2020大邱「八公山」攻略
大邱「八公山」探訪，坐纜車登高眺望大邱美景！八公山美食、咖啡廳、交通攻略
- 八公山交通方式
- 八公山纜車位置
- 大邱八公山探訪
- 八公山美食餐廳
- 八公山Cafe
- 由八公山返大邱市區
Hello，大家好，我哋係由韓國人話你知每日最新韓國資訊嘅Creatrip。
＃大邱＃八公山
＃八公山纜車＃咖啡廳
呢幾年唔少人都會揀去大邱旅行，今次小編想同大家介紹一個冇咁熱鬧，單純係欣賞自然景點嘅「八公山」，去嘅方式有好多，當中大邱朋友最推薦大家搭纜車上山。
究竟八公山纜車喺邊度搭？點先去到？附近有咩好食同玩？想知嘅朋友就要繼續睇落去啦！
✨馬上Follow我哋IG
instagram.com/creatrip.hk
八公山交通方式
由大邱市區去八公山纜車
- 交通：大邱地鐵1號線峨洋橋站（아양교역）2號出口出嚟之後搭車，詳細路徑可以參考以下指示
由峨洋橋站落車之後，喺二號出口出嚟之後就會見到呢個巴士站，搭紅色巴士「急行1（급행 1）」，車程大約40分鐘到終點站落車，就係八公啦。
如果係畀現金嘅話，費用係₩1,800，如果係T-money等交通卡嘅話就係₩1,650。
급행1 （就係呢㗎車）
沿途可以望到山上嘅風景，小編去嘅時候啱啱好撞正大邱紅葉最豐盛嘅時期，落車之後往GS25方向行，轉右就可以上山。
去搭八公山纜車嘅途中，會望到呢戰雕像，跟住上去就啱啦！
因為搭纜車嘅地方，仲需要再行多幾條樓梯，就算搭的士都只會送到大家去登山口停車場（同南山纜車感覺有啲似）。
見到呢個牌即係入口標示，跟住樓梯行上去就係八公山纜車售票處。
如果係開車或者搭的士，請導航去「대구 동구 팔공산로185길 51」，車可以泊喺停車場。
八公山纜車位置
대구 팔공산 케이블카
- 地址：대구 동구 팔공산로185길 51
- 票價：2020年11月版本
票種 | 來回 | 單程 |
成人 （12-64歲） | ₩11,000 | ₩7,500 |
孩童 （4-11歲） | ₩6,000 | ₩4,000 |
老人 （65歲以上） | ₩9,000 | ₩6,000 |
退伍軍人 殘疾人士 | ₩5,500 | ₩3,000 |
入到去之後，可以直接到售票櫃台，大家可以參考下八公山纜車票價，如果之後有更新嘅話，會再喺內文標註。
買完飛之後，喺左邊樓梯上去就係搭纜車入口，拎住張飛就可以搭，提提大家千祈唔好唔見！
因為如果係買來回飛嘅話，回程都需要再出示。
黃色纜車真係好可愛，同秋天橙紅色好夾。
纜車兩面都係透明玻璃，短短7分鐘車程可以眺望整個八公山美景，不過搭嘅時候要小心，唔好用過力地搖晃車廂，以免發生危險。
而抵達山頂之後，呢度都有中文、英文、日文、韓文告示牌，大家唔需要擔心會走失。
大邱八公山探訪
沿途行會發現好多呢啲小牌，好多人都會企喺度影相打卡。
入口寫住「愛的隧道（사랑의 터널）」，好多情侶或者屋企人、朋友，嚟到八公山都會寫張小字條，寫一張張屬於自己嘅回憶。
繼續行仲會見到「美麗的愛（아름다운 사랑）」、「真實的愛（진실한 사랑）」、「 永遠的愛（영원한 사랑）」、「健康的愛（건강한 사랑）」、 「幸福的愛（행복한 사랑）」等標示。
好似呢個「美麗的愛（아름다운 사랑）」，下面就有掛住好多愛心字條。
行行下小編又見到一個指標，上面寫住「#空氣最好gram」係結合韓國IG常用流行語標示嘅打卡點，大家不妨都喺度打返個卡！
呢度有提供望遠鏡
見到呢個拎住拐杖嘅人型雕像，就可以繼續行樓梯上去，前往八公山嘅「新林峰（신림봉）」山頂。
海拔820米
喺新林峰準備要走嘅時候，小編行咗另一條路有石頭鋪成嘅路。
呢度有一個好出名嘅許願石，好多人會喺上面貼硬幣許願，聽講如果咁啱卡住嘅話，願望就有可能會成真！
喺石頭隔離嘅呢棵樹，亦都掛滿祝福同及期許嘅愛。
最後呢個小小噴泉上面，刻住「兔子同烏龜（토끼와 자라）」, 並唔係大家所知嘅龜兔賽跑，而係韓國傳統民間故事。
最後番返搭纜車地方，出示車飛就可以搭啦。
如果只係買咗單程，後悔冇買回程飛，都可以去售票櫃檯買。
八公山美食餐廳
飛舞的蕎麥麵（플라잉 메밀）
嚟到八公山，一定要去食呢間超出名嘅「飛舞的蕎麥麵（플라잉 메밀）」。
入到去都發現有好多位，不過大部分嘅人都會揀坐在戶外，除咗防疫之外，同時亦可以享受八公山美景。
大家亦都可以去櫃檯拎呢張小卡，佢有介紹大家點食蕎麥麵先係最好食，上面有中、英文版本，大家可以跟住指示去食。
小編上網查過，發現好多人除咗會叫「飛舞的蕎麥麵」之外，蔥餅同米酒都好多人推薦。
因為小編太早去所以就冇叫米酒，大家之後去都可以試下。
大家冇睇錯！「飛舞的蕎麥麵」嘅麵條真係固定咗，小編怕麵太乾會痴埋一齊，所以先倒少少湯喺上面，之後再跟住小卡食用方式去食。
先將湯倒入碗
湯入面放稅己鍾意嘅配料
之後將麵加入湯裡面就食得！真係超好食，推薦大家食嘅時候，一定要落多啲海苔，增添香氣。
蔥餅有唔少海鮮，脆脆海鮮加上蔥香以及酥脆外皮，真係令人食過番尋味。
八公山Cafe
1. JAMMY FINGER（째미 핑거）
- 地址：대구 동구 팔공산로 1165-7
- 時間：11:00至22:00
第一間位於八公山附近嘅Cafe「Jammy Finger」，有一種歐式鄉村風＋和現代簡約風，兩種唔同氣氛。
飲品同麵包都好有特色，小編叫咗Peanut Mond Jam Latte（₩6,000），推薦畀鍾意飲偏甜咖啡嘅人；麵包種類亦都有多，價錢係大約₩5,000至₩7,000左右，去呢度食個下午茶或者早午餐都好適合。
2. TITF
- 地址：대구 동구 팔공산로 1169
- 時間：11:00至23:00
第二間八公山咖啡廳就係TIFI，望住呢個大大招牌，就可以知道呢間Cafe風格偏時尚，好有設計感。
成間Cafe畀人好乾淨同寬敞嘅感覺，招牌飲品係釀造咖啡（₩4,500）、奶油拿鐵（₩6,000）、杏仁奶油拿鐵（₩6,000），屋頂亦有戶外座位，可以拎住咖啡上去受美好嘅下午茶。
由八公山返大邱市區
由八公山售票處行落山，去返一開始嘅GS25，過對面馬路轉左，就可以見到巴士站牌。
往SK加油站方向行就會見到晚士站牌（桐華寺）。
搭返「急行1（급행 1）」巴士返峨洋橋站，落車之後搭地鐵返大邱市區繼續之後豐富嘅行程。
今日介紹嘅大邱八公山就到呢度，除咗詳細八公山交通方式之外，小編亦介紹咗八公山美食同Cafe。
嚟到大邱唔單止可以品嚐傳統小食，仲可以去八公山享受大自然美景，真係好值得去，唔知大家之後又有冇興趣去呢？
✨馬上Follow我哋IG
instagram.com/creatrip.hk
| 其他延伸閱讀 | |
 西門市場探訪記 |  大邱炸雞店推薦 |