韓國決定唔公開患者路線

確診者去過 Gay Bar 一事曝光...大眾安全定個人私隱重要？韓國決定唔公開患者住所同工作地點

Jeongyeong Yeo

5 years ago

Hello，大家好，我哋係由韓國人話你知每日最新韓國資訊嘅Creatrip。

＃武漢肺炎＃韓國新聞
＃隱私權＃公開患者路線

韓國確診病例突破8千！

早前，韓國政府堅持以「公開、透明化患者嘅移動路線」，嚟提醒曾經去過嗰啲地方嘅人。

不過，隨住有越嚟越多患者嘅路線，涉及婚外情、同志酒吧等資訊，隱私權嘅討論再度浮上檯面。

Creatrip為咗要嚟韓國旅行嘅大家著想，會持續更新相關新聞（點我）。

大家唔需要太過擔心同緊張，記住出門口一定要戴口罩同勤洗手！

來源：NEWS1

先前，韓國政府為咗得到確診者嘅移動路線，會收集該患者發病前後嘅信用卡、電信訊號移動紀錄。

之後會全部公開，話畀全韓國人民知，喺某個時間點去過嗰個地方嘅人要留意。

但係呢啲資訊，無疑係將患者嘅相關移動路徑、私生活等私隱，話晒畀所有人知。

上星期，有確診者曾經去過同志酒吧嘅移動路線被公開，又有確診者喺旅館埋單，婚外情曝光等等。

再次喚醒大眾對於「個人隱私洩漏」嘅問題。

資料照片（與本篇無關）

雖然韓國由第一單病例開始，就有人提出呢一點，但就一直冇正視。

中央防疫本部長（來源：medipana）

03月14日起，中央防疫對策本部宣布公開患者動線嘅新方針。

佢哋認為：公開患者嘅移動路線，其實係侵害人權嘅一種，同時建議各級政府、自治團體重新擬定公開嘅標準。

各地方嘅自治團體為咗保護該地區嘅居民，都會詳細公開確診者移動路線，屋企位置同工作地點，其實好容易知道確診者嘅身分。

由而家開始，為咗保護患者私生活，相部門關唔會公開患者嘅屋企同工作地點，移動路線亦將根據確診者嘅情況，先決定公唔公開。

來源：연합뉴스

例如「該確診者全程配戴口罩，喺地鐵站出口出嚟，停留喺便利店前等巴士」。

呢啲移動路徑，就唔會公開。因為患者全程戴口罩，只係等巴士，咁地鐵站同便利店就唔算高風險。

不過，如果該確診者上咗巴士後，有除過口罩，該巴士編號就會公開，亦會喺CCTV確認其他乘客有冇全程戴口罩，會唔會有感染風險。

修改之後嘅公開路徑範圍，會縮細到症狀出現嘅前一日到確診當日，或者係檢驗前一日到確診當日。

來源：연합뉴스

防疫對策本部部長表示，確診者嘅屋企人、同居者、熟人等密切接觸者感染機率好大，但電影院等地方接觸而染病嘅可能性，相對就唔太大。

所以，政府會喺監視系統入面，確認患者會唔會有機會傳染畀大量人，先決定係咪公開嗰一段路徑。