韓國生活優點
喺韓國生活實際有咩好？住喺韓國嘅小編親自解答！細數八個住韓國嘅好處
Hello，大家好，我哋係由韓國人每日提供最新韓國旅行資訊嘅Creatrip。
近年越嚟越多人選擇嚟韓國生活，到底嚟韓國生活有咩咁好？今日小編就要為大家介紹一啲喺韓國生活先體驗到嘅優點。
韓國生活優點
1. 夜間安全
韓國嘅夜生活好豐富，所以即使玩到2-3點先返屋企，條街都唔會靜到一個人都冇。而且韓國周圍都有CCTV（呢一點有好有唔好），有人犯案都可以影到。不過，當然最好就梗係有朋友一齊先夜返屋企，而且唔好夜媽媽行入窄巷啦！
2. 公共交通系統
首爾嘅公共交通系統好完善，地鐘去唔到嘅地方大多都有巴士連接，而且巴士轉搭地鐵會有轉乘優惠，更有共享單車同滑板車，選擇好多。韓國其他地區都一樣，大多都有巴士到達；城市同城市之間嘅交通亦好方便。
3. 休憩空間
韓國有好多可以散步、運動、拍拖嘅公園，政府負責管理，俾人短暫脫離城市，休息下。而且幾乎每個屋苑都有一個綠色空間，喺屋企附近都可以休息。雖然香港好多地方都有做到綠化，但要去好似韓國咁大嘅野餐、休憩空間，交通就冇咁方便。
4. 超快Wi-Fi
韓國網速真係好快，而且周圍都有Wi-Fi，小編用緊一個月10GB嘅電話plan，但因為地鐵、cafe都有Wi-Fi，基本上每個月都用唔夠2GB。
5. 便利店
韓國便利店好多，每隔一段路就有一間，非常方便，加上每一個便利店牌子都有自己獨有嘅商品，大家嘅選擇就自己更多啦！小編間唔中都會喺便利店買飯盒食，味道唔錯，價錢又平。
6. 垃圾分類
韓國垃圾分類做得好好，唔可以回收嘅物品同廚餘都要用收費垃圾袋，大大增加回收量，保護環境。不過，香港唔一定要做回收，所以小編啱啱嚟到韓國都好唔習慣。咁點解會喺個優點？小編覺得保護環境，人人有責，養成回收嘅好習慣係一個好重要嘅優點！
7. 時尚服飾同化妝品
韓國嘅時尚好多樣，成日都會有新款，加上韓國製造嘅衫質量唔錯，價錢又唔會好貴。尤其係住喺韓國，可以經常留意住各大潮牌嘅特價，用最平嘅價錢買新衫。
大家都知韓國化妝品又平又好用，但係喺香港買好多時都會貴成倍，經代購去買又有啲麻煩，住喺韓國嘅另一個好處就係可以好易買到韓國化妝品，仲可以加入會員，隨時留意有咩特價。好似Etude House 同Innisfree呢啲牌子，好多時每個月都會有一次優惠期，香港賣港幣250嘅眼影盤，小編唔使港幣100就買到。
8. 韓國網購
韓國網購有時真係快到你唔信，好多時今日訂完，聽日就會收到！甚至只要每個月俾錢升級，更加可以今晚買，聽朝早就會收到。
今日介紹咗一啲住喺韓國嘅好處俾大家，唔知大家覺得點呢？其實無論住喺邊都一定有佢嘅優點同缺點，唔住落真係發掘唔到。
如果有更多想知嘅內容，都可以隨時留言或者dm話俾我哋知：）
Instagram：creatrip.hk