Hello，大家好，我哋係由韓國人每日提供最新韓國旅行資訊嘅Creatrip。
嚟韓國旅行大部份朋友們都會選擇搭公共交通工具，當中一定唔少得地鐵！韓國首都圈有成超過600個地鐵站，到底邊個站最多人去、最多人上落車呢？最近首爾地鐵公司公佈咗2024年嘅統計資料，同你諗嘅又一唔一樣？
最多人去嘅首爾地鐵站
第7名
三成站（삼성역）[平均每日102,631人次]
位於2號線嘅三成站周邊有好多公司，除此之外大家嚟韓國嘅時候必去嘅COEX都喺附近，想去星空圖書館同K-POP SQUARE廣場嘅巨型LED藝術裝置打卡，記住要喺三成站落車啦！
第6名
新林站（신림역）[平均每日104,459人次]
新林站對外國遊客嚟講可能會比較陌生，不過因為係2號線同新林線嘅轉車站，所以每日會經過呢個車站嘅人真係唔少！（不過新林站之前曾經發生過斬人事件，所以建議大家都係喺度轉車好啦XD）
第5名
首爾站（서울역）[平均每日105,634人次]
相信大部分遊客都一定會成日經過首爾站，小編見到呢個排名都嚇親，冇諗過首爾站先得第5名（有成幾條地鐵線都會經過首爾站，不過今次呢個統計數字只係計咗1號線嘅數據）！首爾站除咗係首爾其中一個轉車大站之餘，附近仲有買手信必去嘅樂天超市同好多特色餐廳，大家經過嘅時候不妨可以預少少時間行吓~
準備嚟韓國掃貨？
第4名
九老數碼園區站（구로디지털단지역）[平均每日106,085人次]
구로구청
九老數碼園區站附近有一個大型數碼園區，各大電子產業公司大樓都係喺呢度，所以每日會喺呢個站上落車嘅大部份都係打工仔們XD
第3名
江南站（강남역）[平均每日149,757人次]
江南站同三成站一樣，附近有非常多公司（tmi小編返工都係喺呢度落車）！另外有唔少美容中心、整容中心都會喺江南開分店，所以喺江南中心條大路行成日都會見到包住塊臉嘅人XD 江南亦都出名多潮牌同人氣餐廳，同弘大明洞嘅氣氛非常唔同！
第2名
弘大入口站（홍대입구역）[平均每日150,369人次]
相信唔洗小編介紹，大家都一定知道甚至去過幾次弘大入口站！弘大入口站連接2號線、機場快線同京義·中央線，所以每日呢度人流都非常高。弘大入口站附近除咗有大家必去嘅弘大主街，仲有延南洞，行過少少仲可以去到合井、新村等等嘅地方，對遊客嚟講可以話係最方便同最常去嘅地鐵站！
第1名
蠶室站（잠실역）[平均每日156,177人次]
한국경제
眾所矚目嘅第一名係可以搭到2號線同8號線嘅蠶室站！大家熟悉嘅首爾樂天世界、樂天世界塔、樂天百貨公司、賞櫻聖地石村湖水、漢江公園全部都係喺蠶室站附近，無論係韓國人定外國人都經常會嚟呢度，所以蠶室站會成為第一名都唔算意外！
同場加映：人流最少地鐵站
而咁多個地鐵站入面人流最少嘅係位於9號線嘅遁村五輪站（둔촌오륜역），每日平均只會有1,465個人上落車。小編都係第一次聽到呢個站名，雖然奧林匹克公園同奧林匹克競技場就喺附近，不過因為有其他更加近嘅地鐵站，所以平時根本唔會有機會去到呢度。
唔知呢個結果同大家諗嘅一唔一樣呢，如果唔一樣，大家又覺得邊度會係人流最多嘅地鐵站？
如果有更多想知嘅內容，都可以隨時留言或者dm話俾我哋知：）
Mail：help@creatrip.com
