江南 「松炭部隊鍋」介紹
江南松炭部隊鍋食後感！連鎖部隊鍋餐廳，簡單配料煮出好味道！
Hello，大家好，我哋係由韓國人每日提供最新韓國旅行資訊嘅Creatrip。
部隊鍋對大家嚟講一啲都唔陌生，今日就要介紹嘅係一間韓國部隊鍋連鎖店，唔好以為連鎖店就一定好普通，松炭部隊鍋都幾受當地人歡迎㗎！一齊睇吓係點㗎啦！
「松炭部隊鍋」介紹
小編呢日約咗朋友食飯，大家諗食咩嗰陣都一頭無緒，所以小編就上IG search 下有咩好食，一搵之下，就見到呢間松炭部隊鍋。
IG一搵松炭部隊鍋，就可以見到好多韓國人都去食過，見到啲相都好吸引，於是就決定要嚟一試究竟。松炭部隊鍋有好幾間分店，小編今次揀咗江南店（因為最近小編屋企）。江南松炭部隊鍋要坐地鐵到江南站，5號出口出嚟行五分鐘就到。
不過餐廳個門口唔太起眼，行行下可能會錯過。小編都差少少行過咗。
一齊睇下Menu先，除咗部隊鍋之外，呢度都有其他嘢食，例如有啲包肉、生蠔咁。
不過小編一心嚟到想食部隊鍋，所以就叫咗部隊鍋三人份，再加一份拉麵。
菜單 | 價錢 |
| 松炭部隊鍋 송탄부대찌개 | ₩12,000(人) |
| 特 松炭部隊鍋 특 송탄부대찌개 | ₩14,000(人) |
| 生菜包肉 촌집보쌈 | ₩50,000(大) |
| ₩40,000(中) | |
| 生蠔包肉 생굴 보쌈 | ₩58,000(大) |
| ₩48,000(中) | |
| 綜合包肉 모든 보쌈 | ₩60,000(大) |
| ₩50,000(中) | |
| 生菜包肉定食(午餐) 보쌈정식 (점심메뉴) | ₩14,000 |
| 蚵仔煎餅 굴전 | ₩20,000 |
| 海鮮煎餅 해물파전 | ₩18,000 |
| 泡菜煎餅 김치전 | ₩12,000 |
食物好快就上枱，除咗有主要嘅部隊鍋之外，仲有韓國餐廳必備嘅小菜。韓國小菜入面，小編個人都幾鍾意魚糕，切到細細一片，再加少少調味。至於泡菜都唔錯，唔會太辣。上枱嗰陣，部隊鍋仲未滾，大家記得等佢滾起先揭蓋。
一滾起已經聞到好香，賣相都幾吸引，可以見到入面有蔥、肉碎、年糕、火腿同腸仔等等嘅配料。
小編最鍾意呢度會配埋一碗飯俾大家，可以拎啲湯同配料撈飯一齊食，絕對夠飽。
湯底唔會死鹹，似泡菜湯嘅味道，因為小編好怕出面食部隊鍋或者一啲鍋物，湯底會有好重味精味。好味還好味，次次食完都好頸渴，飲水飲唔停。呢度嘅湯底就似真係用泡菜煮嘅味，酸酸辣辣，但又唔會辣到食唔到。
之後，就梗係要放埋拉麵啦！無拉麵嘅部隊鍋又點可以叫做完整嘅部隊鍋呢？拉麵記得唔好煮得太耐，有啲咬口先好食。食食下湯底會開始收水，記得搵店員幫手加水，唔係好易黐底！
總括嚟講，小編覺得松炭部隊鍋都幾好食，配料份量雖然唔少話好多，但絕對夠食。最重要係唔會有好重嘅味精味！如果食量比較大嘅朋友，可以揀番特級同加多幾款配料。
順帶一提，唔知係咪疫情關係，想衛生啲，呢度會俾兩支樽裝水（小編三個人去食）倒水嚟飲。
平時餐廳通常都會用大水壺，一枱客用完直接加水俾下一枱客用。雖然用樽裝水唔太環保，但咁睇落的確好似衛生啲。
除咗小編今日去嘅松炭部隊鍋江南店，都仲有好多分店，係地圖打「송탄부대찌개」就會搵到！
今日嘅介紹就嚟到呢度，下次小編會再搵好食嘅餐廳介紹俾大家！
咁多位，我哋下次見啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk