韓國最常見&最稀有姓氏
韓國人都姓金？金姓人口破千萬(21.5%)！仲有啲咩稀有姓氏？개...狗？즙...嘖？
Hello，大家好，我哋係由韓國人每日提供最新韓國旅行資訊嘅Creatrip。
大家講到韓國人嘅姓氏，第一個諗起嘅應該係姓「金（김）」。不過！韓國其實都有啲令人匪夷所思、非常少人有嘅姓氏，究竟係邊啲呢？快啲睇下今期韓國文化啦！
你都想改返個韓文名？
韓國常見姓氏
韓國統計廳每15年會做一次姓名、籍貫調查，而最近一次係2015年。
根據調查結果顯示，韓國姓「金（김）」嘅人口最多，佔咗21.5%（1,068.9萬人）；
第二名係姓「李（이）」（730.6萬、14.7%）；
第三名係姓「朴（박）」（419.2萬人、8.4%）。
所以外國人成日話，點解韓國人都叫金ㅇㅇ呢？因為姓金嘅人真係有好多。另外，目前韓國一共有5,582個姓氏，係16年前嘅10倍以上。因為歸化韓國嘅人數量增加，登記嘅新姓氏都越嚟越多。
第4名 崔（최） | 233.3萬人 |
第5名 鄭（정） | 215.1萬人 |
第6名 姜（강） | 117.6萬人 |
第7名 趙（조） | 105.5萬人 |
第8名 尹（윤） | 102萬人 |
第9名 張（장） | 99.2萬人 |
第10名 林（임） | 82.3萬人 |
來源：KOSIS
韓國稀有姓氏
2015年嘅資料入面，大多姓氏其實都係外國人歸化韓國而有嘅新姓氏。幾乎冇韓國人真係用呢啲姓，所以小編拎咗2000年嘅資料嚟比較。
2000年，韓國只有289個姓氏，有以下姓氏嘅韓國人口總數唔超過300個。雖然呢啲姓好多都係歸化韓國嘅人用，但都唔會好似近期嘅新姓氏咁，只有一兩個人用。呢啲姓氏至少可以組成一個大家族！
1. 岡田（강전）：51人
原本係日本人，歸化成韓國人後嘅複姓。
2. 介（개）：86人
呢個姓嘅籍貫係京畿道驪州，喺1930年人口調查個陣，先發現嘅姓氏。相傳係中國春秋時期介子推嘅後代。對韓國人嚟講，呢個姓氏第一次聽到嗰陣，會有啲震驚。因為韓文嘅개除咗漢字係介之外，仲有「狗」嘅意思。
3. 曲（곡）：155人
呢個姓氏相傳係中國唐朝流傳落嚟嘅姓氏，籍貫主要分散喺慶北、忠南一帶。
4. 鴌（궉）：248人
呢個字其實係「鳳」嘅古字，而喺中國被稱為「奉」氏，但到咗韓國就遵循古字原則繼續留存。
5. 梅（매）：222人
呢個都係中國人歸化而有嘅姓氏。
6. 汁（즙）： 86人
呢個姓氏其實係北朝鮮姓，源於日本殖民時期，日本人同韓國人通婚而有嘅姓。隨住韓國獨立，呢個姓氏歸化成韓國國籍，最初分布喺北韓咸鏡北道一帶。
呢個姓氏對韓國人嚟講都非常新奇，因為즙嘅發音其實就有啲似韓國人成日講嘅「嘖」。
7. 森（삼）： 49人
籍貫喺慶南嘅森氏，係1960年人口調查第一次出現嘅姓氏。
8. 小峰（소봉）：18人
9. 魚金（어금）：51人
10. 邸（저）：48人
11. 郝（학）：101人
呢四個姓氏籍貫不詳，推測源於中國。
12. 夜（야）：180人
夜式源於京畿道坡州、開城（北韓）等地，推測係高麗王朝時正三品官員嘅後代。有趣嘅係，야喺韓文入面係等於「喂」。
13. 長谷（장곡）：52人
日本歸化姓氏。
14. 椿（춘）：77人
呢個字讀「春」，比起韓國，好似喺日本更常見？其實呢個姓嘅籍貫係源於京畿道嘅南陽。
15. 彈（탄）：155人
呢個就係「防彈」嘅「彈」嘅韓文。姓氏源於北韓黃海道嘅海州、南韓慶南一帶，係1930年第一次發現嘅姓氏。
韓國稀有姓氏其實唔少喺韓文都有同音字，但登記嘅漢字比較特別。唔知大家有冇識身邊朋友係呢啲姓氏呢？歡迎大家留言話俾我哋知。
你都想改返個韓文名？
如果有更多想知嘅內容，都可以隨時留言或者dm話俾我哋知：）
Instagram：creatrip.hk