唔可以忽視嘅十個夢境
解夢下集！千祈唔好忽視呢十個夢境！原來夢見水都唔一定係好事？
Hello，大家好，我哋係由韓國人每日每日提供最新韓國旅行資訊嘅Creatrip。
俾人追殺、高空墜落同埋發生自然災害，呢啲夢境相信大家都唔想夢到，除咗因為係夢入面經歷都好恐怖之外，更加因為喺現實當中呢啲夢境象徵住唔好嘅意思。之前就同大家講過十樣韓國人覺得發夢夢到係好事嘅夢境，下面就會為大家介紹十樣韓國人認為絕對唔可以忽視嘅夢境。
唔可以忽視嘅十個夢境
1. 水
就算係夢見水都有好多唔同情況：可能係氾濫、水漲或者去有水嘅湖邊海邊等等。不過大部分夢境入面，水都係代表為咗達成目標而要承擔特定嘅風險；又或者代表喺目前嘅狀況之下感到舒適，希望以後都可以過住簡單平和嘅生活。
如果夢見氾濫、溢出或者湧出嘅夢境，都係意味現實中嘅生活或者環境會變得寬裕，甚至係財運、名聲會變得更好。
2. 頭髮
夢見頭髮嘅時候就要注意自己喺現實當中嘅心裡狀況同埋人際關係。特別係夢見隨風飄揚嘅頭髮，除咗暗示對家庭有不詳嘅意思之外，亦都意味本人嘅心理狀態係比較混亂。另外，夢見頭髮粗硬而且打結難梳理，更加係代表喺無意識之中反映咗現實中自己嘅姿勢、心境、思考方式等等好難同社會大眾融合。呢個時候可能會出現損失，所以更加需要保持心境平和。
3. 泥土
泥土象徵生長同轉世，如果夢見泥土，就需要循呢個方向開始關注。因為萬物始於泥土之下，如果對於現有嘅生活唔滿意，可以嘗試開始新生活。不過要注意，泥土同時意味你可能喺現實生活中處於要作出選擇嘅十字路口，失去方向亦都無辦法繼續前進。
特別要注意，如果夢到畀泥水浸腳嘅話，可能代表會因為疾病惡化而承受巨大嘅痛苦，所以如果夢到呢一類嘅夢境，記得要注意自己嘅身體健康。
4. 喺空中飛
喺藍天之下自由自在咁飛，只係諗下都會令心情舒暢，到底呢個夢境又係咪有好嘅意義？呢個夢就同大膽、樂觀主義有一定嘅關聯，代表可以期待美好嘅未來。
因為已經做好準備為人生作出重大決定，而且喺人際關係上亦尋求緊特別嘅解放，係無論喺邊種情況，係只要保持積極樂觀嘅態度，就可以獲得好結果嘅夢境。
5. 牙齒
牙齒嘅解夢都有好多種唔同意思，如果係夢見自己喺不知不覺間甩牙嘅夢，代表喺現實中可能會聽到自己平時尊敬嘅人唔好嘅消息，另外夢見牙齒斷裂或者曾經病過嘅牙脫落，都有類似唔好嘅意思。
相反，夢見生智慧齒就係代表屋企會迎接新成員，而夢見小朋友生牙仔就代表願望會實現，之前覺得不足嘅事都會被填補。
6. 綠色
到底有綠色出現嘅夢境有咩特別，喺咁多種顏色當中特別唔可以忽視夢見綠色？綠色其實都具有積極嘅意義，可以解釋為自己喺無意識當中發放咗代表快樂嘅訊息。就好似「每一日都要充滿熱誠咁生活」，係一種想喚醒自己要積極生活嘅意識嘅訊號。另外，都可以解釋為喺情感上經歷緊一個治癒嘅過程，如果夢見綠色，咁就可能代表你而家處於一個相當之情緒化嘅狀態。
7. 箱
箱即係秘密，代表隱藏同埋失望嘅物件，萬一喺夢境當中出現箱，意味住你對自己一直隱瞞嘅嘢感到失望，或者係周圍嘅人有秘密隱瞞住你。如果係夢境係關於打開個箱，亦即係代表已經準備好透露一直隱藏嘅秘密。但如果係夢見打開左一個空嘅箱，即係喺現實中經歷緊不滿嘅事。
8. 貓
如果係有可愛嘅貓出現喺你嘅夢境，就好似貓唔同嘅品種一樣象徵意義都有唔同。最廣為人知嘅就係比貓咬嘅夢，呢個係胎夢，對於孕婦係可以帶來好嘅意思一種嘅夢境。相反，如果夢見自己屋企養緊嘅貓離家出走，即係你將會整唔見自己珍惜嘅嘢。而夢見黑貓跟住你嘅話，即係將會捲入口舌之中，所以平時要小心自己嘅行動。
9. 墜落
呢個夢可以話係每個有試過發夢嘅人都一定有經歷過嘅夢境之一。夢見自己墜落即係而家嘅生活並唔係順住你嘅意願，或者經歷緊不安嘅事。雖然都有人好鍾意係青春期嘅時候發呢個夢，覺得係代表會生高啲，不過喺比較多都係接近惡夢嘅解夢。財物同健康上嘅損失、同愛人嘅離別、陷入非議或者是非等等，都係具有唔好嘅意思，所以一定要小心墜落嘅夢境。
10. 螞蟻
喺日常生活當中好少會注意嘅螞蟻，如果係夢境當中出現反而係具有特別嘅意思。萬一喺夢中見到螞蟻爬過，代表要珍惜周圍嘅人，即係朋友同屋企人嘅關係。相反，如果係夢見幾十隻螞蟻逼成一團，就代表將會發生唔好嘅事。有可能係而家進行緊嘅項目或者事業會出現問題，工作無辦法順利進行，人際關係亦可能會出現問題或者要搬屋。
以上就介紹咗十樣出現喺夢境嘅時候唔可以忽視嘅嘢，唔知大家有無夢見過呢啲情況呢？大家以後如果夢見呢啲物件就可以知道分別代表咩意思啦。
如果有更多想知嘅內容，都可以隨時留言或者dm話俾我哋知：）
Instagram：creatrip.hk