韓國搵工必備資歷
韓國失業率高企！想搵份好工一啲都唔易，十樣韓國搵工必備스펙（經驗、證書）！
Hello，大家好，我哋係由韓國人話你知每日最新韓國資訊嘅Creatrip。
＃韓國文化 ＃搵工
＃履歷 #CV
全球經濟受武漢肺炎影響，正面對困境。
韓國同樣受到影響，2019年嘅失業率高達3.78%！對韓國人嚟講，要搵到工並唔容易。
韓國人嘅CV上需要有唔同嘅스펙（經驗、證書），先會有公司請佢哋。
所以，韓國人為咗搵份好工，真係要花好多心機。
今日小編就講下韓國人講嘅스펙到底要有啲咩啦！
✨馬上Follow我哋IG
instagram.com/creatrip.hk
스펙 (Spec): 搵工必備嘅經驗同證書
스펙 (Spec）係指韓國人為咗增加見得成工嘅機會，而儲落嘅經驗同證書。
雖然香港學生都會為咗搵份好工而參加唔同嘅活動、考試，但喺韓國真係難好多。
香港學生通常畢業就會搵工（視乎工種），但韓國人可能仲要準備唔同嘅考試，至少半年以上先會搵到工。
除咗準備學業成績、語言成績等證書之外，仲有外表都好重要。
為咗預備以上各種資料，再搵心儀嘅工作，小編朋友用咗一年半去考資格試。
因為喺韓國搵份好工嘅要求真係太高，韓國人嘅CV有十樣一定唔可以缺少嘅經驗、證書。
1. GPA
喺香港，GPA可以過三爆四當然好，但其實好多僱主都只會睇畢業證書。
韓國有部份僱主就連GPA都好睇重。
韓國求職網站Jobkorea就有調查顯示，GPA過3.68嘅學生會有大啲機會搵到工。
（韓國大學GPA通常滿分都係4.3或者4.5）
真係好高要求！
2. TOEIC成績
韓國仲好著重英文能力，TOEIC成績對韓國畢業生嚟講係必備嘅一項。
所以坊間有好多TOEIC補習社，仲擔保學生可以拎到700分以上嘅成績。
香港都係一個好著重英文能力嘅地方，不過就好似唔會規定一定要有指定考試嘅英文成績。
其實大部份韓國大學生喺TOEIC都考特好好⋯⋯
相信嚟過韓國嘅朋友都會覺得韓國人英文唔好、講唔出，但其實大部份韓國大學生喺TOEIC都考得好好⋯⋯
3. TOEIC 口試成績
頭先都有提到韓國大學畢業生嘅TOEIC成績好，但講就好似麻麻⋯⋯
所以，韓國公司都會睇TOEIC嘅口試成績。
4.OPIc 考試
OPIc 考試全名 Oral Proficiency Interview - computer ，係另一個考英文口試能力嘅考試。
不過，呢個考試偏向考一啲日常生活溝通嘅題目，唔係背得多單字就可以考得好。
5. 外語能力
除咗英文之外，有其他外語能力都好加分。
韓國人好多都會學日文、中文等等，見工個陣都係一個優勢嚟㗎！
有網站指，要入韓國三星呢啲大公司，一至兩種語言能力喺基本，識夠四種就最加分。
6. 證書
文憑學位、大學學位係喺韓國搵工好基本嘅必備證書。
除此之外，要增加搵得成工嘅機會，韓國人通常都會考多兩、三個資格。
小編有朋友讀生物醫學工程（Medical Engineering）出身，就會執考返有關係嘅執照去搵工。
7. 留學/外國經驗
去過外國留學或者生活都係一個搵工加分位。
不過大部份韓國人都冇呢個經驗（大約80%都冇）。
韓國公司會覺得去過去國生活或者留學嘅人，一嚟外語能力比較好，二嚟可以為公司帶嚟新嘅衝擊。
8. 實習
實習經驗對搵工都好重要。
因為韓國小朋友由細到大都要考試，比較少機會可以真係入職場做嘢。
實習經驗可以視為佢哋嘅工作經驗，如果同申識嘅職位有關就更好。
9. 獎項
韓國公司仲會睇求職者有冇拎過咩獎。
如果求職者有拎過獎嘅，就可以係一個加分位。
10. 義工活動
義工活動喺搵工嘅時候都係一個加分位。
小編喺香港讀中學個陣，學校規定每年都要參加一次義工活動，儲CV考大學⋯⋯
不過，呢一點有少少違背做義工嘅原意，做義工好似變咗為利益而做一樣。
當然有心去做義工嘅人一樣有好多啦！
以上就係韓國畢業生搵工要有嘅스펙（Spec），唔知大家點睇呢？
為咗搵到份好工，韓國人真係要準備好耐⋯⋯
✨馬上Follow我哋IG
instagram.com/creatrip.hk
| 其他延伸閱讀 | |
 韓國人誤解香港 |  韓國人血型睇性格 |