Hello，大家好，我哋係由韓國人每日提供最新韓國旅行資訊嘅Creatrip。
大家對於刺身有咩諗法？係藝術定係個人力量嘅展現？抑或係同其他人情感嘅聯繫？又或者純粹因為好睇？韓國其實好多人都有紋身，唔少藝人都展示過自己嘅紋身，不過電視台嘅鏡頭都仲係會主動避開紋身嘅範圍。今日小編就要同大家介紹韓國嘅紋身文化，包括歷史入面「紋身」嘅起源到今日社會大眾對紋身嘅睇法，一齊睇落去啦。
想喺韓國紋身？
[스팟] THE SEOUL TATTOO（弘大）
[스팟] KPOP TATTO Studio（江南）
韓國紋身文化
韓國紋身嘅起源
喺三韓時期（公元前2世紀末至4世紀，位於朝鮮半島南部嘅三個部落聯盟）嘅記載入面有關於紋身民俗嘅歷史，但呢個文化傳承喺中間斷裂咗，《三國史記》（朝鮮半島現存最早嘅完整史書）、《三國遺事》（1206年至1289年編纂嘅新羅、高句麗、百濟史書）入面都無記載。
三韓分布圖（維基百科）
而紋身（문신 / mun-sin）再次出現喺文獻入面，就要去到《高麗史》，但呢個就唔係民俗風情，而係法治嘅手段。直到而家都仲有好多歷史學家研究，喺三韓時期嘅紋身文化究竟係點樣斷絕嘅，目前比較多人支持嘅說法係，因為中原文化嘅傳播，令紋身呢個習俗慢慢消失。
三國分布圖（維基百科）
不過歷史入面有記載，喺更加早嘅古朝鮮時期（西元前2333年至西元前108年，位置於今日北韓一帶），當時八條禁法嘅其中一條就被推測為唔允許紋身，但南部地區（演變成後來嘅三韓）就有紋身呢個習俗，不過呢個記載喺三國之後開始消失。歷史學家判斷，三國建國之後要整頓國家制度，建立服飾規定，同埋北方無紋身嘅勢力，統治咗南方有紋身習俗嘅居民，更加無可能會畀佢哋維持呢項文化。
紋身嘅演變
同日本、中國嘅發展類似，「紋身」再度出現喺歷史入面係因為刑罰。根據歷史記載，三國時期無刑罰紋身嘅記錄。不過由高麗時代開始，會喺被捉到之後，逃出流放嘅地方嘅盜賊面上面紋字，如果再逃忙，就會加重刑罰。
KBS
而歷史學家就判斷，呢種喺面上面紋字嘅刑罰，主要係參考宋代嘅「黥刑」而嚟，例如《經國大典》入面提到，無判處死刑嘅強姦犯按照法律條文審判後，會喺身上面以墨汁紋上『強盜』兩隻字，如果再犯就處以絞刑。《朝鮮王朝實錄》入面有記載，有人俾人捉到偷牛，耳仔就被割咗落嚟，後嚟又偷衫同馬想走佬，俾人捉到之後就喺面上面紋上字樣。
亦都係由呢個時期開始，喺朝鮮文化同韓國文化入面，紋身唔再係代表集體嘅風俗習慣，而係不孝（損毀身體，而身體髮膚受之父母）同犯罪嘅象徵。
除此之外，《朝鮮王朝實錄》入面都有記載，成宗11年（西元1479年），有一位叫於乙于同嘅女人，性格太豪放、唔符合當時社會嘅規範，同好多名男性都發生過感情關係，仲會喺手臂上面紋上佢哋嘅名。所以喺朝鮮時代，紋身除左係罪犯嘅刑罰，有深厚感情嘅男女都會進行呢一類秘密紋身，呢一點同現代都幾相似。
現今嘅韓國紋身文化
同好多國家一樣，喺現代較為早期嘅韓國，好多人都對紋身存有偏見，例如黑社會份子、性格狂妄、違背道義嘅人，都會用呢類紋身嚇人。
不過對於而家嘅年輕人嚟講，紋身就係一種紀念、係代表成長、展現個人特質嘅方法。紋身等於壞嘅刻板印象對佢哋嚟講都唔重要，甚至可以話係過曬時。所以就算係韓國藝人身上面都可能會有紋身，最細嘅紋身可能只係得粒字母，作為紀念嘅標記。
不過韓國主流嘅無線電視台SBS、KBS、MBC等電視直播嘅時候，萬一藝人、出演者嘅身體部位有刺青，通常鏡頭都會盡量避開，或者喺節目錄製之前會要求出演者著可以遮蓋紋身嘅衫，甚至用膠布、肉色袖套、化妝、打格仔呢啲方法將紋身遮住，避免係節目播出期間外露。
其實並唔係有咩法規規定要遮住，只不過多數保守派嘅電視台為咗避免睇電視嘅未成年人士或者一般觀眾，會因為出演者身上面有大片紋身而感到不安，所以先拒絕播出有紋身嘅畫面。
隨住世代更替，某啲有線付費電視台已經唔太在意藝人身上面係咪有紋身，或者只會喺大範圍嘅紋身打格仔，其它小型、字母、圖案嘅紋身已經唔太理會，可以俾藝人自由露出，不過喺絕大多數嘅電視畫面上面見唔到紋身，已經算係韓國人嘅一種共識。
就連韓劇都係，除非劇情需要，韓劇男女主角一般都唔會有紋身出現，一方面係植入業配廣告嘅時候可以俾觀眾有良好嘅印象，另一方面都係劇組費事麻煩，希望劇集可以順利通過審查，唔會有咩阻滯。
紋身嘅合法性同合理性
韓國嘅法律入面寫明紋身係侵入性醫療行為，所以係需要持有合格嘅醫生執照先可以幫人紋身。
코메디닷컴
所以基本上，而家全韓國嘅紋身師、Instagram入面寫明接受預約嘅工作室，大部分都係唔合法，所以廣告都唔會寫得咁明目張膽，多數用「作品集」嚟宣傳。根據估算，韓國大約有2萬幾個違法嘅紋身師，喺韓國紋身嘅優點就係又快又平嘅交易，所以韓國嘅紋身產業相當鼎盛同普遍，不過就衍生咗後續嘅醫療、同合法性問題，呢樣嘢都係喺韓國紋身要留意嘅地方。
除此之外，社會大眾對於紋身嘅接受程度都唔同，尤其係當藝人喺自己嘅社交平台上面有意無意咁露出新嘅紋身，下面嘅留言都會分開咗兩派。一派就會問「又有新紋身？」「公司知唔知？」；另一派就會話「新紋身好靚」「支持你做自己」呢類嘅留言。
喺大多數嘅電視放送舞台，紋身都係唔可以公然出現，只可以作為藝人同粉絲，或者藝人自己嘅情感連結。
藝人、大眾嘅紋身爭議
紋身嘅爭議唔單止侷限喺電視台，更加可能影響日常生活，例如韓國有啲汗蒸幕都寫明禁止有大片紋身嘅人進入。
SMTOWN
而之前少女時代嘅潤娥曾經公開過大面積嘅紋身圖案，令一直行清純路線嘅佢受到唔少抨擊。雖然只係活動所需嘅紋身貼紙，但係由網友嘅反應嚟睇，女性身上面有紋身仍然喺社會上存在根生蒂固嘅負面刻板印象。
出演《夫婦的世界》「最美小三」韓素希都被起底，之前手臂上曾經有一大片嘅紋身，雖然而家已經去除，但仍然俾媒體以「污點」形容佢嘅紋身。
而再之前就有一位有千萬粉絲嘅菲裔美籍KOL，俾韓國網友發現手臂上面嘅紋身同象徵日本二戰軍國主義嘅旭日旗相似，引發廣大韓國網民嘅不滿，甚至要求道歉。嗰位KOL都表示願意道歉同埋遮蓋甚至去除呢個有軍國主義思想嘅紋身，不過呢件事已經演變成兩國網民嘅衝突，菲律賓網友認為韓國網友太過激進，衍生咗一連串反韓運動。
동아일보
對於現今南韓社會嚟講，大眾對於女性藝人嘅紋身仍然係抱有比較封閉嘅思想，而男性藝人嘅紋身就多數可以被接受。
另外，韓國軍方都有規定，身上面有大面積紋身嘅人會受到限制入伍服役，所以唔少人揀紋身避兵役，軍方都針對呢項行為以「故意毀損身體罪嫌」應對。
紋身始終係留喺身上面一世嘅事，要去除同埋遮蓋都唔容易，所以選擇紋身都係需要深思熟慮先可以決定，大家又有咩睇法？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
