偷怕宿舍情況或者有偷竊問題，所以好多時都會有成員輪流幫手睇屋，或者係請啲值得信任嘅人。
點分房？
當然有成員都會想同自己比較熟嘅成員同一間房，不過一開頭好多時都係由公司分，或者係大家抽籤、猜包剪揼。
如果團隊太多人，好多時仲會分2、3、4人房。有經紀公司表示，有時會特登將關係冇咁好嘅成員擺埋同一間房，希望佢哋關係可以慢慢變好。
原本SEVENTEEN佢哋係13個住同一間屋，不過而家就轉咗同一幢分咗兩層（6樓同8樓、6人同7人咁住）。
喺某一個節目上，Mingyu講過佢哋係用包剪揼去分邊個住單人房、2人房同3人房。因為當時宿舍一簽就簽咗兩年，所以一次包剪揼就會決定呢兩年嘅生活，佢仲話你人生中最緊張嘅一次包剪揼。
大家應該都知道之前新聞最多人講Red Velvet嘅Irene人品問題。因為呢件事，唔少人都提到分房嘅事。
Red Velvet嘅Joy曾經講過佢哋係用抽簽去分房，Irene間房係最大，而最細同比較冇咁好嘅房係Seulgi用緊。
雖然話係用抽簽去抽，不過事實上係由Leader或資力較高嘅人揀咗自己想要嘅房先。所以每次一到分房，對成員嚟講都係好重要嘅一環。最公平嘅方法，可能都係靠自己運氣去包剪揼。
宿舍規則 
Lovelyz 宿舍
因為始終都係一齊住，所以點都要定落一啲規則去遵守，如果係小型嘅group，佢哋都會私底下開會去制定。
TXT 宿舍
因為偶像嘅行程都好忙，所以佢哋冇特別話有門禁。不過，為咗可以好好管理佢哋，如果想出去外面嘅時候，一定要同經理人講聲先可以出。
同經理人講緊笑嘅NCT 辰樂
同時，基本上如果個團人數多，5-6個偶像就會安排一個經理人去管佢哋。特別係女團，為咗安全問題，好多時都會用埋女職員或女經理人一齊住。
沖涼順序
SF9宿舍
當大家一齊出活動再一齊返宿舍，係咁攰嘅狀態底下，到底邊個可以沖涼先呢？雖然有啲團可能係由Leader或者年紀比較大嘅開始沖先，不過當然亦有啲團體會以更公平嘅方法去決定。
年代唔同可能而家唔會再有「我係Leader我要沖先，你最細就要最後沖。」反而先起身就邊個沖，又或者可能係「今日我沖先，聽日就到你」，甚至可能係用猜包剪揼去決定。
偶像喺宿舍度過嘅時間
因為偶像每日行程都好忙碌，所以留喺宿舍嘅時間唔係好多，幾乎好多時都係沖個涼，瞓幾個鐘就要去跑各種行程。
太多行程而好攰嘅TVXQ允浩
因為比起休息，練習對佢哋嚟講係更加重要，為咗可以喺舞台上展現最好嘅一面，佢哋真係落咗唔少功夫，所以話台上一分鐘，台下十年功真係完全唔講得笑。
偶像宿舍必需品
MONSTA X
第一個必需品大家估唔估到係咩呢？無錯啦！第一個係遊戲機，聽講當偶像休息緊嘅時候，佢哋都鍾意打機去打發時間。除咗打機之外，有啲成員仲會聚埋一齊玩board game。
玩緊Switch嘅IZ*ONE叡娜 同NCT嘅泰容
第二樣必需品係公仔，因為好多時fans都會送公仔畀自己偶像，偶像收到之後好多時都會收藏，所以當越收越多嘅時候，公仔佔宿舍嘅比例都會多咗好多。
TXT宿舍嘅公仔
第三樣係飲水機同空氣清新機，因為係團體生活，呢啲電子用品都係必需嘅！
偶像宿舍生活小插曲
1. BTS
BTS由練習生到出道一直都係一齊生活，一齊嘅時間差唔多有10年，佢哋喺出道之前係7個人用同一間房，不過最近聽落佢哋搬咗去一間78億嘅apartment。隨住BTS越嚟越有成就，得到嘅成果越高，搬嘅屋亦都會越大。
唔知係咪因為屋企太大，有次SUGA諗住食飯，以為屋企冇人就打畀J-hope問佢喺邊。點知J-hope就話「我咪喺屋企囉！」明明同一間屋，因為太大，所以完全見唔到大家，聽落都幾有趣。
亦有一次係Jin諗住搵成員一齊食飯，點知見無人就同其他朋友出咗去。點知過咁30分鐘後，Jimin打畀Jin問喺邊話想一齊食飯。點知Jin就話，我見宿舍無人就出咗去啦，Jinmin聽完好大反應話「我明明一直都喺屋企！」
2. 宇宙少女
宇宙少女多榮曾經喺某一個節目講過「有一次真係差啲忍唔住要向成員發火。」因為有一次佢好下定決心要買一個貴價嘅護膚品，點知當佢打開個蓋嘅時候......
點知佢一打開，只係得返幾個手指印...可能因為當時太耐，佢喺chatting room到打「會唔會太過份...真係令人好失望」因為多成員，所以最後邊個用咗都係冇人知，而且亦都冇公開。
雖然一齊生活都有好多好處，不過有時難免都會有壞處嘅出現。
唔知大家又點睇偶像宿舍呢？歡迎大家留言話俾小編聽大家嘅諗法。
如果有更多想知嘅內容，都可以隨時留言或者dm話俾我哋知：）
Instagram：creatrip.hk