韓國嘅補習文化

Hello，大家好，我哋係由韓國人每日提供最新韓國旅行資訊嘅Creatrip。

熟悉韓國文化嘅大家應該都聽講過韓國同香港一樣，都係好重視補習嘅國家，喺最近就有一個韓國節目公開咗一個8歲小朋友，一個禮拜要上11個補習班嘅故事。明明呢個年齡應該係要盡情咁玩，所以好多人喺呢個報導播出之後都譴責過度補習嘅現象。

呢一位小朋友，星期一要喺英文館入面學英文，仲要學中文；星期二就要學漢字、韓國歷史、小提琴同芭蕾舞；星期三要學數學同寫作等，咁緊密嘅行程根本唔應該出現喺一個得8歲嘅小朋友身上，就係因為佢父母嘅過份安排而令佢嘅童年只係充滿補習。

有需求就會有供應，呢一種補習風氣令韓國衍生咗大大小小唔同嘅補習社充斥市場。今日小編就想同大家分享一個韓國小編親身經歷同埋見到嘅韓國補習社文化，同埋喺韓國存在緊嘅各色各樣嘅補習社。

韓國小學、初中、高中生嘅補習文化

首爾大學正門

喺韓國，好多人傾向以學歷嚟判斷一個人，如果讀到一間好嘅大學，俾人嘅感覺都特別成功，喺呢個文化之下，初、高中嘅學生自細開始就以入名牌大學為目標讀書，去補習都成為理所當然嘅事。

尤其喺首爾江南、瑞草區呢啲以超高教育熱情出名嘅地區，補習社嘅數量喺高達幾千個以上。喺補習完結嘅夜晚10點，呢個鐘數喺嗰啲地區可以見到一大班學生由唔同補習社湧出嚟，數以百計嘅學生同接送佢哋嘅巴士、接走自己仔女嘅父母車等等，令附近地區成日都發生交通癱瘓。

韓國小編就表示，自己雖然喺距離首爾好遙遠嘅地方出世，但都逃離唔到呢個補習嘅命運，高中嗰陣10點喺學校去英文補習社，12點先返到屋企，身心俱疲即刻瞓教，星期六仲要去補語文同數學，即使係咁嘅補習量，都只係平均水平，比起其他韓國學生一啲都唔算多。

國家指標

實際上根據2019年嘅數據，韓國整體學生參與補習率係74.8%（小學生83.5%，初中生71.4%，高中生67.9%）。再加上根據調查，單單係一個學生一個月嘅補習費用已經高達429,000韓語（大約3000港幣）。

喺補習風氣盛行嘅地區，有參加補習同無補習嘅學生差距的確好大，但係韓國補習社學費平均都要30萬韓元（大約2100港幣），可以得知韓國小學、初中同高中學生一個人最少都要參加1-2個補習班。

大家仲記唔記得人氣韓劇《Sky Castle》 ？呢套電視劇就係講述，喺前面都提及過喺首爾、瑞草等上流社會嘅大學入學試、過多嘅課外補習班，係一套批判呢啲現實嘅韓劇，就連韓國人都好難相信嘅程度，呢套韓劇將上流社會補習風氣活生生咁揭露咗出嚟。

呢套電視劇就以一個啱啱考上父母都希望佢考到嘅首爾大學醫學院嘅仔，留低咗「你哋而家滿意啦」嘅訊息之後離家出走為開頭開始成套劇。唔單止係咁，電視劇內容仲包括父母會畀幾十億去解僱一個專門嘅入學考試人員，為咗令自己嘅仔可以入讀首爾大醫學院。

有啲韓國人睇完呢套劇都覺得只係虛構嘅電視劇劇情，但實際上親身經歷過人就公開講過，喺韓國上流社會嘅0.1%入面的確發生緊呢件事，令到韓國補習風氣再度引起爭議。

喺細女考上大學之後，由首爾首都圈搬去盤唐區嘅新聞

唔單止要負擔高昂嘅補習費，甚至會發生全家人一齊搬去細間啲嘅屋，用平啲嘅房租填補補習費用，又或者係為咗仔女嘅讀書氣氛而搬去樓價極高嘅江南地區，呢啲情形喺韓國可以話非常常見。

韓國補習社類型

前面講過韓國嘅學生自細就要習慣參加唔同種類嘅補習班，所以比起單純為咗升上大學嘅補習社，仲發展出好多唔同類型嘅補習社。下面就同大家介紹下有咩補習社：

學生就讀嘅補習班（高考補習班）

頭先就講過，喺韓國文化入面無論小學，初中定高中學生都係以入到名牌大學為目標，所以韓國都同其它亞洲國家一樣，為大學入學試而設嘅補習班係最常見。

1. 單科補習社

韓國學生要入讀大學最重要嘅科目一定係語文、英文、數學、社會、科學，專門補呢啲科目嘅補習社就被稱為「單科補習社」（단과 학원）。單科補習社嘅相反就係綜合補習社，即係以大學入學為目的提供全科補習嘅補習社，而單科補習社就係可以淨係選擇補自己需要嘅科目。

當然比起入學考試為目標嘅補習社，補習費會比較喔平，一個月大概30萬韓元（大約2100港幣）。

韓國小編就話，佢學生時期都有去過單科補習社，「係英文補習班可以學大學入學試成日都會出現嘅文法、表現等等，數學補習班就可以搞清楚啲公式同考試成日錯嘅部份」，同學校唔同，補習班嘅人數比較少，可以詳細咁詢問個人唔明白嘅部份。

2. 입시학원 入學考試補習社（入試補習社）

入試補習社就好似學校咁，會編排時間表畀你每日上唔同老師教嘅科目，呢種補習社就會根據國語、英語、數學、社會、科學等主要科目嘅成績分班授課，學費一個月大約40-50萬韓元（大約2800-3500港幣）。

每一個學期都係不停咁準備期中同期末考試，而暑假、寒假嘅時候唔使返學就要預習下一個學年嘅課程內容。雖然提早預習之後，喺學校學起上嚟會容易好多，不過呢一啲預習文化都會衍生出實際喺學校上堂嘅時候唔聽書、瞓覺或者淨係喺度做補習社功課等等嘅問題，就係因為本身已經喺補習社入面學晒所有嘢。

除咗學術性嘅入試補習社，仲有另一類補習社係專攻藝術同體育嘅，呢啲補習社涵蓋美術、音樂、舞蹈同體育等方面，喺呢啲地方唔係學習課本上嘅知識，而係以準備實際嘅技能用嚟專攻大學嘅藝體能入學試。

準備藝體能考試嘅學生，喺高中平均每班都係3-4人（以一班30個人為標準）唔算多。

最近喺韓國，有一間音樂學院就因為培養出好多有才能嘅學生而成為話題。呢一間學院喺YouTube上面上載咗高中學生嘅唱歌影片，呢啲高中學生因為唱歌嘅實力獲得大學甚至娛樂公司錄取。

好多網民都表示「唱歌唱得咁好唔係應該直接作為教授合格咩」，又或者「到底呢一間學院係點樣教到呢啲學生充滿才能」等等，可以收到咁多人嘅好評，喺呢間學院嘅YouTube頻道上面出現嘅學生，未來會唔會成為下一個紅遍全球嘅K-Pop歌手呢？

為成年人而設嘅補習社（大學入學，就業補習社）

喺以前，如果喺韓國講起補習社，通常大家都會諗起初中高中學生去嘅入試補習社。不過最近喺韓國都出現咗好多，成年人準備入大學考試同埋就職嘅補習社。

1. 재수/편입 학원 再修/插班補習社

喺韓國大學生重讀甚至插班嘅情況好常見。就算係普通嘅大學，少嘅有10至20%，多嘅話甚至會有30至40%係重讀生，特別喺名牌大學入面透過重讀或者插班再次入讀大學嘅人都有好多。

另外，唔係因為自己對呢一科有興趣，單純因為成績夠所以選擇讀呢一個科目嘅人，喺入學之後發現其實根本唔適合自己，所以退學再參加過入學考試希望可以入返自己鍾意嘅大學呢啲事例都有好多。

但其實淨係考一次大學入學試已經係非常之辛苦嘅時，要再考多一次嘅話就更加需要補習社嘅幫助。再修補習社就係幫想考多一次大學嘅人準備入學考試，插班補習社就係幫啲想轉去其他大學嘅人準備插班考試。

2. 취업학원 就職補習社

就職補習社係以成人嘅職業教育為目的，主要係幫成人準備企業就業。空姐、空少呢啲競爭率高嘅考試都有專門嘅補習社可以幫你準備。就職補習社就係專門為就職而準備，提供職業教育同埋幫你進入特定大企業嘅教育。呢一種補習社係比較最近先出現嘅，反映咗韓國就職困難嘅社會現象，下面就會更加詳細介紹呢一啲就職補習社。

韓國獨有嘅補習社

1. 프로게이머 학원 職業玩家補習社

데일리시큐

呢一個補習社就係專門為擁有成為「第二個Faker」嘅夢想嘅人而設，無論係學生定成人都可以就讀嘅職業玩家培訓補習社，呢一種打機補習社都係最近先出現嘅。當然唔係單純淨係打機，呢一啲補習社仲會教你喺遊戲入面會用到嘅必要嘅戰略。

雖然有好多真係夢想成為職業玩家嘅人會去呢一類型嘅補習社，不過亦都有啲讀緊小學或者初中嘅小朋友，因為唔鍾意讀書淨係鍾意打機，所以為咗比自己嘅仔女可以專心喺自己鍾意嘅嘢上面發展，而比佢哋去呢啲培育職業玩家嘅補習社。

2. 승무원 학원 乘務員補習社

데일리시큐

喺韓國，好多夢想成為空姐空少嘅人都會去呢啲乘務員補習社，因為喺韓國，同乘務員管理相關嘅大學學科競爭率好高，有太多人都希望可以成為乘務員，所以就衍生左呢一類型嘅補習社。

喺乘務員補習社入面，有人係因為希望可以入到培養乘務員嘅「航空飛行」大學科目而報讀；亦都有人係喺其他學科畢業之後，希望可以通過乘務員考試成為乘務員所以報讀呢一種學院，所以同年齡無關，唔少夢想成為空姐空少嘅人都有報讀呢一種學院。

3. 공무원 학원 公務員補習社

喺韓國青年就業困難呢個問題已經持續咗好耐，好多人都希望可以成為公務員，因為公務員係一個相對上穩定嘅職業，好多韓國嘅青少年因為呢個理由而去考公務員考試，韓國小編都表示佢有朋友報讀過呢啲公務員補習社。

因為喺某一日突然之間聯絡唔到呢一位朋友，佢甚至連學校都唔去，向身邊嘅人問完先知原來佢突然去咗讀呢啲公務員補習社，用嚟準備公務員考試，呢一位朋友就因為公務員補習社超快嘅進度同埋密密麻麻嘅日程安排，喺三個月之後就放棄重新返嚟。不過韓國嘅青年仍然會因為穩定同埋為數唔少嘅人工被公務員呢個職業吸引，經常都去挑戰公務員考試。

只不過公務員考試嘅競爭率超過100比一，一啲出名嘅講師更加會有好多學生去爭相報名聽佢上堂，呢種公務員補習社因為太多人報名，通常都會喺可以容納100至200人嘅課室入面上堂，為咗可以坐喺前排，甚至會有人凌晨就開始排隊。

4. 취업 학원 就業補習社

CCTV 뉴스

2020年韓國青年失業率超過25.6%，最近就業被稱為同「摘天上面嘅星星」一樣咁難，所以都出現咗好多專門幫人就業嘅補習社。同前面介紹過嘅公務員、乘務員補習社唔同，呢種就業補習社係專門針對喺私人企業就業。

 現實販售緊嘅線上/下《三星合格全攻略》同《現代合格通過》課程

例如韓國大型企業之一CJ嘅就業課程，就涵蓋cv修改、入社考試準備、面試準備等等呢啲就職必要全過程嘅服務補習社都有提供。當中尤其是係培育面試所需嘅發聲、姿勢、內容、爆發力等嘅演講非常受歡迎。

下面張相就係實際販售中嘅CJ集團入職線上講座費用，同埋相關資訊。CV專題講座、CJ入社考試、面試專題講座、韓國大企業入社考試，再加埋第22屆大企業模擬考試嘅講座全部加埋都係109,000韓元（大約765港幣），咁計落線上講座價錢都算合理。

에듀윌

5. 힙합 학원 Hip-hop補習社

大家有無睇過令韓國掀起Hip-hop風潮嘅Hip-hop選秀節目《Show Me The Money》？喺《Show Me The Money》大紅之後，韓國出現咗好多懷有rapper夢想嘅人，甚至出現Hip-hop補習社。

Hip-hop補習社會教大家適合rap嘅發聲方法、配合押韻寫rap歌詞嘅方法，仲有自己親自創作beat嘅方法，呢啲全部都可以喺Hip-hop補習社學到。呢一種補習社可以話一半係為興趣，一半係為發展成未來rapper傳授專業知識。

6. 독서실, 스터디카페 讀書室、Study Cafe

讀書室雖然唔係補習社，不過對於韓國嘅中學生甚至大學生嚟講絕對係不可或缺嘅場所。讀書室照字面上嘅意思解釋，就係俾人安靜咁讀書嘅地方，韓國法律上定義為學院。

不過實際上，唔少高中生為咗可以安靜咁溫書，都會嚟讀書室，因為好多學生放學之後同埋星期六日放假嘅時候唔會喺屋企溫書，鍾意喺讀書室嚟進行一日嘅學習，所以讀書室受到好多人嘅喜愛。

2010年中之前，韓國嘅讀書室都係好似下面張相咁，有可以同側邊嘅人分開少少距離嘅書台，保障大家嘅學習空間。讀書室可以話係只要喺韓國讀初高中就一定有去過一次！價格大約每個月10-15萬韓元（大約700-1000港幣），投放少少錢就可以更加有效率咁溫書，所以好多學生都選擇去讀書室。

喺2010年中後開始，有Premium讀書室、Study Cafe等等嘅分支誕生，就好似歐洲名牌大學圖書館一樣嘅裝修、免費嘅零食、列印服務、免費網絡課程等等，雖然價格比起普通讀書室貴少少，不過就有提供一個舒適嘅學習空間所需要嘅所有嘢。

費用大概喺一個月20-25萬韓元（大約1400-1750港幣），價格同佢提供嘅服務同埋高級嘅設備一樣程度咁貴！雖然價錢貴好多，但都仲係好多韓國學生會使用呢啲高級嘅讀書室。

 學校因為疫情關係停課，學生喺補習社、讀書室溫書，有關高中生嘅新聞

最近因為疫情關係，韓國嘅學校停課咗一排，原本係為咗避免感染所以先停課，但係韓國學生反而聚集喺讀書室同補習社上堂，引發唔少嘅爭議。

今日就同大家介紹咗韓國補習文化，仲有喺呢個風氣之下衍生出嚟嘅各式各樣非主流補習社。大家有無去補習嘅經驗？香港又有無呢啲新奇嘅補習社？歡迎喺下面留言分享～

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購