韓國喪屍電影
萬聖節喪屍電影推介！韓國除咗《屍殺列車》仲有咩喪屍電影？原來仲有著古裝嘅喪屍？
Hello，大家好，我哋係由韓國人每日提供最新韓國旅行資訊嘅Creatrip。
話咁快就準備到萬聖節，大家諗好今年要扮咩嚟嚇人未？如果仲未諗好扮咩，有冇諗過扮韓國喪屍？韓國近年出產咗唔少喪屍主題嘅電影同劇集，好多都贏盡口碑票房。
除咗電影方面有大家最熟悉嘅《屍殺列車》，仲有Netflix韓劇《屍戰朝鮮》，都係令「韓式喪屍」走向國際嘅重要作品！
今日小編就想同大家分享喺Naver上面9套韓國人評分排名最高嘅喪屍電影，大家可以睇住電影構思下嚟緊萬聖節點樣扮鬼扮馬！始終每個人嘅口味唔同，就算係排名冇咁高嘅電影可能都值得一睇㗎。
***留意以下文章可能會有劇透***
***Netflix、YouTube同Google Play可能會有唔同地區嘅播放限制***
韓國喪屍電影
1. 屍戰朝鮮 (2019)
Namu Wiki
片場：每集大約45分鐘
季數：2季，每季6集
導演：金成勳
主演：朱智勛、柳承龍、裴斗娜
觀看途徑：Netflix
由漫畫《神的國度》改編，《屍戰朝鮮》嘅故事係發生喺16世紀末日本入侵幾年後嘅朝鮮時代。雖然唔係電影，但小編真心覺得好值得推介！劇情大概係關於一場神秘嘅瘟疫席捲朝鮮，王子李蒼需要努力遏制瘟疫拯救佢嘅人民同埋王國。
朝鮮時代嘅建築、人物嘅行為舉止仲有服裝都令到成輯劇更加引人注目。喪屍聞到人肉味道嘅時候會即刻跑動，而且仲好聰明咁識得爬上屋頂，受到攻擊嘅時候仲會有類似老鼠咁嘅叫聲。
呢套劇集係全球都獲得好高嘅評價，咁大家就知道有幾值得睇啦。無論係萬聖節嘅時候同朋友一齊睇，定係開party嘅時候播來做背景畫面，都夠晒驚嚇啊。
2. 屍殺列車 (2016)
Namu Wiki
⭐️ 8.6
片長：118分鐘
導演：延尚昊
主演：孔劉、鄭有美、馬東石
觀看途徑：Netflix、YouTube
電影一開頭係有一個畀喪屍咬傷咗腳嘅女人上咗主角搭嘅由首爾去釜山嘅列車，喺變成喪屍之後襲擊一個女乘務員，令喪屍病毒喺列車上面迅速擴散。
喺一片混亂嘅情況之下，一班主角好努力咁希望可以生存落去同時保護自己珍貴嘅人。
《屍殺列車》係韓國影史上第一套喪屍電影，淨係計韓國電影，佢嘅全球電影票房收入僅次於嘅奧斯卡得獎電影《寄生上流》。
《屍殺列車》入面嘅喪屍特徵係跑得好快甚至可以跳上火車頂部，但一旦火車駛入隧道周圍黑晒嘅時候，佢哋嘅視線就會完全消失，淨係識得聽聲辨認人類。
3. 搶錢大屍殺(2019)
Google
⭐️ 7.46
片長：112分鐘
導演：李珉才
主演：鄭在詠、金南佶、嚴志媛、李秀慶、鄭家藍、朴仁煥
觀看途徑：Netflix、Google Play、YouTube
電影就係講述喺韓國一個寧靜嘅郊區小鎮入面出現咗一隻喪屍，朴氏一家原本喺當地經營加油站，最後捉住咗呢隻脾氣暴躁嘅喪屍仲幫住佢改咗個韓文名叫屍朗。
當有傳言出現話屍朗咬人會令到人變得後生，呢個家庭就計劃喺佢身上獲利，令呢一個寧靜嘅村莊變成一片混亂。
同上面介紹嘅其它喪屍電影電視劇唔同，呢一套戲帶有喜劇元素，例如喪屍會比狗追，甚至比拎住個馬桶塞嘅老人家追住嚟打，而且劇情都有少少浪漫成份。
呢套電影入面嘅喪屍就冇咁恐怖，雖然都識跟住聲音同埋光，但就唔識跑或者跳，主要都係好緩慢咁移動。電影主要係以搞笑嘅模式等大家用第二個角度看待喪屍。
4.屍殺半島 (2020)
Namu Wiki
⭐️ 7.22
片長：116分鐘
導演：延尚昊
主演：姜棟元、李貞賢、李蕊、李藝媛
觀看途徑：YouTube、Google Play
呢套電影雖然係廝殺列車嘅續集，但係完全係一套獨立嘅故事，講緊係韓國收到喪屍病毒感染嘅四年之後。主角政錫喺逃離韓國之後就一直用難民嘅身份住喺香港，有一日收到黑社會嘅任務要佢返韓國攞一筆錢，事成之後會分返一半畀佢，所以佢就踏上咗返韓國嘅路。
當佢抵達韓國半島之後，唔單止發現有大量喪屍，仲有少部份嘅倖存者。一部份倖存者仲成立咗個631組織，而呢一個組織就因為留喺韓國嘅絕望心情而變得越嚟越瘋狂同埋邪惡。
主角同631組織以外嘅倖存者一齊合作，一齊對抗喪屍同埋更加恐怖嘅631組織，希望可以完成任務同埋安全咁離開韓國。
同第一集《屍殺列車》嘅喪屍差唔多，《屍殺半島》嘅喪屍都係識跑同埋跳，而且對聲音同光線好敏感，人類受到感染嘅時候都係會以奇怪嘅角度轉動彎曲身體。
呢套續集收到唔少嘅負評，包括同第一集嘅故事冇連貫性，老土嘅台詞，太情緒化觀眾冇辦法聯繫入去嘅場面等等。但小編個人嚟講，覺得槍戰嘅激烈場景同埋演員出色嘅顏值已經令電影值得一睇！
5.Alive (2020)
⭐️ 7.03
片長：99分鐘
導演：曹日亨
主演：劉亞仁，朴信惠
觀看途徑：Netflix、YouTube
呢套電影係改編自Matt Naylor嘅《Alone》，俊宇（劉亞仁）喺佢住嘅大廈發生大規模喪屍感染嘅時候被困於大廈入面。 喺無WiFi，數據同電話嘅情況下，喪屍仲要四處遊蕩，佢要努力搵方法生存。
喺某一日，俊宇先發現原來對面大廈仲有另一位倖存者。俊宇同宥彬喺電影入面一齊努力離開呢一個災難。
喺《#Alive》入面嘅喪屍仲會記得佢哋係人類嘅時候嘅技能，所以你可以見到曾經係消防員嘅喪屍識得爬上去大廈嘅外牆闖入倖存者嘅屋企。
6. 恐怖零一夜 (2012)
Naver Movies
⭐️ 6.69
片長：118分鐘
導演：鄭凡植、林代雄、洪智英、金督、金暄、閔奎東
主演：柳演錫、金智媛、金賢秀、陳泰賢、鄭恩彩、金志映
觀看途徑：YouTube、Google Play
Naver Movies
呢一套電影係由唔同嘅小故事串連而成嘅，故事嘅主線就係由一個高中生比殺人魔綁架開始，佢講咗幾個恐怖故事去引起呢一個殺人魔嘅注意為自己爭取時間。呢四部恐怖故事入面最後一部《救護車》就係關於喪屍。
Naver Movies
喺唔夠兩個鐘入面要講述4個故事真係唔容易！電影入面嘅演員陣容都好豐富，有《太陽的後裔》金智媛、《機智醫生生活》《陽光先生》柳演錫同埋《擁抱太陽的月亮》嘅南寶拉。
7. 屍殺帝國 (2018)
Daum Movie
⭐️ 6.46
片長：130分鐘
導演：金成勳
主演：玄彬、張東健、李善彬
觀看途徑：Netflix、YouTube、Google Play
一個朝鮮士兵畀歐洲人帶嚟嘅喪屍咬傷，仲感染埋自己嘅親人，然後喪屍病毒就由朝鮮中心地帶開始擴散。
喪屍嘅病毒甚至擴散到宮入面，畀金子俊利用密謀奪走現任皇帝嘅王位。見到着古裝嘅喪屍都係呢一套電影入面一個比較有趣嘅地方。而且呢套電影嘅設定同埋服裝同上面講過嘅劇集《屍戰朝鮮》都幾相似。
《屍殺帝國》入面嘅喪屍都係一樣移動得好迅速，又識跑又識跳。雖然韓國網民對呢一套電影嘅評論唔係太好，不過小編覺得都可以睇一次嘅。
8. 喪屍學校 (Zombie School) (2014)
Source: Naver Movies
⭐️ 6.12
片長：87分鐘
導演：Kim Seok-jung
主演：夏恩雪、白瑞斌、金昇煥
觀看途徑：YouTube、Google Play
聚集咗唔少問題學生嘅一個高中校園入面，突然之間啲老師變曬做喪屍，學生要諗辦法戰勝喪屍同埋生存落去。
《喪屍學校》係韓國第一套青少年喪屍電影，有啲韓國網友仲好諷刺咁話，呢套恐怖電影係佢哋睇過最搞笑嘅喜劇電影，暗諷其中一啲場景製作得唔好。
9. 屍殺前傳：首爾站 (2016)
Namu Wiki
⭐️ 5.27
片長：92分鐘
導演：延尚昊
主演：柳承龍、沈恩敬、李準
觀看途徑：YouTube、iTunes、Netflix
有一個流浪漢因為條頸流血之後慢慢咁死咗，結果突然之間變成喪屍仲開始攻擊路人，三個倖存者好努力咁克服呢一個喪屍病毒。
《首爾站》就係《屍殺列車》嘅前傳，由同一個導演執導。好多人批評佢嘅情節冇好好咁連貫落《屍殺列車》，不過呢一套動畫本身都幾好睇嘅。
值得一提嘅係，佢嘅首爾插畫畫得非常之準確，刻畫到首爾獨特嘅氣氛。
上面就介紹咗9套喪屍主題嘅韓國電影，大家今個萬聖節除咗可以同朋友一齊睇喪屍之外，仲可以試下扮喪屍去嚇人啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk