Daiso必買旅行用品
嚟到韓國先醒起唔記得帶呢樣嗰樣？Daiso旅行用品必買Top8！
Hello，大家好，我哋係由韓國人每日提供最新韓國旅行資訊嘅Creatrip。
香港人生活忙碌又成日大壓力，最好解壓方法就係去旅行鬆一鬆，但有時去旅行，總以為自己已經執好gip，點知到步之後總係會發現帶漏嘢。如果大家同小編一樣都係咁失魂嘅話，不如就去Daiso尋寶啦！唔知今次小編介紹嘅Top8旅行用品，大家又鍾唔鍾意呢？
韓國Daiso旅行用品推薦
1. 旅行萬用轉插 (여행용 멀티 어댑터）₩5,000
無論去邊個國家旅行都好，首先第一樣要知嘅就係佢哋用咩電壓同插頭，咁先可以幫手機或其他電子器材叉電。韓國同香港唔同，韓國係用2腳圓插，所以如果大家唔記得帶嘅話都唔緊要。去Dasio買呢個旅行萬用轉插，一個只要₩5,000，就算去唔同國家都可以用得到。呢一個轉插有個好處係有埋USB插頭，一次仲可以叉到兩部電話添！
2. 旅行用掛繩 （여행용 빨랫줄）₩1,000
而家唔少民宿或酒店都會提供洗衣機俾大家去洗衫。但又唔知點晾好嘅話，不妨買呢條掛繩，有1m24cm，唔會話好短。
3. 室內拖鞋（실내용 슬리퍼）₩1,500
可能大家會諗，好多酒店都有提供拖鞋，點解仲要去買？因為有好多酒店都唔係提供一次性拖鞋，又唔知酒店職員有冇換好。為咗衛生同安全起見，小編每次去旅行都會自備一對室內拖鞋，咁就唔使擔心咁多。
4. 行李保護套（캐리어커버）₩5,000
因為小編係Alice fans先會想私心介紹，買咗新gip但又怕刮花，最好方法就係買個套套住佢，小編見到呢個款，二話不說已經擺咗入籃。佢仲有分20同24inch兩個size添！
5. 行李帶（버클 캐리어벨트）₩3,000
無錯又係Alice....（完全係小編私心），嚟韓國又點會唔瘋狂Shopping呢？有時驚買太多會爆gip，咁呢個行李帶一定係大家嘅好幫手！佢可以輕鬆拉緊去調較，加上有埋密碼鎖好安全，想爆都難！
6. 行李秤（여행용 디지털 손저울）₩3,000
嚟到韓國想買好多嘢返去，但又怕超重？不如買個行李秤返去每日一秤啦！只要一秤就可以知道仲有幾多位可以買同放，咁Shopping緊嘅時候就唔使成日心掛掛啦。
7. 手機防水套 （스마트폰 방수팩）₩5,000
呢個可能日常生活唔太用到，但如果會去水上樂園玩嘅話，咁佢一定係大家嘅好幫手。去水上樂園大家又點會唔打卡影相呢？怕整濕部電話，咁用佢就一定冇有怕！因為佢就算趺到10M都仲係可以防到水，可以話係最高等級！當然，如果大家有時去沙灘玩，又想電話跟身都可以買返一個㗎。
8. 旅行用壓縮袋（여행용 압축택）₩2,000
呢個100%絕對要買返去用嘅產品之一！只需要₩2,000（HKD 13）就可以有細、中、大 3個袋去裝。佢好處係唔需要用吸塵機去吸，只需要將空氣放出再捲就可以令啲衫變細。唔單止會感覺行李多咗位可以放，同時拎起成個gip都會覺得輕咗，絕對非常適合購物狂嘅大家。
如果大家之後都想嚟韓國Daiso尋寶，可以先save低呢篇文章，話唔定可以幫到你！另外唔知大家仲有冇小編想介紹Daiso咩系列呢？歡迎大家留言話俾小編聽，小編就可以有藉口去shopping啦：）
如果有更多想知嘅內容，都可以隨時留言或者dm話俾我哋知：）
Instagram：creatrip.hk