釜山十大必食美食

Hello，大家好，我哋係由韓國人每日提供最新韓國旅行資訊嘅Creatrip。

釜山係其中一個香港人嚟韓國旅行必去嘅城市之一，而海港城市唔少得嘅就一定有新鮮海產同辣嘅嘢食，當然仲有當地特色小食啦！一齊嚟睇下自己食過邊啲啦！

🔎釜山自由行必去景點推薦

釜山旅行必備✨

釜山十大必食美食

豬肉湯飯_{(돼지국밥)}

釜山美食入面，認咗第二冇人敢認第一嘅就係釜山豬肉湯飯。濃郁嘅豬骨湯底加上超多豬肉片同豬內臟，喺釜山最重要嘅係一定要加韭菜食！喺釜山各地都有好多豬肉湯飯店，每間店都會有自己嘅特色，大家一定要食吓啦！

🔎釜山8間必食豬肉湯飯

果仁糖餅_{(씨앗호떡)}

糖餅首爾都有，點解會係釜山必食？呢款糖餅唔係普通糖餅咁簡單，用煙韌麵糰包住黑糖之後煎，再剪開放勁多果仁，食落好香口，而且聽講仲係發源自釜山！喺釜山南浦洞BIFF廣場小食街都可以見到唔少賣釜山果仁糖餅嘅鋪頭，因為其實味道都差唔多，所以搵冇咩人排隊嘅鋪頭買嚟食就得XD

🔎釜山南浦洞美食總整理

油豆腐福袋_{(유부주머니)}

油豆腐福袋顧名思義，就係喺油豆腐（腐皮）入面放粉絲、洋葱、蔬菜、冬菇、豬肉等等嘅食材，然後再整成福袋形狀嘅美食！喺富平罐頭市場周圍都可以見到賣呢種釜山必食小食嘅鋪頭，通常比起齋食油豆腐福袋，都會加埋柴魚煮嘅湯頭同魚糕，熱辣辣超暖胃！

魚糕_(어묵)

釜山人好鍾意食魚糕，甚至出咗幾百種口味嘅魚糕，喺首爾未必可以搵到咁多款！釜山有好多好似上面張圖咁嘅魚糕專門店，就好似麵包鋪咁排曬各種味道嘅魚糕俾大家夾，大家可以按照喜好慢慢揀！

韓式拌粉絲_{(비빔당면)}

呢款韓式拌粉絲小編真係淨係喺釜山先見過！韓式炒粉絲入面嘅粉絲加上秘製辣醬、麻油、蔬菜等等，睇落好似係凍嘅，不過其實係熱食！雖然食材好簡單，不過口感夠特別，而且辣辣地夠惹味~ 呢種特色同釜山人性格好類似，所以韓國人成日都會用呢款美食形容釜山人XD

涼拌豬腳_{(냉채족발)}

豬腳係韓國必食美食之一，但係喺釜山就會加埋海蜇同各種蔬菜，再淋上用水果、芥末同醬油整成嘅涼拌醬汁，酸酸甜甜咁，唔會好似普通豬腳咁膩之餘口感都更加特別！喺南浦洞有一條豬腳一條街，推薦大家抽時間嚟食！

小麥冷麵_(밀면)

講到韓國冷麵，大家通常都會諗起蕎麥麵，或者比較煙韌咬唔斷嗰種冷麵。喺釜山有一款特色冷麵，麵係用麵粉整嘅，口感同普通冷麵有少少唔同，好多韓國人去釜山都至少會食一次。如果大家怕太生冷，不妨可以叫多份餃子一齊食！

東萊葱煎餅_{(동래파전)}

내 그리운 나라

韓國有好多種葱煎餅，而喺釜山東萊區就有一款叫「東萊蔥煎餅」嘅特色美食，同普通葱煎餅相比更加厚身，粉漿會比較稀，入面亦都放滿葱同海鮮等食材。韓國人食煎餅嘅時候都會配傳統米酒，味道又真係幾夾！不過因為東萊區距離觀光區比較遠，所以如果想食就要搭耐啲車先去到啦！

烤盲鰻_(꼼장어)

如果喺首爾要食生章魚，去到釜山就要食盲鰻！兩款韓國美食睇落好似好唔同咁，不過好多釜山烤盲鰻餐廳仍然都會將即劏盲鰻直接放上烤盤，所以大家會見到佢哋不斷蠕動（視覺都真係幾衝擊XD），而且味道都比較特別，就算係韓國人都未必個個鍾意。

海鮮料理_(해산물)

去到海邊城市，當然必食新鮮海產，小編個人覺得喺釜山食海鮮好似會平過喺首爾！大家可以去專賣海鮮嘅餐廳食，或者去傳統水產市場格價，買完想食嘅海鮮之後再交俾市場樓上嘅餐廳即煮。推薦大家去釜山南浦洞札嘎其市場同機張市場，嘆返餐豐盛海鮮大餐！

以上係釜山旅行必食嘅十大釜山美食，釜山物價會低過首爾，大家可以大飽口福！

釜山旅行仲有咩好玩？✨

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購

Mail：help@creatrip.com