新村「emart」詳細介紹
新村都有emart ！新村站8號出口emart，唔大但超好行嘅掃貨好去處！
Hello，大家好，我哋係由韓國人每日提供最新韓國旅行資訊嘅Creatrip。
唔知大家嚟韓國嘅時候，除咗會去樂天超級市場掃貨，仲有無去過emart？今次介紹嘅呢間新村站分店主打「年輕超市」嘅概念，特別為自住嘅青年同埋小家庭設立，亦都好適合大家去掃貨㗎！下面就等小編嚟介紹一下新村emart唔同樓層嘅產品，小編嘅私心推介、地址同埋營業時間等等嘅資訊，大家可以參考吓下次嚟韓國嘅時候就諗定要買咩啦！
新村Emart | 基本資訊
- 地址：서울 마포구 신촌로 94
- 營業時間：10:00至22:00（公眾假期休息）
新村「Emart」前往方法
新村嘅emart超級易搵，去到地鐵2號線新村站唔使出站，向8號出口方向行，就會見到emart嘅logo，完全唔使擔心會蕩失路，或者買完之後仲要拎住啲嘢行好耐先到地鐵站。
入去之前會見到牆上面有一個「新村店購物指南」，大家可以睇到呢間emart有三層，包括B1/F，同埋連接住地鐵站嘅B2/F同B3/F。
B1/F係賣蔬菜、海鮮、肉類等等新鮮食品嘅區域，B2/F就係賣酒類同埋各種冷藏、冷凍食品嘅地方。而B3/F就係賣好多人嚟到韓國都一定會行嘅emart自家品牌「No Brand」嘅產品、零食、同埋其他日常生活用品嘅區域。
如果大家係喺地鐵站8號出口行過去嘅話，就會去到emart嘅B2/F入口。小編建議大家入到去之後行上一層，由B1開始掃貨掃到落B3。
入到去之後就當然要攞架手推車或者購物籃啦，不過呢間emart規模比較細，淨係得普通扶手電梯，冇手推車都上到嘅嗰種扶手電梯。所以如果大家要推手推車嘅話，就要去搭超級市場入面嘅𨋢啦。
新村「Emart」新鮮蔬果區
蔬菜
小編一個人喺韓國住，煮飯嘅時候最困擾嘅地方就係，想食唔同種類嘅菜，但係一次過都要買好多，有時候食唔曬就會擺到爛曬。呢間emart就為咗我哋呢啲一個人住嘅年輕人同小家庭，有賣呢種淨係足夠單次煮食嘅包裝蔬菜，咁就可以減少食物浪費啦。
另外都仲有平時喺普通超級市場可以買到嘅新鮮蔬菜，就算係比較大嘅家庭都可以喺度買餸。
水果
大家應該都知道韓國水果比較貴，而且因為多數都係賣嗰陣當造嘅水果，所以選擇唔太多。不過好似檸檬、橙同梨呢啲比較common嘅水果，其實都唔算太貴。
通常超級市場都會將當造水果擺喺最當眼嘅位置。好似最近香印青提當造，一盒先₩6,980，之前一盒可能要用₩20,000先買到，所以算平咗好多！
懶人煮食包區
對於覺得出街食飯好貴，但喺屋企煮嚟煮去都係嗰啲餸，食厭咗屋企飯嘅人嚟講，呢個懶人煮食包區域絕對係一個勝地。呢個area專門賣有齊所有材料嘅懶人煮食包，只要跟住包裝上面嘅步驟煮，就可以輕鬆搞掂一味餸甚至係一餐。
除咗部隊鍋同辣炒年糕呢啲大受歡迎嘅韓國料理，仲有意粉同Pad Thai等等其他國家嘅菜式任君選擇。雖然話直接去餐廳食比較方便，但有時候喺屋企自己煮，口味可以自己調整之餘仲會有成功感啲添～
價格方面，部隊鍋（680g，2人份）賣₩9,980、鮮蝦Pad Thai（471g，2人份）賣₩9,800，小編覺得都幾抵吓！
熟食區
如果大家唔鍾意煮嘢食，或者想偷懶，都可以喺到買到平嘅飯盒。無論係沙律定壽司，唔同種類嘅食品都好齊全，而且大部份係夜晚仲會有折扣，如果大家想慳返啲旅費，可以喺夜晚8:00之後過嚟掃貨啊。
急凍食物區
行完B1/F嘅新鮮食品區域，我哋就落去B2/F嘅酒類、急凍食物、即食料理包區域啦。
雖然呢間emart嘅規模同其他分店相比唔算特別大，但為咗迎合附近居民嘅特性，呢度即食料理包嘅種類非常豐富，遊客可以買嚟做手信，如果係喺附近讀書或者做嘢嘅話，買嚟自己煮都好方便。
上面款款望落都好吸引，而且烹調方法極度簡單，就咁打開包裝煮返熱就食得。而韓國人最經常買嘅牌子係PEACOCK、 Bibigo、同埋Pulmuone，大家唔知買邊款好嘅話，買呢三個brand嘅通常都唔會中伏。
酒類區
呢個好似酒吧咁，牆上有嘅霓虹燈裝飾嘅地方就係酒類區啦！呢個區域除咗有唔同主流大牌子嘅酒，連小眾嘅品牌都有，無論係外國定韓國本地牌子都可以搵到。
小編最近好沉迷韓國本地嘅啤酒，喺新村emart入面就有好多唔同種類嘅選擇。唔止係啤酒，其他傳統嘅韓國酒類當然都非常齊全，仲有好多小編第一次見嘅品牌，大家想試新酒嘅話記得要嚟呢度買啦。
電子產品區
行完B2/F, 而家我哋就行落賣零食、即食產品同日常用品嘅B3/F睇吓啦。
通常每間emart都會有連住一間賣電子產品嘅舖頭「Electromart」，而emart新村店因為比較細，雖然冇Electromart，但係都有個area賣啲比較小型嘅家用電子產品，適合小家庭同自己住嘅朋友。
大家可以喺度搵到多士機、熱水壺、微波爐，甚至連窩夫機都有！另外仲有好多日常用品，嚟韓國留學嘅朋友們可以喺呢度買齊需要嘅嘢。小編非常推薦皮膚比較敏感嘅朋友買個濾水花灑頭（₩11,280），仲可以單獨買濾芯（₩8,980）定期換添！
即食麵、飯區
無論係遊客、學生定係自住人士，喺韓國行超級市場，點可以唔買即食麵？新村emart嘅即食麵區域排列得超級整齊，望落種類都好豐富。
如果覺得一pack即食麵太多，大家可以選擇買杯麵！呢度有好多香港搵唔到嘅牌子，可以買返香港食或者送俾朋友。
除咗即食麵，呢度仲有好多唔同種類嘅即食飯。即食飯喺香港比較少見，其實就係一個白飯加一款餸或者湯，只要用微波爐叮熱就食得，非常方便。小編個人就非常鐘意午餐肉泡菜蓋飯（₩4,980），大家都不妨可以試吓。
咖啡、茶、零食區
嚟韓國玩除咗即食麵，就當然要買返啲韓國零食返香港。新村呢間emart都有好多出名嘅韓國零食，仲有各式各樣嘅茶同咖啡，唔怕買唔到手信啊！呢度仲有一個擺滿曬Starbucks產品嘅area，鐘意飲咖啡嘅朋友們唔好錯過啦。
收銀處
最後就去到埋單嘅位置，呢間emart有提供自助埋單櫃檯，埋單嘅時候唔使等好耐，仲唔使驚聽唔明職員講咩。
大家要注意嘅一點係，未scan條碼嘅商品要放喺左邊，而scan完嘅就要擺喺右邊。因為部機會以重量去check你scan嘅嘢同實際攞咗嘅嘢一唔一致，所以如果重量唔啱，部機會暫停你嘅俾錢程序㗎！
有咩唔明隔離都會有親切嘅staff幫手，如果都係怕唔識用，大家可以選擇去排返一般收銀處，等職員幫你搞。
俾完錢之後，如果買超過₩30,000就可以去到客服中心，職員會幫大家整一張退稅單，大家只要一直keep住，最後去到機場就可以退稅！
行完三層超級市場都幾攰吓㗎，呢層有賣簡單熟食同嘢飲嘅地方，大家可以喺度休息吓再出發去下一個地方。
今日小編就介紹咗呢間位於新村嘅emart。因為係針對小型家庭或者單身自住人士嘅「年輕超市」，對於喺周邊延世大學、西江大學、梨花女子大學讀書嘅留學生嚟講，都係好方便嘅一間超級市場。希望可以俾喺韓國生活嘅大家、又或者疫情過後嚟首爾旅行嘅你哋參考下。
如果有更多想知嘅內容，都可以隨時留言或者dm話俾我哋知：）
Instagram：creatrip.hk