《PD101》製作人判2年徒刑
《PRODUCE101》造假風波，安俊英一審判2年！JTBC爆料：第三、第四季名單全造假
Hello，大家好，我哋係由韓國人每日提供最新韓國旅行資訊嘅Creatrip。
韓國最熱門嘅選秀《Produce》系列節目，「國民製作人」與「Pick Me」嘅概念引起全球熱潮，海外其他國家都紛紛推出類似嘅選秀節目。《Produce》系列成功捧紅第一、第二季出道，已經解散嘅I.O.I同Wanna One，同埋活動中嘅IZ*ONE、出道冇耐就解散嘅X1。
不過，節目由第二季開始就傳出造假嫌疑。第四季節目最終成績出爐，畀粉絲發現票數有古怪，韓國警方正式入手調查，扣押、搜查《Produce》製作組PD同參與節目嘅經紀公司代表。
《Produce》造假風波
首爾中央地方法院刑事21部，日前一審宣判，對涉嫌操控投票、接受經紀公司招待嘅《Produce》系列製作人安俊英PD，判處2年有期徒刑，並處以罰款3,700萬韓元（港幣23萬），而總導演金勇範（김용범音譯）就被判處1年8個月有期徒刑。
《Produce 101》系列節目，同原本韓國選秀節目性質唔同，標榜國民製作人（觀眾）可以參與投票，揀出心目中可以出道嘅成員。
由第一季有I.O.I，第二季再有Wanna One，兩團都人氣好高，風頭一時無兩，備受矚目。
不過，直到第四季完結，總製作人安俊英PD，就因造票、影響觀眾SMS付費投票結果而被起訴。
據了解，安PD由2018年一月至2019年七月，接受咗大約41次經紀企劃公司嘅相關人士招待同賄絡，去畀佢哋旗下嘅練習生出演節目，涉及金額高達3,700萬韓元。
法庭就捏造投票結果嘅行為表示：呢個做法完全違背以為可以直接選拔出道成員嘅觀眾信任，同時對以出道為目標，流住汗水同淚水，盡全力參加比賽嘅練習生都非常不公，犯下超出可容忍範圍嘅罪行。
日前，JTBC獨家報導，表示《Produce》第三季、第四季嘅製作組，事先已經安排出道名單，震驚各界，同去年調查結果指「僅有部分出道名單係指定」嘅說法有差別。
目前第四季出道組X1已經解散，成員各自回歸原有團體，或進行SOLO活動；而第三季出道組IZ*ONE喺二月出新歌後，六月會發行第三張迷你專輯。
如果有更多想知嘅內容，都可以隨時留言或者dm話俾我哋知：）
Instagram：creatrip.hk