韓國紙幣同硬幣文化
你未必知道嘅韓國現金小知識！啲錢上面印住嘅人係邊個？1998年發行嘅500蚊硬幣超稀有？
Hello，大家好，我哋係由韓國人每日提供最新韓國旅行資訊嘅Creatrip。
雖然話韓國人比起用現金更加習慣碌卡，但係外國遊客嚟到韓國嘅時候因為匯率問題，多數都會唱啲現金消費。同香港嘅現金唔同，韓國嘅紙幣面額郁啲就1千，1萬起跳，小編啱啱嚟到韓國嘅時候成日都分唔清啲紙幣嘅面額，成日都唔小心畀錯錢。
就連香港人越來越少用嘅「神沙」，最大面額都去到500韓元，一開始喺韓國畀散紙嘅時候，小編都要慢慢數先數得齊數...
咁到底小編係點樣開始認得啲面額呢？唔知大家有冇留意韓國嘅紙幣除咗有唔同顏色之外，上面仲有印唔同嘅人樣，小編就係靠呢啲人樣等自己分得清每張紙幣嘅面積係幾多！就連神沙都有唔同圖案，真係好方便小編呢啲數學差嘅人啊。
為咗等大家唔會好似小編咁成日俾錢嗰陣都好混亂，今日就同大家介紹吓韓國嘅硬幣同紙幣文化，仲有邊啲現金如果收到一定要留低唔好洗，上面嘅人物又代表咗啲咩呢？依家即刻同大家介紹！
韓國鈔票/硬幣文化
1. 韓幣5萬蚊*大約港幣350蚊
韓國五萬蚊紙幣上面嘅女性，係朝鮮時代嘅申師任堂，佢嘅孝心同埋對仔女嘅呵護，再加上聰明才智，喺韓國可以話係「零負皮」嘅歷史人物，係朝鮮時期賢妻良母嘅代表，更加喺2007年起成為韓國紙幣五萬蚊嘅人物代表。
其實五萬蚊嘅紙幣都係由2007年先開始發行，發行五萬蚊紙幣之前，韓國最大嘅幣值係一萬，再大額啲嘅金額就要用支票，真係好唔方便啊。
將最大面額提升至五萬嘅優點就係，除咗減少印刷鈔票嘅費用之外，仲可以減少攜帶現金嘅張數，減低移動成本，支票呢啲容易暴露個人信息嘅現金代替品亦都可以減少使用。
不過缺點就係， 2007年因為貨幣面額上升，物價都上升咗少少， 甚至發生過45,000韓元嘅貨品直接加價去到50,000韓元。
2. 韓幣1萬蚊*大約港幣70蚊
呢張綠油油嘅銀紙，就係韓國嘅一萬蚊貨幣。
上面印住嘅人物就係全韓國無人唔識、發明咗韓文嘅世宗大王。
韓國五大法定假期之一嘅韓文日就係因佢而起，可以話佢就係韓國文化起源嘅功臣之一。
一萬蚊嘅背面，仲有印住當時朝鮮王朝時期發明家所發明出嚟嘅渾天儀同埋望遠鏡等等嘅圖案。
舊版韓國10,000蚊紙幣
其實喺韓國嘅舊版10,000韓元紙幣上面，都係印住世宗大王嘅樣。
最早可以追溯去到1962年嘅第二版韓國紙幣，嗰陣時開始一萬蚊嘅紙幣就全部都係印住世宗大王嘅頭像。
3. 韓幣5千蚊*大約港幣35蚊
啡色嘅5000蚊紙幣代表人物就係李珥，佢其實係印喺五萬蚊紙幣上面嘅申師任堂個仔，同樣都係由1962年第二版韓國紙幣開始一直印喺5000韓元上面。
對於韓國人嚟講，佢係建立朝鮮哲學思想嘅主要功臣，亦都係所有韓國人喺歷史書上面都會學到嘅一堂。
對於韓國嘅儒家發展、哲學思辯上有好重要嘅影響力。而喺5000韓元紙幣背面嘅畫就係佢嘅母親申師任堂畫嘅《草蟲圖》。
舊版韓國5,000鈔票
4. 韓幣1千蚊*大約港幣7蚊
面額最細嘅紙幣就係藍色嘅1千韓元，1千韓元嘅紙幣上面當然都有佢嘅代表人物。
而呢個人就係李滉，亦都係上面啱啱講完嘅5000韓元人物李珥嘅師傅。韓國歷史入面對李滉嘅評價都係好正面，形容佢係一個清廉、唔貪慕虛榮同埋追求地位嘅學者，同時佢喺朝鮮發展咗朱熹哲學，係儒家文化係朝鮮開展嘅一個重要人物。
如果大家對李滉呢個名陌生嘅話，可能聽過佢另一個名「李退溪」，退溪路正正就係明洞直到東大門嗰一帶嘅路名。
舊版韓國1,000蚊紙幣
1000韓元嘅紙幣都係由1973年，即係韓國第三版嘅現金問世之後先出現嘅。
1000韓元紙幣出現之前，韓國一直都係由500韓元嘅紙幣直接跳到5000韓元紙幣，真係諗起找錢嘅時候都覺得唔方便啊。
5. 韓幣500蚊*大約港幣3g
而家流通嘅韓國500蚊硬幣
頭先就有講過韓國喺1973年前一直都係用500韓元嘅紙幣，但點解而家大家所收到嘅500韓元大部份都係硬幣？
呢一款上面印有鶴嘅圖案嘅500韓元硬幣，其實係喺1980年代初期先出現嘅。
1993年5月12日就係最後一張500韓元紙幣發行嘅日子，之前韓國都仲係以硬幣紙幣互相流通咁使用嘅，只不過而家已經幾乎見唔到500蚊硬幣嘅蹤跡啦。
再同大家講一個小知識，每一年其實韓國嘅銀行都會發行硬幣，但係唯獨是1998年發行嘅500韓元硬幣，因為受到IMF金融危機影響，只係發行咗8000個，仲淨係用紀念套裝咁樣嚟出售。
所以而家韓國流通嘅500韓元硬幣入面，1998年製造嘅可能得返1000個以下，非常之稀有，大家不妨檢查一下自己手頭上有嘅韓元硬幣，話唔定會搵到一個珍藏！
韓國舊版500蚊紙幣
舊版嘅500韓元紙幣上面，印住嘅就係崇禮門（而家嘅南大門），係1975年已經停止發行。
而啱啱提到嘅最後一張1993年印出嘅500韓元紙幣，上面印住嘅人就係李舜臣大將軍。
6. 韓幣100蚊*大約港幣元7毫子
而家流通嘅韓國100蚊硬幣（新版）
喺韓國100韓元硬幣上面印住嘅人樣，就係韓國嘅汗馬功臣李舜臣大將軍。
而係1980年12月1日之前，韓國都仲係一直有出版100韓元紙幣㗎。
而家流通嘅韓國100韓元硬幣（舊版）
而家流通嘅韓國100韓元硬幣（新版）
但100韓元硬幣都係好耐之前已經有㗎啦，最初發行嘅100韓元硬幣就係喺1970年鑄造嘅，當時都係用李舜臣將軍嘅樣刻喺上面。
而喺1983年開始，韓國舊版100韓元硬幣（背面鑄有一圈）停止發行，改用新版（發行年份喺「100」上面）嘅硬幣為主，但其實呢兩種100韓元硬幣都仲通用架。
而家流通嘅韓國100韓元紙鈔
1973年同1980年分別停止發行嘅100韓元紙幣上面，印住嘅就係獨立門同埋世宗大王。
所以喺韓國，以前都有用世宗大王嘅樣印喺紙幣上面㗎。
韓國舊版第五共和100韓元硬幣
而100韓元嘅硬幣仲有啲稀有嘅特殊版本，價值相當之珍貴。尤其喺1974年發行嘅100韓元硬幣，仲有印咗第五共和嘅100韓元硬幣，而家嘅市值都漲咗唔少。
7. 韓幣50蚊*大約港幣3毫5仙
而家流通嘅韓國50蚊硬幣
無論係舊版定新版（1983年發行）嘅50韓元硬幣，上面都有刻住飽滿嘅稻穗，而新舊版嘅分別都只係在於背面有冇一圈花紋。
喺1973年，韓國發行咗最後一次嘅50韓元紙幣。
隨住前一年新發行嘅5000韓元紙幣，正式開始咗韓國嘅大面額時代。
當時因為呢啲鈔票嘅發行，引起物價急速上漲，亦都係韓國自從1962年進行貨幣政策上調以來，最後一次喺現金上面有咁大嘅變化。
兩個版本嘅50韓元紙幣上面分別印住塔洞公園、叢石亭，但係而家已經好難搵到呢兩款紙幣啦。
而50韓元硬幣而家嘅使用量都大幅下降，幾乎無咩產品會標價去到百位數甚至十位數以下。
8. 韓幣10蚊*大約港幣7仙
1962年發行嘅10韓元紙幣，喺1973年已經唔再印刷啦。
當時兩種版本分別係韓國銀行印製版，仲有瞻星臺嘅圖案喺上面。
舊版流通嘅韓國10元紙幣
不過好快，10韓元紙幣就畀1966年發行嘅10韓元硬幣所取代。
舊版上面刻有佛國寺多寶塔，顏色係棕紅色嘅10韓元硬幣，係1983年正式停止印刷，改為發行黃銅色嘅版本。
不過最後都因為生產成本太高，喺2006年改為發行亮棕色嘅10韓元硬幣。
而家市面上流通嘅10韓元硬幣，因為比較少人使用，所以望落都仲係好新、好亮就係呢個原因啦。
9. 韓幣5蚊*大約港幣3.5仙
10. 韓幣1蚊*大約港幣0.7仙
5蚊同埋1蚊硬幣嘅命運都一樣，同10韓元紙幣一齊係1962年推出，不過之後都被1966年發行嘅同面值硬幣所取代。
值得討論嘅係，因為經濟發展，硬幣使用量劇增嘅過去，曾經發生過「硬幣本身嘅材料費」大於硬幣面額嘅情況。
所以韓國政府喺硬幣製造上面都花咗好多苦心，大家而家攞到嘅10蚊、5蚊同1蚊硬幣基本上都輕到無感覺。
舊版流通韓國5蚊紙幣
唔知大家鍾唔鍾意呢啲關於韓國現金嘅背景呢？
其實仲有啲無提到過嘅部份：韓國曾經係1962至1980年之間短暫咁使用過1毫、5毫同埋50蚊面額嘅紙幣，但因為使用率太低，換算又困難，而家都冇人用啦。
雖然而家嚟唔到韓國旅行，但大家手頭上有無啲未洗晒嘅現金呢？
而家即刻攞出嚟檢查一下，睇吓有無啲稀奇古怪嘅圖案或者係好耐之前印刷嘅，話唔定等之後個孫出世可以俾佢做傳家寶喎！
如果有更多想知嘅內容，都可以隨時留言或者dm話俾我哋知：）
Instagram：creatrip.hk