Hello，大家好，我哋係由韓國人話你知每日最新韓國資訊嘅Creatrip。
#韓國文化 #韓國工作
#韓國公司 #韓國職場文化
鍾意韓國嘅大家，想唔想試下同韓國人一齊做嘢呢？
唔少喺韓國做過嘢嘅外國人都覺得喺韓國做嘢好大壓力，好多嘢都需要留意！
今日小編就想同大家介紹一下喺韓國公司做嘢有啲咩係需要留意嘅！
✨馬上Follow我哋IG
instagram.com/creatrip.hk
喺韓國公司做嘢要知道嘅事
1. 要好好運用你嘅第六感
tvN
韓國人比起香港人冇咁直接，好多事都未必會直接講出嚟，不過好多時外國人都因為韓文唔係太流暢，即使想問都未必可以直接表達。
正正係因為咁，外國人喺韓國做嘢嘅時候都要用佢哋嘅第六感去feel下究竟想你點做。
小編覺得有啲咩都係直接問會比較好，如果唔係做做下都真係幾大壓力。
2.唔可以喺好多人面前質問你嘅上司
呢個可能係好多外國人都唔太理解嘅問題，正如大家所知，韓國係一個非常之注重輩分嘅國家，特別係喺職場上，個個都係覺得做細嘅就要聽上司講嘢，所以如果你喺好多人面前質問上司你就係無禮貌。
如果你有事想問上司，又或者覺得上司嘅想法係有錯嘅話，一定要私下一對一咁問！
3. 唔好用英文對話
即使你喺韓國入咗一間幾大規模嘅跨國公司，都唔好期待韓國同事會識好多英文然後同你用英文對話。
事實上，雖然韓國人英文可能喺考試考得好高分，但係對話方面可能都唔太好。
正正係因為咁，呢個可能係你練習韓文嘅機會，可以邊學邊做其實都係一件好事嘅！
4. 韓國人講嘢有時好直
喺韓國做嘢嘅時候，有時都會遇到一啲唔知點算嘅事。
當你做咗一樣嘢出嚟嘅時候，韓國人如果覺得你做嘅嘢未必係好滿意，可能會唔太理你感受，一針見血咁講出嚟。
呢樣嘢都係作為外國人嘅你要適應嘅事。
5. 想stay耐啲韓文就一定要有返咁上下
好多外國人都想喺韓國做嘢，甚至喺度攞到工作簽證。
如果你真係想咁做嘅話記得要學好韓文，同埋了解多啲韓國文化，先可以融入佢哋！
6. 同你嘅同事做朋友
無論你返咩工都好 ，你都冇可能係自己一個做嘢，所以一定要同同事打好關係，有咩事都可以互相照應。
如果你想同你嘅同事做friend嘅話，最快嘅方法就係去飲酒，飲完酒講野都會冇咁拘謹，所以大家下次想識朋友嘅時候都可以試下約飲酒啦！
7. 尊重韓國禮儀
想喺韓國住得耐，你一定要尊重韓國嘅禮儀。
例如如果你同長輩食飯一定要係長輩起筷先，或者係飲酒嘅時候一定要兩隻手攞住隻杯，然後側身飲等等。
8. 返工早到放工遲收
喺韓國返工，如果你嘅返工時間係9:00a.m.嘅話，咁你一定要早啲到。
又或者如果你嘅收工時間係18:00嘅話，你一定要起碼遲15分鐘先走，呢個係尊重老闆嘅意思。
好多人都覺得好似好唔合理咁，但係如果你喺韓國職場做嘢就要習慣啦！
9. 咩都要自己搞
喺香港做嘢，如果你係某一個職位，只係做返自己嘅職責就可以，但如果喺韓國做嘢，就要適應咩都做。
好多人都覺得呢樣嘢係唔應該，但喺韓國人嘅角度就係覺得你做細嘅就要咩都做。
10. 唔好期待太多
自己一個去到外國，唔好expect每個人都會好照顧你，因為韓國人好多都係為自己諗嘅比較多。
如果你都想喺韓國嘅職場生存落去，就記得要學識執生啦！
以上幾點就係外國人嚟韓國做嘢一定要知嘅事，大家要留意下啦！
✨馬上Follow我哋IG
instagram.com/creatrip.hk
| 其他延伸閱讀 | |
 韓國打工文化 |  韓國人特徵 |
