2024釜山交通攻略
玩厭咗首爾想去釜山玩？2024釜山最新交通攻略幫到你！
Hello，大家好，我哋係由韓國人每日提供最新韓國旅行資訊嘅Creatrip。
釜山係韓國第二大城市，除咗首爾，大部分朋友都會選擇去釜山旅行，但係網上大部分都係首爾嘅交通資訊，想去釜山玩嗰陣有時候未必會搵到相關資料，所以今日小編就一次過整理咗釜山嘅交通，plan住去釜山玩嘅朋友，記住要mark低啦！
釜山交通攻略 | 釜山金海機場 → 釜山市區
1. 輕軌+地鐵 （最平）
- 搭車地點：機場站（공항역）[金海機場國內線GATE 4右前方]
- 小Tips：先搭釜山金海輕電鐵到沙上站（사상역），再轉釜山地鐵2號線，乘搭往甘田站（감전역）方向嘅列車去以下主要車站
| 前往 | 所需時間 |
| 西面站 | 30分鐘 |
| 南浦站 | 50分鐘 |
| 釜山站 | 45分鐘 |
| 海雲台站 | 60分鐘 |
去住嘅地方或者釜山找換店之前，建議大家身上最少都要有₩5,000，用嚟買交通卡或者地鐵車飛。
如果大家係直接搭國際線去釜山機場嘅話，出咗閘之後要行到國內線嗰邊先會搭到地鐵。
提提大家，因為釜山金海輕電鐵同釜山地鐵係兩個system，所以去到沙上站轉2號線嗰陣大家需要拍卡出站，行到2號線嗰邊再拍卡入去（用交通卡嘅話有轉乘優惠）。
2. 機場巴士
目前釜山金海機場並冇特別開設通往釜山市區嘅機場巴士，大家想搭巴士出釜山市區嘅話，就只有307號巴士呢條路線選擇，建議大家搭地鐵會快啲。
如果大家係想喺機場搭長途巴士去其他城市，可以Click我睇全韓機場巴士總整理，睇吓有冇啱搭嘅車。
3. 的士 （最貴但最快）
- 起表價：₩3,800
- 跳表價：每133公尺或34秒 +₩100
| 開往地點 | 預計所需費用 |
| 海雲台 | ₩25,000 |
| 南浦洞 | ₩20,000 |
| 西面站 | ₩18,000 |
想搭的士嘅朋友可以行到釜山金海機場國際線嘅GATE 3號、5號出口中間搭。雖然貴好多，但係比起搭地鐵可以慳一半時間，大家可以根據情況選擇。
釜山交通攻略 | 釜山地鐵
釜山地鐵車費
| 交通卡 | 單程車飛 | |
| 成人 | ₩1,600 | ₩1,700 |
| 青少年 | ₩1,050 | ₩1,150 |
| 小學生 | 免費 | ₩700 |
*釜山單程車飛唔需要押金，亦唔需要退還。
釜山地鐵追加費用
| 未超過10公里 | / |
| 超過10公里 | +₩200 |
乘搭東海線 | 按距離增加票價 |
乘搭金海輕軌 | +₩500 |
釜山地鐵有6條線，大部份景點都可以搭地鐵去到，非常方便。
如果大家喺釜山旅行嘅時候會經常搭地鐵嘅話，可以考慮買「定期乘車券（정기승차권）」。大家可以根據自己行程，睇吓邊個option會抵啲。
釜山定期乘車券
| 1日券 單日無限次搭 | ₩6,000 |
| 7日券 7日內搭20次 | ₩21,000 |
| 30日券 30日內搭60次 | ₩60,000 |
如果一日會搭超過三次地鐵嘅話，定期乘車券會抵過用交通卡。不過提提大家，呢張定期乘車券淨係可以用嚟搭釜山地鐵，搭唔到巴士㗎！
釜山交通攻略 | 釜山巴士
釜山巴士車費（交通卡）
| 成人 | 青少年 | 小童 | |
| 一般巴士 （藍/綠色） | ₩1,200 | ₩800 | ₩350 |
| 座位巴士 （長途巴士） | ₩1,700 | ₩1,350 | ₩1,200 |
同喺首爾搭巴士一樣，搭釜山巴士嘅時候同樣都係上落車嗰陣要拍卡，而且比起用散銀，用T-Money搭會平好多同埋有30分鐘內轉乘優惠。
釜山交通攻略 | 釜山火車/KTX
除咗搭國際直航機去釜山，有唔少人會選擇喺首爾搭KTX去釜山。如果係搭KTX嘅話，大家落車嘅地方就會係釜山站啦。
大家要注意，KTX釜山站同地鐵1號線嘅釜山站雖然好近，不過唔係同一個站嚟㗎！所以如果你參加咗喺釜山站出發嘅一日遊，記住要注意係喺邊個釜山站集合，唔好去錯地方啊。
釜山交通攻略 | 釜山長途巴士
釜山西部沙上巴士轉運站（부산서부시외버스터미널）
- 地址：부산 사상구 사상로 201
- 可連接交通：釜山金海輕電鐵、2號線沙上站（사상역）3號出口
釜山綜合巴士轉運站（부산종합버스터미널）
- 地址：부산 금정구 중앙대로 2238
- 可連接交通：釜山地鐵1號線老圃站（노포역）3號出口
如果大家係搭長途巴士去釜山，或者要喺釜山搭長途巴士去其他城市，都會喺呢兩個地方上落車，大家可以參考吓。
以上就係小編整理出嚟嘅釜山交通攻略，希望可以幫到嚟緊要去釜山玩嘅朋友啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk