炸雞起源地「大邱」
炸雞起源地係大邱？橋村、Hosigi都喺大邱起家！唔通係同大邱舊地名「雞林」有關？
Hello，大家好，我哋係由韓國人每日提供最新韓國旅行資訊嘅Creatrip。
好多人都鍾意食嘅橋村炸雞、Mexicana炸雞、噹噹炸雞、Hosigi兩隻雞等等，其實大家知唔知呢啲品牌都係大邱起家嘅呢？「大邱」唔單止係好多炸雞品牌嘅起源地，就連韓式醬料炸雞、醬油炸雞斬係大邱人發明，所以大邱被韓國人稱為「炸雞發展地」！
今日小編要同大家介紹大邱係點成為韓國炸雞聖地，以及嚟到大邱一定要食嘅在地炸雞店、炸雞啤酒節。
大邱炸雞歷史
大邱炸雞點解會咁出名？
小編睇咗少少歷史記載：當時，新羅國號其中之一個係叫雞林（계림），而「雞林」嘅意思就係「好多雞嘅樹林」，位置大概位於今日韓國慶尚道地區。當時新羅係一個有好多雞，而且好重視雞嘅國家。
過去新羅時代所使用嘅舊地名延續至今，而大邱舊地名「達句伐（달구벌）」，亦可以搵到同新羅時期「雞林」國號關聯性。
「達句伐（달구벌）」中嘅「達句（달구）」係慶尚道方言中「雞」嘅意思，而「伐（벌）」係廣闊原野意思。
「達句伐（달구벌）」就係新羅時期國號「雞林」純韓文版本，幾乎係相同意思。
只睇地名，都可以知道大邱同雞就有一種緣份，不過真正嘅炸雞史其實係喺1970年代開始。據了解，韓戰後糧食產量急劇下降，為咗畀生活困苦嘅百姓提供肉類，當時政府就喺大邱發展雞肉產業。
而大約喺1970年代起，海外傳入嘅美式炸雞受第一個影響嘅就係大邱，所以慢慢佢就開咗好多本土炸雞品牌。例如大家成日都會去食嘅橋村炸雞、Mexican炸雞、Hosigi兩隻雞以及噹噹炸雞等等。
同劉在石傾緊偈嘅醬料炸雞發明人
喺咁多個大邱炸雞品牌之中，Mexican炸雞係第一間開發出甜辣醬汁，淋喺酥脆原味炸雞上嘅醬料炸雞；除咗甜辣醬料炸雞之外，橋村炸雞亦係第一間推出醬油炸雞。
大邱炸雞名店
講完上面關於炸雞嘅歷史，大家應該都可以睇得出，炸雞並唔係一樣美食咗簡單，而係承載住大邱歷史同地方傳統。
小編今次就想同大家推薦大邱三大炸雞名店：呢幾間雖然唔係連鎖店，但大家下次去大邱旅行嘅時候，都推薦大家可以試下。
紐約桶雞（뉴욕통닭）
- 地址：대구 중구 종로12
- 時間：星期一至星期六11:30至20:00
- 電話：053-253-0070
- 價格：原味炸雞₩18,000；醬料炸雞₩19,000；半半₩19,000
- 備註：每日限量80隻，建議當日朝早電話預約
經常上電視嘅大邱「紐約桶雞」店，喺大邱人當中超有人氣，如果冇事先預約嘅話好有可能食唔到，因為呢到一日只賣80隻炸雞
大邱「紐約桶雞」Menu只得4款，除咗炸雞之外呢度仲有燉雞₩25,000，喺Menu隔離仲貼住咗韓國美食節目《三大天王》採訪過嘅相。
小編今次點咗半半炸雞（₩19,000），一開始先食外皮酥脆嘅原味炸雞，食嘅時候超多汁、冇腥味，小編個人好鍾意，而醬料炸雞甜甜鹹鹹，幾特別，係首爾難得食到嘅風味。
東門炸雞（동문치킨）
- 地址：대구 중구 종로29
- 時間：星期一至星期六17:00至00:30
- 價格：原味炸雞₩16,000；醬料炸雞₩17,000；半半₩17,000
喺紐約炸雞附近嘅「東門炸雞」亦係大邱人好鍾意食嘅炸雞店之一，喺街角轉個彎就會見到。
人到店一睇就知道東門炸雞經歷咗幾多歲月痕跡（2樓樓梯好斜，大家要注意）。Menu都多選擇，價錢亦都比其他間平，原味炸雞₩16,000、醬料炸雞₩17,000，其他蔬菜燉雞係₩24,000。
比起紐約桶雞，東門炸雞更偏向韓國傳統味，外皮偏薄雞肉多，醬料味道都幾特別，推薦大家之後嚟大邱可以試下。
原州炸雞（원주통닭）
- 地址：대구 중구 동성로6길 42-6
- 時間：10:00至22:30；第四星期嘅星期一休息
- 價格：原味炸雞₩17,000；醬料炸雞₩18,000；半半₩18,000
大家去大邱又點會唔去東城路商圈呢？原州桶雞喺東城路附近，行完街shopping完去食炸雞就啱啱好，呢度由1978年開始營業，至今已經有超過40年歷史。
原州桶雞座位比起前面兩間多好多，蔬菜燉雞₩20,000、半半炸雞₩18,000等等。提提大家如果係喺週末夜晚封，可能會因為太多人而要排隊、外賣。
順帶一提，大邱「原州桶雞」嘅燉雞超出名，唔想只食炸雞可以去試下。
只睇相係咪已經感受到原州桶雞有幾咁酥脆呢？輕簿粉漿、炸得酥脆嘅外皮，聽講係原州桶雞嘅必勝秘方！除咗原味炸雞之外，醬料炸雞都唔可以睇少，佢嘅香味直到而家小編都仲係印象深刻。
大邱炸雞啤酒節
- 日期：每年7月中旬
- 入場：免費
睇完上面咁多炸雞資訊，覺唔覺得好似少咗啲咩呢？冇錯就係啤酒啦！炸雞同啤酒真係可以話係天生一對，絕對唔可以分開。而大邱最出名嘅「炸雞啤酒節」亦係每年嘅重頭戲，大家之後等疫情好轉後，應該都會想去返轉？
大邱炸雞啤酒節，絕對係一生人一定要參與一次嘅盛大活動，由2015年舉辦至今，每年到訪人數逐漸增多，真係相當盛大。
喺炸雞啤酒節活動當中，除咗可以用超平價格食到炸雞同啤酒之外，同時亦可以認識嚟自各地嘅人，係唔係好正呢？
喺炸雞啤酒節上唔單止可以食得飽咁簡單，呢度仲有熱鬧市集，瞬間趕走暑氣嘅水上座位，甚至人氣偶像拼盤演唱會，重點係免費入場！咁正又點可以錯過呢？
2017年出演陣容
雖然因為疫情關係，2020年大邱炸雞啤酒節取消，但相信2021年嘅活動會更加精采。如果下次嚟韓國旅行嘅時候，決定要去大邱，不妨將炸雞啤酒節加入旅遊清單，同屋企人、朋友一齊參加呢個盛大活動啦！
唔知大家對大邱嘅炸雞有冇更多了解呢？希望大家之後去大邱都可以玩得開心！
如果有更多想知嘅內容，都可以隨時留言或者dm話俾我哋知：）
Instagram：creatrip.hk