松坡渡口美食店 Mija Sikdang
近期SNS大熱美食店「Mija Sikdang」，小編實地拜訪話比大家知好唔好食！
哈囉，大家好，我哋係由韓國人話你知每日最新韓國資訊嘅Creatrip。
＃松坡渡口 ＃Mija Sikdang
＃食好西 ＃SNS大熱
＃明太子炸豬排
喺蠶室附近有一條街道叫做「松理團路」，佢可以話係最近最多韓仔或韓妹打卡新熱點！
呢條街可以話係匯聚咗好多間特色cafe同餐廳，平日唔少打工仔放工會嚟hea，
假日仲誇張，有時某啲餐廳更要等成個幾兩個鐘先入到去。
今日要為大家介紹嘅呢間，就係近期大熱美食店「Mija Sikdang」啦！
只要喺IG打「송리단길맛집」，佢永遠都會係榜首，而今日小編就實地拜訪，到底佢係唔係真係咁好食同值得去？
✨馬上Follow我哋IG
instagram.com/creatrip.hk
松坡渡口美食店：Mija Sikdang
- 地址：서울 송파구 오금로18길 14
- 時間：每日 11:30 - 20:30 (14:30~17:30 break time )
松坡渡口1號出口
出到嚟之後直行 (正面圖)
去到十字路口見到GS25轉右直行
見到72420店轉右直行
行前少少見到洗衣房隔離就係Mija Sikdang
Mija Sikdang 正門
Mija Sikdang 探訪記
呢間Mija Sikdang係近期SNS大熱，平日去可能都會好啲，但係只要到咗假日至少就要等一個鐘起！
小編今日就係平日1點半左右去到，都要喺門口等咗陣先入到去。
要喺度提提大家：呢度係唔可以自己拉門入去拎位，大家只要喺門口右手邊櫈位等，職員就會安排大家入去。
入到去小編見到真係唔多位只得5張檯，如果多人一齊去可能就要等耐啲。
難怪假日要等一個鐘或以上:(
呢度有最低消費：一人最少要點一份餐，因為小編3個人去就點咗3個Set，
呢度嘅代表分別係明太子炸豬排同蟹柳菠菜咖哩，同時小編再點多咗個明太子牛油果蛋飯。
首先為大家介紹佢哋最出名嘅明太子炸豬排先。
普通明太子食就食得多，但炸嘅明太子真係第一次試，所以既期待又興奮XD
一上到檯，小編已經比佢嘅香味吸引，職員話如果點墨西哥胡椒醬一齊食會更好食！
墨西哥胡椒醬少少辣，夾住一齊食真係好正，外脆內嫩細緻得嚟又唔油膩，整個口感好特別！
如果大家會去，小編真係必推大家食呢個！
另外一個嚟到必食大熱就係呢個蟹柳菠菜咖哩。
真心講句...小編覺得呢個相對嚟講真係太過平凡，唔太特別... :(
廚師係用咗日本咖哩去煮，味係好食唔會太辣，但係材料真係比得太少。
可能食幾啖，材料猜哂只剩咖哩。 呢個真係唔太推....
如果同蟹柳菠菜咖哩比，小編會更推大家點呢個明太子牛油果蛋飯。
蛋夠滑、牛油果味夠鮮，兩樣再加埋明太子一齊食，完全係入口即溶！
因為飯入面再加咗大蔥，所以味道會更香更好食！
另外，比大家參考一下呢度其他Menu， 因為有畫埋圖，相信大家應該都會睇得明XD
除咗有主菜之外，呢度亦有米酒、啤酒同洋酒。
小編覺得3款入面炸明太子豬排係最好食而且最推，價錢都算OK唔太貴。
但唯一呢度有個缺點就係位太少，而且要等太耐。
當然如果大家去開松理團路，又唔知食咩好嘅話，見到唔需要等嘅都可以去試下呢間近期大熱餐廳。
✨馬上Follow我哋IG
instagram.com/creatrip.hk
| 其他延伸閱讀 | |
 79 Founyard Bakeshop |  樂天超市必買品 |