2024首爾賞櫻懶人包
2024年首爾賞櫻景點大推薦！除咗汝矣島同蠶室仲有邊度好去？
- 2024首爾櫻花開花時間
- 首爾賞櫻景點推薦
- 蠶室石村湖水（잠실 석촌호수）
- 汝矣島輪中路（윤중로）
- 慶熙大學（경희대학교）
- 駱山公園（낙산공원）
- 延世路（연세로）
- 華克山莊櫻花路（워커힐 벚꽃길）
- 國立顯忠院（국립현충원）
- 南山公園（남산공원）
- 仙遊島公園（선유도공원）
- 城內川（성내천）
- 良才川（양재천）
- 首爾林（서울숲）
- 波拉梅公園（보라매공원）
Hello，大家好，我哋係由韓國人每日提供最新韓國旅行資訊嘅Creatrip。
有唔少朋友都鍾意每年櫻花季飛返轉韓國去賞櫻，2024韓國櫻花到底幾時會開花，首爾又有邊幾個必去賞櫻景點，記住唔好錯過今日呢篇blog啦！
想輕鬆去其他城市賞櫻？🌸
2024韓國櫻花預測
2024首爾櫻花開花時間
今年首爾櫻花預計會喺4月3號開花，韓國北部亦都大致上會喺4月3號到7號之間陸續開花，一個禮拜後就會完全盛開！所以如果想睇櫻花，記住喺呢段時間嚟啦！
首爾賞櫻景點推薦
蠶室石村湖水（잠실 석촌호수）
- 前往方法：蠶室站（잠실역）2、3號出口
喺蠶室站向樂天世界方向行，就會見到被樂天世界同高樓大廈圍繞住嘅石村湖，呢度係首爾最出名嘅賞櫻勝地之一，圍繞住石村湖嗰條散步路兩邊全部都係櫻花樹，大家不妨抽時間嚟散步打卡，氣氛超浪漫！
汝矣島輪中路（윤중로）
大家可能冇聽過輪中路呢個名，不過呢度就係汝矣島每年都會搞櫻花慶典嘅地方啦！通常4月上旬都會有固定時段會封路，等大家可以漫步櫻花隧道，欣賞一大片粉紅櫻花~ 而汝矣島漢江公園一帶都充滿春天氣息，大家有機會記住一定要去吓啦！
慶熙大學（경희대학교）
- 前往方法：回基站（회기역）1號出口
如果想喺首爾一帶嘅大學賞櫻，小編最推薦大家去慶熙大學（有好多韓國人都會專程嚟）！校園道路兩邊都開滿櫻花，搭配埋同古典建築大樓真係勁靚！
駱山公園（낙산공원）
- 前往方法：惠化站（혜화역）2號出口
駱山公園位於成均館大學、梨花洞壁畫村附近，係首爾其中一個情侶必去景點之餘，亦都係一個好出名嘅賞櫻景點。呢度保留咗舊城牆，雖然日頭嚟都可以欣賞靚景，不過小編更加推薦大家夜晚嚟，俯瞰首爾市區夜景！
延世路（연세로）
- 前往方法：新村站（신촌역）2、3號出口
新村延世路每年春天都會開滿櫻花，齋睇相都覺得好靚。雖然冇汝矣島櫻花路咁壯觀，不過因為呢度位於延世大學附近，所以大家可以順便嚟享受美食同購物，安排行程最方便！
華克山莊櫻花路（워커힐 벚꽃길）
- 地址：서울 광진구 광장동 44
- 前往方法：廣渡口站（광나루역）2號出口
喺廣渡口站搭接駁車上山，就可以去到韓國人先知嘅賞櫻秘境——「華克山莊櫻花路」！呢度幾乎冇遊客，大家可以享受療癒時光，喺櫻花樹下漫步。
國立顯忠院（국립현충원）
- 地址：서울 동작구 동작동 205-8
- 開放時間：06:00 - 18:00
- 前往方法：銅雀站（동작역）8號出口
如果想去遠少少，不妨可以離開首爾鬧區去國立顯忠院。呢度櫻花季嘅時候人潮比想像中少，加埋莊嚴肅穆嘅氣氛同超特別嘅「垂櫻」，景色夠古典之外影相打卡一流！
南山公園（남산공원）
- 地址：서울 중구 삼일대로 231
- 前往方法：明洞站（명동역）4號出口
喺南山山腳向N首爾塔（南山塔）方向行，途中會經過南山公園。呢度每逢春天就會被染成一大片粉紅色，超夢幻！建議大家可以先搭纜車上山，再慢慢行落山，咁樣冇咁攰之餘舒服好多！
仙遊島公園（선유도공원）
- 前往方法：唐山站（당산역）2、3號出口
上面幾個景點大家應該大致上都聽過，不過好少人會知道仙遊島公園呢個地方！仙遊島坐落喺漢江之上，春天嘅時候開滿櫻花，推薦大家可以嚟野餐，靚景配炸雞啤酒真係一流！
城內川（성내천）
- 地址：서울 송파구 올림픽로39길 20
- 前往方法：蠶室渡口站（잠실나루역）1號出口
ohmynews
喺蠶室渡口向城內川方向行，沿途都係好靚嘅櫻花路！如果係喺城內川開始行，行大約1個鐘之後就會去到奧林匹克公園，係韓國人先知嘅賞櫻秘境！
良才川（양재천）
- 地址：서울 서초구 양재동 126-1
- 前往方法：良才市民之森站（양재시민의숲역）1號出口
강남뉴스
良才川流經江南一帶，近呢幾年越嚟越多韓國人都會嚟呢度賞櫻，更加會舉辦櫻花慶典。好似清溪川咁，良才川流經好多地方，大致分為良才市民之森站到梅峰站、梅峰站到道谷站、道谷站到開浦洞站，大家可以根據行程安排去邊個area。
首爾林（서울숲）
- 前往方法：首爾林站（서울숲역）4號出口
首爾林係首爾最大嘅綠色地帶，一年四季都有無窮無盡嘅靚景。而每逢春天，唔少首爾人都會趁weekend天氣好嘅時候喺度野餐同散步，相當寫意！
波拉梅公園（보라매공원）
- 前往方法：波拉梅公園站（보라매공원역）1號出口、波拉美醫院站（보라매병원역）1號出口
ohmynews
可能大家未必聽過呢個公園，不過其實佢係首爾市內其中一個賞櫻名勝，喺波拉美公園站行一陣就可以睇到櫻花隧道，雖然得呢個位，不過附近市民春天嘅時候都一定會嚟睇櫻花+散步！
以上就係小編今日幫大家整理好嘅首爾賞櫻景點，由遊客必去景點到韓國人先知道嘅賞櫻秘境都有，唔知道大家最想去邊度呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com