韓加濕機殺菌劑事件
防疫都要注意！韓國「加濕機殺菌劑」曾奪1千5百條人命，全韓國至少227萬人受害
Hello，大家好，我哋係由韓國人話你知每日最新韓國資訊嘅Creatrip。
＃韓國文化＃故事
＃歷史真實事件
＃消毒劑＃加濕器
大家喺秋冬嚟韓國個陣，應該都有見過E-mart、樂天超市入面有個區會擺滿各類加濕器。
因為韓國天氣乾燥，好多屋企都會擺一部加濕器，以免皮膚、鼻腔太乾。
不過，近期隨住肺炎疫情響起警報，各種聲稱殺菌嘅商品上市。
唔少人都諗起之前發生喺韓國，帶走好多條人命嘅「消毒劑加濕器」事件。
究竟發生咗咩事？等小編帶大家回顧一下。
✨馬上Follow我哋IG
instagram.com/creatrip.hk
韓國殺菌劑加濕器事件
喺加濕器入面加殺菌劑，透過水份揮發，可以清潔加濕器嘅內部。
呢項產品喺1994年韓國第一次上市，而喺十幾年後嘅2011年4月，一個叫Oxy Reckitt Benckiser嘅牌子先被發現同感染肺病嘅死亡病例有關。
當時喺樂天超市、homeplus都有得買呢款Oxy加濕器，算係非常普及嘅牌子。
推測喺上市嘅十幾年入面，賣咗超過60萬套。
其實由2006年起，好多人喺不明原因下爆發急性肺炎，一般成人因而肺部嚴重損傷，更造成孕婦、嬰幼兒死亡。
呢啲病例令大型醫院覺得相當離奇，一度以傳染病方向調查原因。
直到2011年累積更多病例，先令醫院同政府聯合起嚟，進行詳細調查。
呢類「肺炎病毒」，令當時嘅韓國一度人心惶惶，直到保健福祉部搵出病患嘅相同點，先發現佢哋都用咗Oxy加濕器。
相關部門將加濕器拎去進行動物測試，確認佢添加嘅消毒劑，係肺纖維化、嚴重損傷嘅主因。
事後回顧，2006年起爆發嘅不明肺病，令好多人開始恐慌，更加重視空氣清潔，所以令消毒加濕器銷量更好，成為一個惡性循環。
最終喺2011年個陣，肺病死亡人數多到當局唔可以唔正視，先開始著手調查。
根據調查顯示，呢款加濕器上市至停售至少賣咗60萬套，受害人至少有227萬名。
唔少人因而苦受各種肺部損傷問題所困，但政府一開始冇好好調查，只係將病例視為一般肺病或者其他生理因素所致。
後來，PHMG（聚丙烯醯胺）磷酸鹽同PGH（氯化二甲基苯）被確認係致死性物質。
因為呢類物質係由SK化工（sk chemical）製造提供，令SK受到唔少輿論攻擊。
不過，韓國政府冇好似其他國家咁，立法禁用呢類對人體有害嘅物質，受到國民抨擊。
甚至喺2012年都只係對販售該違法加濕器嘅企業，同埋上架嘅零售商，處以5,200萬韓元嘅罰款。
同年，8名因肺病罹難嘅家屬提出訴訟，但2013年調查機關就以「受害調查結果出爐之後，先受理刑事案件」嘅理由駁回起訴。
韓國政府喺2013年至2015年進行過兩次調查，530個調查申請，就只有221名患者被判定為受害者。
甚至喺2016年先成立專案調查組，起訴Oxy公司、零售商同SK化工相關人員。
來源：머니투데이
另外，2017年二月，韓國政府先正式制定《加濕器殺菌劑受害救濟特別法》，八月開始實施，並向受害人道歉。
時隔三年幾，2020年03月06日，國會喺總人數180名議員，179名通過嘅情況下通過《加溼器殺菌劑受害救濟特別法 部分修正法案》，放寬受害者嘅舉證證明、救濟範圍等等，預計透過呢個修正案可以一併將哮喘、肺炎、支氣管擴張等疾病，納入受害範圍。
由2011年走到2020年，呢啲受害者要行嘅路仍然好長。
備註：截至2020年02月為止，一共收到6,739名受害者、1,528人死者嘅救濟申請
✨馬上Follow我哋IG
instagram.com/creatrip.hk
| 其他延伸閱讀 | |
 南韓史上大意外 |  疫情下的韓國 |