韓國洗手間文化
韓國洗手間小知識！去完廁所一定要放個蓋落嚟？敲下門先好入廁所？
Hello，大家好，我哋係由韓國人每日提供最新韓國旅行資訊嘅Creatrip。
洗手間可以話對我哋嚟講係「不可或缺」，基本上每日都會用到。有時人有三急，就要喺街、商場到搵廁所。大家又知唔知韓國洗手間有咩特別呢？同香港嘅洗手間又有咩唔同？等小編帶大家去睇下啦！
韓國洗手間文化
馬桶蓋
大家喺香港公廁去完廁所，應該好多時沖完廁就會走。如果有一格廁所係個蓋放咗落嚟，大家都好自然唔會入去，怕一打開，會「 中伏」💩。喺韓國，韓國人通常仲會將馬桶蓋放落嚟先走，所以往往閂埋嘅馬桶先係乾淨可以用嘅馬桶。加上，放咗馬桶蓋落嚟先沖廁，可以防止細菌經水花彈出嚟添。
小編初初嚟到韓國都好唔習慣呢一點，覺得又要用手掂到個蓋去打開，會好污糟。不過慢慢習慣咗，而家去完廁所都會順手放個蓋落嚟，話俾下一位知：安全可以用！
如果大家嚟到韓國見到有馬桶閂埋，95%乾淨可以用，但如果你咁唔好彩中咗個5%⋯⋯就快啲行出嚟啦！
廁紙
韓國公廁都有時會冇廁紙提供（尤其地鐵入面嘅廁所，可能咁啱用完又未補）。所以小編建議大家要自備紙巾。不過呢一點對香港人嚟講應該唔難，因為香港公廁好多時都冇廁紙。
垃圾桶
韓國廁所通常都會有呢啲方型、專放女性衛生用品嘅垃圾桶，掛喺牆上面。
前面都有公告提醒大家只可以將紙巾掉入廁所入面，其他垃圾只可以放入垃圾桶。相信各位香港人都好有公德心，唔會亂掉垃圾。
敲門
大家嚟韓國有冇試過去去下廁所有人敲門呢？遇到呢啲情況，尤其喺得一格嘅廁所嘅話，大家唔使驚，好正常。喺香港，大家見到廁所門閂埋，都好自然覺得入面有人。但係喺韓國，佢哋係咪有人用緊，又唔想直接試開門，就會先敲一敲。呢個時候，大家只要答佢「有人」（唔識韓文可以叫一句「NE？」）就得㗎啦！
不過要留意，如果廁所門口貼咗呢句「廁所門故障，一定要敲門」，大家記得記得一定一定要敲門先開！
偷拍
大家睇新聞，應該都有聽過韓國有廁所偷拍嘅罪案。韓國政府非常重視呢個問題，但始終有潛在危機。呢種罪案其實係任何一個國家都可能出現，大家隨時都要小心留意四周有冇其怪嘅地方。
踎廁
韓國有90%嘅公廁都係坐廁，只有少數仍然會有踎廁。最少見到踎廁嘅應該係地鐘入面嘅廁所。
因為踎廁始終冇咁方便，尤其對老人家嚟講，可能會唔係咁方便踎，所以慢慢踎廁都被坐廁取替。
以上就係有關韓國洗手間嘅一啲小知識。大家下次嚟韓國，都可以留意下啲公廁係咪真係有以上提到嘅幾點。
如果有更多想知嘅內容，都可以隨時留言或者dm話俾我哋知：）
Instagram：creatrip.hk