首爾傳統市場總整理
富有人情味嘅地道市場...9個首爾傳統市場大合集！廣藏、南大門、望遠、清涼里市場，你又鍾意邊個呢？
Hello，大家好，我哋係由韓國人每日提供最新韓國旅行資訊嘅Creatrip。
好多人去旅行，最期待嘅就係行當地嘅傳統市場。韓國傳統市場見證住時代演變，亦係當地人都好鍾意去嘅地方，充滿咗濃濃嘅當地生活面貌。今次小編會介紹九個熱門嘅首爾傳統市場俾大家。唔知大家又去過邊個呢？
首爾傳統市場總整理
1. 望遠市場（망원시장）
小Tips：首爾地鐵5號線望遠站（망원역）2號出口隔離條巷行5分鐘
首爾市場入面，人氣一直都好高嘅傳統市場就係望遠市場啦。嚟呢度嘅大多數都係當地人，亦因為咁樣，望遠市場可以保留到傳統市場嘅面貌，而且乾淨企理。
喺去望遠市場嘅路上，就會見到沿途有賣啲小食，大家唔好喺度就被吸走注意力啊！望遠市場係個室內市場，但整體嚟講唔會太焗、唔舒服，無論幾時嚟都有好多攤檔、美食。小編鍾意望遠市場，就係因為呢度有好多傳統韓國美食同平價小食。
比起遊客，真正住喺呢度附近嘅人，都會嚟望遠市場，大家可以見到當地人真正嘅生活面貌。望遠市場賣小食甜品嘅攤檔好多，小編推薦大家一定要嚟食下望遠市場嘅小食。
可樂餅、炸雞丁，甚至係冬甩、牛肉餅、刀削麵、豬腳等等，都可以用好平嘅價格喺首爾望遠市場食到。為咗呢啲小食而嚟望遠市場嘅韓國人都唔少，每一項都係必食經典。
2. 廣藏市場（광장시장）
小Tips：鐘路五街站（종로5가역）8號出口直行2分鐘就可以去到
講到最具代表嘅首爾市場，大概就莫過於位於市中心嘅「廣藏市場」啦！廣藏市場有好高嘅知名度，《Running Man》同好多外景節目，都曾經嚟過拍攝。
唔單止係外國人，韓國人都好鍾意嚟呢度。每到夜晚，都會見到唔少韓國人同朋友坐喺攤檔前面，食綠豆煎餅、飲馬格利酒。講到廣藏市場出名、值得推薦嘅食物係咩呢？一定要提生牛肉、生章魚同綠豆煎餅啦。
好多人嚟廣藏市場都一定要叫生牛肉，雖然成碟都紅色，睇落有啲得人驚，但味道就冇想像中嘅腥臭味，反而食落去甜甜地，帶有牛肉嘅韌性。
但小編認為，首爾廣藏市場入面，最具代表性嘅食物係綠豆煎餅，因為真係無論食邊一間，都覺得好好食（一定要配埋馬格利飲，唔係會太膩）。
但對於想嚟韓國傳統市場試新嘢嘅人嚟講，嚟到廣藏市場就一定要試下生章魚啦。呢啲章魚仲識郁，食落去會黐住嘴唇，要用少少力先可以整走。
另外，廣藏市場嘅餃子湯、麻藥飯捲等等，都好出名，建議大家坐喺呢種廣藏市場小攤檔嘅時候，一定要帶足現金去消費啊！
3. 通仁市場（통인시장）
小Tips：首爾地鐵3號線景福宮站（경복궁역）2號出口直行10分鐘
如果話首爾市場入面，廣藏市場嘅人氣最高，咁位於景福宮西村附近嘅通仁市場，應該係最奇蹟、最有生意頭腦嘅市場啦！因為通仁市場有個好特別嘅活動，大家可以用銅錢去一個個攤位買嘢食裝入膠飯盒入面。
呢個活動有別於一般市場嘅消費模式，令通仁市場喺遊客間嘅人氣變得非常高，亦因為通仁市場開始咗「銅板便當」呢個活動，成個通仁市場攤檔嘅經營模式，都產生咗好大變化。
不過都仲有一啲鋪頭或者部分商品，冇參加到呢個活動。大家可以參考下圖嘅粉紅白色牌，有掛出喺就係「銅板便當」嘅合作鋪頭。
小編好佩服諗到呢個活動嘅人，成功帶領已經奄奄一息嘅通仁市場，重新得到大聚嘅支持。
不過，聽講通仁市場一直要不停買新嘅銅錢。因為好多觀光客換咗銅錢之後就唔消費，將通仁市場嘅銅錢當做紀念品。雖然唔係好貴，但都希望大家可以尊重通仁市場。
4. 鷺梁津水產市場（노량진수산물시장）
小Tips：首爾地鐵1號線鷺梁津站（노량진역）後站
鷺梁津杯飯街
鷺梁津係首爾最多補習班嘅地方。呢度聚集無數應考公務員同準備大企業面試嘅學生，所以普遍物價比較平，亦係首爾青年比率最高嘅地方。
好多考生為咗紓解壓力，會去飲下酒、唱K、做Gym，所以餐廳、卡啦OK嘅數量都好多。呢度仲好興幾個人夾租一間屋，甚至有所謂嘅考試情侶，準備考試期間一齊，考完就分開。
0.jpg)
而喺鷺梁津後站呢度仲有個首爾最大水產市場「鷺梁津水產批發市場」。新棟嘅規模超大，而且分成餐廳區（二樓）同水產區，可以喺一樓叫完海鮮，去二樓加工。
0.jpg)
不過喺咁新嘅鷺梁津水產市場隔離，側邊有個廢墟一樣嘅舊市場。首爾政府為咁咗都市計畫而起新嘅市場，但同舊攤販未達成共識，仲係僵持不下中。
0.jpg)
0.jpg)
呢度破舊不堪，甚至畀人覺得有啲危險，但確實仲有部分攤檔喺度做生意。不過主要大家都係會去新嘅鷺梁津水產批發市場。因為呢度夠光猛、乾淨（但周圍都好濕），而且價錢公開，又有唔少攤檔識講中文。大家只要叫好海鮮之後，就會有專人帶你去合作嘅餐廳開餐。
0.jpg)
不過大部分合作嘅餐廳，都會另外加收人頭費，建議大家開餐之前問清楚，以免有不必要嘅誤會。鷺梁津市場係首爾最大嘅水產市場，海鮮都好新鮮，想食海鮮嘅朋友一定要嚟食下。
5. 藥令市場（약령시장）
小Tips：首爾地鐵1號線祭基洞站（제기동역）2號出口行大概3分鐘
以上四個首爾傳統市場，都係有好多觀光客會去，而且賣美食居多。小編跟住要介紹嘅市場，就更加偏向係當地人會去嘅市場。
大家係咪好好奇，首爾有冇韓藥材市場呢？答案無有，而佢就係「藥令市場」啦！呢度特色鮮明、一嚟度就可以聞到好濃嘅藥材味，係韓國規模最大嘅藥材市場，聞到陣味都覺得健康咗～
就算冇藥材嘅相關知識都唔緊要，淨係嚟呢個市場行下，體驗呢種唔同嘅感覺都好正㗎～ 呢度喺好少人去韓國旅行會特登去搵，好少人會見識到嘅地方。
藥材好多，所以品質不一，建議大家如果真係想喺韓國買到地道嘅韓藥材，一定要搵韓國朋友一齊去問價、講價，先唔會做咗水魚。因為靠自己一個絕對講唔贏喺呢度開店嘅大叔、大媽。
咁藥令市場就淨係得咁多？NONO，藥令市場隔離仲有另一個傳統市場「京東市場」，同埋成條街都係賣人參嘅街。
咁多新鮮人參就咁擺晒喺度，價錢比想像中平超多。呢度仲係首爾最大嘅人參市場，好多有賣人參相關美食嘅餐廳，都係喺呢度入貨㗎～
藥令市場（京東市場）嘅人參鋪，仲會賣可以帶上飛機嘅乾、加工人參，有興趣嘅朋友可以喺度睇下，買一啲番去考敬長輩。
6. 東廟市場（동묘시장）
小Tips：首爾地鐵1號線、6號線東廟前站（동묘앞역）3號出口
東大門附近嘅東廟市場，有少少似跳蚤市集⋯⋯但係嚟度呢度就好似坐時光機番到過去一樣，呢個市場有好多二手貨品同拍賣，好似一個無窮無盡嘅寶庫咁。
東廟市場有好神奇嘅魔力～鍾意呢種風格嘅朋友，一定要嚟呢個同其他韓國市場好唔同嘅東廟市場行下、睇下。
比起一間間鋪頭，東廟市場更多嘅係攤檔，喺地上攤一塊布，放上嘅貨物俾客人揀，令人印象好深刻。
會有人覺得呢度大多數係老人，或者相對落後，但其實小編好鍾意呢度，因為呢度真係好有人情味～ 小編已經喺呢度行過三次，每次都買到好好睇嘅二手衫，令我更加鍾意呢個首爾市場。
東廟市場仲有啲小攤檔、雜貨店等等，佢哋會賣傳統小食同一啲好特別嘅生活小物，係咪好有探險嘅感覺呢？
0.jpg)
東廟市場冇一個好特定嘅範圍，東廟站3號出口，到5號出口個一帶，全部都係二手市集嘅分布地，大家都唔使驚迷路，因為假日晏晝真係周圍都係人。
呢種二手、復古嘅裝飾同服裝，喺韓國年輕人之間好HIT，所以有好多韓國年輕人都會喺放假嘅時候，嚟東廟市場尋寶、Shopping。
7. 南大門市場（남대문시장）
小Tips：首爾地鐵4號線會賢站（회현역）5號、6號出口
位於明洞、首爾站、忠武路附近嘅南大門市場，係個人氣好高嘅傳統市場。呢度好似啱啱介紹過嘅所有市場嘅整合，所以規模更大、要用更多時間嚟行。
好多受到大家喜愛嘅韓國傳統美食，都可以喺南大門市場搵到。相比之下，南大門美食非常經濟實惠，而且選擇多，唔帶五個胃嚟根本冇辦法每個都食到。
而且南大門市場喺韓國人之間，有一句：「如果喺呢度搵唔到一樣嘢，咁成個首爾都一定搵唔到」，可以得出南大門市場嘅規模有幾大。
呢啲美食係咪睇到已經令大家嘅口水都流晒出嚟呢？南大門市場最受到旅客同韓國人歡迎嘅刀削麵一條街同辣燉帶魚街，同埋呢度嘅乾貨。範圍唔似藥令市場，淨係得藥材、人參等，南大門嘅乾貨街可以話係諗到嘅都會有。
人參、魚片、乾冬菇、生活用品、水果乾，甚至係最近最紅嘅韓國士多啤梨乾，都係喺南大門市場開始興起。有興趣嘅朋友，都可以搵我哋代購㗎！
8. 清涼里傳統市場（청량리 전통시장）
小Tips：首爾地鐵1號線清涼里站（청량리역）2號出口
清涼里傳統市場係個冇觀光客會去嘅市場，一嚟喺附近其實冇咩景點，所以會嚟行嘅只有當地人；二嚟係呢度賣嘅嘢以新鮮食材、蔬果為主，對於外國旅客嚟講比較唔方便。
如果想體驗下韓國傳統市場嘅人，咁就好推薦嚟位於首爾地鐵1號線上嘅清涼里傳統市場～
傳統市場嘅好處，就係一年四季都會有唔同嘅生鮮蔬果可以買，而且價錢同超市比，更平，仲多咗份人情味。
不過最吸引人嚟呢個清涼里市場嘅原因，喺呢度可以用好平嘅價錢買到分裝好嘅小菜，小編去過望遠、廣藏，分裝好嘅小菜都偏貴，但清涼里傳統市場嘅小菜就比較平啦～
如果想食新鮮嘅海鮮，都可以嚟清涼里傳統市場睇下，小編住喺呢度附近，間唔中都會喺呢度買貝類番去煮湯。
清涼里傳統市場又有冇賣傳統小食嘅鋪頭呢？大家唔使擔心，喺清涼里地鐵站2號出口個度，有一啲賣韓國傳統小食嘅鋪頭，大家可以沿住條巷行，或者喺大馬路由1號行到2號出口，就會見到，呢度仲有賣杯裝炸雞，一邊行、一邊食好方便。
9. 孔德豬腳市場（공덕 족발골목）
小Tips：首爾地鐵5號線、6號線、機場快線孔德站（공덕역）5號出口
孔德市場規模雖然冇其他市場比起咁大，亦都唔算多人，但都可以感受到傳統市場嘅氣氛，新鮮水果、泡菜等呢度都有賣，而最令小編期待嘅就一定係豬腳！
孔德市場有一條專賣豬腳嘅街，唔少老闆會喺門口出嚟招客，大家只要揀其中一個覺得唔錯入去就可以。
部分鋪頭會直接將豬腳擺喺門口展示俾客人睇，甚至會直接進行加工同包裝，感覺好地道。
除咗外賣之外，呢度仲有好多餐廳喺啲小巷度，小編去嘅一間叫使宮中豬腳，都未落單，老闆已經上哂所有小菜。
小編叫嘅無半半豬腳（一般豬腳、大蒜豬腳）。雖然小編叫細份，但份量相當驚人，而且相當好食！
豬腳肉超嫩，配蒜蓉一齊食完全無得頂！另外再用生菜包埋泡菜、蒜頭、蝦醬等都好好味！
以上係韓國傳統市場總整理。想襯住喺首爾旅行個陣，行下傳統市場嘅朋友仔，應該知道呢啲市場大概係點㗎啦～ 快啲將其中一個市場放入行程啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk