新村「3000韓元炸豬排」介紹

唔加價！新村商圈3000WON炸豬排(港幣18蚊)「Cochon Tonkatsu」食記，CP值極高

정영여영이

5 years ago

Hello，大家好，我哋係由韓國人話你知每日最新韓國資訊嘅Creatrip。

＃首爾＃新村美食
＃3000韓元炸豬排
＃꼬숑돈까스＃2020

3,000Won大概等於18蚊港幣。

呢個價錢喺香港真係好難食到一餐正餐，喺韓國最多都係買到一份炒年糕，或者一杯咖啡。

不過喺首爾新村嘅「Cochon Tonkatsu」，就標榜住₩3,000就可以食到一份完整嘅炸豬排定食。喺物價偏高嘅首爾嚟講，可以話係超抵！

大家都save定呢一間餐廳，之後嚟玩去食下啦！

Cochon Tonkatsu（꼬숑돈까스）

由新村站（신촌역）2號、3號出口出之後，喺新村大街一路向前行。

經過U-Plex同紅水管後嘅右手邊，有條小分岔路口，過咗olleh之後左轉，喺巷仔右轉入去就到。

呢條巷有四間鋪，分別係拉麵店、燉泡菜店、炸豬排定食同蓋飯，四間日系餐廳，價格都非常平。

不過，目前四間店就只有炸豬排餐廳，同隔離嘅燉泡菜店有開。

呢間3000Won炸豬排店，係呢度生意最好嘅，就算已經過咗食飯時間，仍然大排長龍。

小編都等咗10分鐘先有位。而且店入面位置唔多，所以可能要同其他人搭枱（店員姨姨有少少惡）。

店入面真係好多人，小編都唔太方便影相。

呢度只有一個餐，就係炸豬排定食（₩3,000），有飯、味噌湯、小菜、沙律。如果要添飯，就要加₩1,000，飲品都係₩1,000，啤酒就₩2,000。

仲有呢度叫咗嘢食就要先畀錢，同埋只可以畀現金。

登登登凳！炸豬排上啦！

₩3,000就食到咁豐富嘅一餐，小編真心覺得CP值好高。

雖然湯同白飯嘅份量偏少，但都算OK。

炸豬排同平常食嘅唔太一樣，Cochon Tonkatsu嘅炸漿比較薄，食落偏韌，但唔柴。

以呢個價位嚟講，算係好唔錯。

記得先將芝麻磨碎，再倒落嘅醬到，就可以變成香氣大足嘅芝麻醬。

至於味道，小編個人覺得Cochon Tonkatsu嘅餐呢……

送上嚟嗰陣係暖暖地，而唔係啱啱炸起個種，但仔細諗下唔洗20蚊港紙就食到，就覺得「好啦，算係咁」。

雖然店員姨姨嘅態度唔係好好，豬排同湯都係暖嘅，小編都係將只要₩3,000嘅炸豬排定食食晒。

整體嚟講，如果想食下平嘢嘅話，可以嚟Cochon Tonkatsu食。

呢個價錢有呢個味道，CP值真係超高！

如果經過新村，見冇咩人排隊，可以去試一試。

咁多位，我哋下次見。