韓國買平嘢方法
點可以喺韓國用比其他人平嘅價錢買同一樣嘢？唔可以錯過嘅優惠！帶現金冇執輸？
Hello，大家好，我哋係由韓國人每日提供最新韓國旅行資訊嘅Creatrip。
嚟到韓國旅行又點少得Shopping呢？不過有時會覺得某啲嘢兌返港紙好似有啲貴⋯⋯今日小編就要教大家一啲可以用平啲嘅價錢喺韓國買到同一樣嘢嘅方法。
韓國買平嘢方法
1.帶現金
大家嚟到弘大、梨大嘅街邊鋪或者行地下街，好可能價錢牌上面會寫住「현금」或者Cash。意思係俾現金就會喺牌上嘅價錢，但如果要碌卡就會俾貴啲。因為碌卡俾錢嘅話，間鋪會俾銀行扣手續費，所以信用卡定價就會高啲。
2. 半夜特價
韓國好多購物網站都會喺半夜做特價，所以韓國人好鍾意online shopping，而韓國嘅網上購物平台都特別多，網上購物可以買到服飾、食物、電器等等。
每日嘅特價商品都唔一樣，喺半夜就會更新，所以要買到好嘢同平嘢就要捕住佢更新嘅時間。不過，有一個小缺點就係部份韓國網站要實名認證，所以外國人會用唔到。呢個買平嘢嘅方法可能比較適合有長期簽證嘅朋友。
3. 大型超市促銷
韓國大型超市，好似e-mart、樂天，都會有一個熟食專區，每日去到傍晚，呢個區就會開始減價。
壽司、炸雞、海鮮、豬腳等等，都會有半價至7折優惠，食物質素都唔會好差，因為都係同一日整好。
如果大家plan咗傍晚先去行超市，可以睇下有冇嘢想食，買返酒店當宵夜，或者可以買麵包做第二朝嘅早餐。
4. 連鎖店優惠
韓國嘅化妝品、護膚品間唔都會做特價，尤其係Olive Young同Lalavla，呢兩間韓國大型連鎖店。喺呢度，大家可以買到好多韓國品牌嘅化妝品、護膚品（外國大牌子都有），有時折起上嚟加埋扣稅真係會好平。上一次大優惠，一塊原價₩2000嘅面膜平到₩910，多過半價，小編都買咗一啲喺屋企。
如果大家嚟旅行，見到Olive Young同Lalavla大大隻字寫住sale，記得入去睇。
5. 分享優惠
韓國好多都會有「SNS 공유 이벤트」，大家只要喺自己嘅社交平台分享餐廳嘅相，加埋指定嘅hashtag，就會有特別優惠。小型餐廳可能會送一碟小食，大型連鎖餐廳好多時就會送優惠劵。
大家坐低之後，可以望下周圍有冇呢一種優惠。通常見到IG logo即係有，大家可以影張相再打hashtag去換啲小優惠。
以上介紹嘅幾種買平嘢嘅方法唔知大家點睇呢？當然仲有一種方法，就係加入Creatrip會員，用我哋提供嘅優惠劵啦！大家有咩買平嘢嘅方法都可以同我哋講，等我哋再分享俾各位香港朋友。
如果有更多想知嘅內容，都可以隨時留言或者dm話俾我哋知：）
Instagram：creatrip.hk