韓國情人節整理

Hello，大家好，我哋係由韓國人每日提供最新韓國旅行資訊嘅Creatrip。

2月14號係全世界都過嘅情人節，唔知今日大家有冇俾幾多對情侶閃親呢？鍾意過節嘅韓國人唔只係過2月呢個情人節咁簡單，每個月幾乎都有特別嘅日子要慶祝。除咗大家都知嘅2月14號情人節之外，仲有邊啲節日係單身狗要小心㗎呢？一齊睇落去啦。

備註：本文係由馮筱芹 풍소근 Gin Fung 中韓翻譯한중통번역2月14號貼文經授權後寫成，韓網來源請撳我。

韓國特別情人節

1月14日號 日記節

作為一年嘅開始，韓國情侶會送一本一年嘅日記俾對方，而且會喺入面標記生日、紀念日等重大節日，算係提醒雙方愛情紀錄嘅禮物。

2月14號 情人節

目前最多人認為，情人節嘅由來係3世紀一個叫做Valentinus嘅天主教神父，因為違反皇帝命令，私自幫年輕人證婚而被處死，後人為咗紀念佢對其他人愛情嘅犧牲，將佢嘅忌日，2月14號訂為情人節。

呢一日係全世界最多地方會慶祝嘅情人節，除咗用甜蜜嘅朱古力作為媒介，向鍾意嘅人表白之外，韓國人專屬嘅特色禮物都越嚟越多。

3月14號 白色情人節

只有東方國家先有嘅白色情人節，普遍認為係男性回禮俾鍾意嘅女性，一般韓國人認為，白色情人節視為男方係咪接受女方表白，不過基本上都變成情侶放閃嘅節日。

4月14號 黑色情人節

呢一日應該有好多人知，4月14號除咗情侶會放閃，對於單身狗嚟講，係一個互相撫慰孤獨、安慰寂寞嘅日子，所以會用黑色做代表色，就連食嘢都要食黑色嘅炸醬麵。

5月14號 Yellow Day & Rose Day

其實有一種講法係春天嚟到，喺百花齊放嘅春天想吸引其他人嘅目光，就係要著黃色。而五月同時亦係韓國玫瑰盛開嘅季節，好適合情侶出門野餐，享受春天氣息。

6月14號 Kiss Day

對於順利度過5月Rose Day嘅情侶嚟講，6月就嚟到KISS DAY，係個放閃嘅日子，一定要去夠浪漫、有氣氛嘅地方拍拖。

7月14號 銀色日

韓國情侶會喺呢一日，將另一半介紹俾屋企人或者好朋友識，而長輩仲會幫情侶俾嗰日拍拖嘅洗費。

8月14號 Green Day

炎熱嘅夏天，情侶喺山林約會，吹住涼風，欣賞周圍嘅風景，對韓國情侶係個浪漫嘅日子，不過冇愛人嘅單身狗……就只可以飲下燒酒，撫慰孤獨啦ㅠㅠ

9月14號 Music Day & Photo Day

喺Club向其他朋友介紹自己嘅戀人，都係情侶關係好重要嘅一日！不過呢一日都好適合單身人士，喺Club呢類地方識吓新朋友。另外秋天將至，Photo Day嘅意思就係同戀人合相，將兩人嘅相各自收好，令彼此嘅關係更加深厚。

10月14號 Wine Day（Red Day）

秋意逐漸濃厚，同情人一齊飲住紅酒，喺一間氣氛好嘅餐廳共渡美好嘅晚上，甚至可以開始討論兩個人嘅未來...

10月24號 蘋果日

「24日」係「둘(2)이（兩人） 사(4)과（道歉、蘋果）한다」嘅引申意義。如果朋友或者戀人之間有咩誤會，就喺呢一日解開心結啦！

11月11號 Pepero Day

1111喺韓國唔係光棍節，而係Pepero Day。除咗情侶之間送朱古力之外，朋友之間仲會互送Pepero朱古力餅，祝福彼此可以好似「1」咁瘦。