韓國獵巫風氣
檢討定係無理攻擊？韓國由同性戀、藝人、新天地到梨泰院，「獵巫風氣」從來冇停過？
Hello，大家好，我哋係由韓國人話你知每日最新韓國資訊嘅Creatrip。
每當喺現代社會發生重大事件，都要搵返責任歸咎同起因，希望從中汲取教訓，後代唔會再行相同嘅路。不過問責個陣，一唔小心就會上綱上線，變成無理攻擊特定人群，稱為「獵巫」。喺韓國社會，獵巫風氣比想像更加興盛，真正嘅是非對錯，似乎喺某部份韓國人心中，並唔係最重要。
韓國獵巫風氣
1. 新天地教會
來源：NAVER BLOG@또바기
受新冠肺炎疫情（相關報導撳我）影響，一開始令韓國疫情爆發嘅新天地教會，當初可以話係人人喊打。雖然確實因為新天地教會蓄意隱瞞，令韓國確診病例迅速飆升，當時韓國人對新天地教會極度憤慨。似乎只要有人同新天地教掛上關係，就會被旁人用異樣眼光看待。於是喺初期有部份新天地教徒或者佢哋嘅屋企人，會刻意隱暪，因而令韓國疫情調查有一定困難。
來源：연합뉴스
雖然隨住宗教集體感染結束，韓國人對新天地教會嘅攻擊已經停止，但係佢哋對新天地教會嘅印象已根深蒂固。只要提起新天地教會，就一定會上綱上線。
2. 梨泰院
梨泰院資料照片
多數人諗起梨泰院，都會覺得係個充滿異國風情、夜店酒吧林立嘅地方，對韓國性少數族群嚟講，呢度更係佢哋藏身嘅另一個家。龍仁市第66號感染者表示自己去過梨泰院多間夜店，而呢啲夜店被韓國媒體起底，指出係梨泰院同志、變裝皇后夜店，令輿論沸騰。隨住爆出越嚟越多去過呢啲夜店嘅感染者出現，韓國社會對於「感染新冠肺炎 = 去過梨泰院夜店 = 同性戀」嘅刻板印象加深。
來源：연합뉴스
就算開始有其他熱門夜店爆出確診案例，政府都呼籲所有去過梨泰院嘅人接受檢查，但韓國大眾嘅態度，令特定族群唔敢檢驗，怕身份曝光。最明顯嘅轉折係首爾同京畿道宣布，會保障接受檢測人士嘅私隱，推出免費匿名篩檢，令明明係工作日嘅星期一，比仲未宣布匿名篩檢制度嘅星期日多出近兩倍嘅檢測量。
來源：연합뉴스
韓國社會對今次梨泰院集體感染嘅批評聲浪，從未止歇，部分人士出現症狀但唔敢承認，又怕身份曝光而隱瞞自己去過邊，令疫情喺各地都以一定規模擴散。
3. 韓國女性權力
來源：민족의소리
女權意識喺韓國一樣被受打擊，電影《82年生的金智英》，未上映就遭受網友無情批評，主角鄭有美亦受到無理攻擊。甚至只係睇《82年生的金智英》原作，Red Velvet隊長IRENE就被貼上女權主義標籤，更有FANS燒相恐嚇。
電影《82年生的金智英》
同時有其他韓國女藝人喺公開場合發言，或者SNS上面按讚、取消追蹤某一啲人、post，都會好容易被放大，上鋼上線話係女權主義，並衍生好多唔理性嘅留言。
4. 欺凌
電視劇《學校2015》
韓國嘅欺凌問題一直存在，無論係校園欺凌，定抑或網絡欺凌，都一樣難以平息。舊年決然了斷自己生命嘅雪莉，就係其中一個例子。雪莉退團之後，公開支持女性解放嘅，好多網友就喺網上出言攻擊。
雪莉退團後，褪去之前喺螢幕上嘅形象，以自己鍾意嘅形象示人，但係呢種做法，係民風保守嘅南韓社會並唔受人睇好，謾罵、嘲諷從未停止。佢曾經喺節目吐露心聲，向大眾解釋自己嘅行為。
雪莉、具荷拉
呢種攻擊喺雪莉離世後並冇停止歇，大眾開始將砲火對準f(x)嘅其他團員，指責點解唔喊、點解唔發言悼念，冇做出符合「大眾心目中」應該要有嘅悲傷舉動。另外，雪莉嘅好朋友具荷拉雖然喺直播承諾好好過落去，但最後都選擇自殺，離開人世。
事後韓國人先開始檢討，當初對呢兩位女藝人嘅指責係咪過多？雪莉明明只係過自己想要嘅生活，具荷拉明明係受到男友性暴力對待嘅受害者，點解仲會被南韓網友以惡毒嘅留言「被檢討」？
5. 同性戀
韓國有一個政治不正確，但真實嘅現象：南韓最大勢力係財團，再嚟先係政府；望落人人平等，但其實男性地位大於女性，如果你係同性戀，咁就係社會嘅最底層。
南韓社會冇人支持同性戀？有，但整體嚟講，社會恐同嘅風氣，已經完整體現喺今次梨泰院夜店集體感染上。加上早前爆出，韓國軍隊以軍法審判同性戀，甚至有長官無理強迫官兵指認同性戀同袍。
同性戀嘅身分喺韓國係洗唔走嘅標籤，有人做自己，勇敢聲援，但都不免遭受無數批評。
南韓嘅性少數族群，喺疫情同社會認同嘅污名化下，令佢哋成為獵人瞄準嘅獵物，不停攻擊。好多人都深怕自己會受到大眾歧視嘅目光，即使去過梨泰院，都唔敢向屋企人坦承或者接受檢測，令疫情二度、三度擴散。
究責同無理攻擊只係一線之差，過份投入個人情感同刻板印象，就會變成無理攻擊。喺國際間發生對韓國不利嘅事件嗰陣，韓國人好快就會凝聚共識，一致對外。但係當韓國人面對韓國國內嘅少數人群，就會出言惡意傷害對方。
先前因為梨泰院夜店集體感染，韓國中央防疫本部喺新聞發佈會上發言指：病毒可以傳染畀任何人，任何譴責病人或者煽動特定偏見嘅行為同文章，對韓國嘅防疫並冇任何幫助。如果有症狀或懷疑自己感染嘅人，因為呢啲說話而隱瞞身份嘅話，新冠疫情將會難以控制。
希望韓國呢一種風氣，可以早日改善。
如果有更多想知嘅內容，都可以隨時留言或者dm話俾我哋知：）
Instagram：creatrip.hk