Hello，大家好，我哋係由韓國人每日提供最新韓國旅行資訊嘅Creatrip。
鐘路3街可以話係隱藏咗好多美食店，因為近鐘閣、乙支路、光化門等地區，加上又係商業區，所以多打工仔嘅附近一定會有好多食店。聖經餃子料理專門店只要一到Lunch time 就會爆滿，佢哋之所以咁出名，係因為餃子每日都新鮮包，同時夠大隻！
同時每日只要到12點，大家都可以睇到佢哋現場包餃子。如果係鍾意食餃子嘅你，就唔可以錯過呢到啦！
鐘路3街美食「聖經餃子料理專門店」資訊
- 地址：서울 종로구 수표로 88
- 營業時間：10:00 - 21:30
鐘路3街美食「聖經餃子料理專門店」推薦理由
- 餃子每日都係新鮮包，每隻都好大同時餡料夠多，大家一定會食得飽。
- 呢到湯底有分辣同唔辣，大家只要根據自己喜好揀就可以。
- 只要一到Lunch time就會坐滿，鍾意食餃子嘅你絕對唔可以錯過！
鐘路3街美食「聖經餃子料理專門店」優惠
- 埋單嘅時候向職員出示優惠券，只要叫餃子鍋就有9折優惠。
- 唔需要事先預約。
- 如果用coupon嘅時候有任何疑問，都可以send email到help@creatrip.com查詢。
鐘路3街美食「聖經餃子料理專門店」菜單
菜單 | 價錢 |
| 하얀전골 白湯餃子鍋 (至少要叫2人份) | ₩11,000(1人) |
| 빨간전골 紅湯(辣)餃子鍋 (至少要叫2人份) | ₩11,000(1人) |
| 만두육개장 餃子牛肉湯 (附白飯) | ₩9,000 |
| 떡만두국 年糕餃子湯 (附白飯) | ₩9,000 |
| 손만두 手工餃子(6粒) | ₩8,000 |
| 물막국수 蕎麥冷麵 | ₩9,000 |
鐘路3街美食「聖經餃子料理專門店」介紹
唔知大家鍾唔鍾意食餃子呢？小編本身對餃子都係一般般，但係喺韓國生活耐咗，不知不覺間成日食就愛上咗！可能因為韓國餃子款式多，可以有好多選擇。
小編今日要介紹嘅呢間可以話係上班族至愛，唔單止係因為平，每隻餃子都勁大粒，保證大家一定食得飽！
真係唔係講笑，一到咗Lunch time，成間鋪頭就會坐滿哂人，大家就知佢有幾咁好食！小編見到除咗會有一大班人一齊去之外，亦有唔少係一個人去。
呢度設有Self Bar，大家想食多啲小菜可以喺到再拎。
小編為咗話俾大家知邊款最好食，紅湯同白湯都各叫咗一份，首先為大家介紹紅湯先。
只要叫紅湯就會有圖入面嘅嘢食，大家睇落去係唔係覺得一啲都唔辣呢？其實只係因為仲未滾開炸！只要食一啖大家就會知佢個辣味嘅後勁有幾勁。
一上到檯職員會先叫你冚蓋煮，等到滾嘅時間先食菜，食菜嘅同時就要將餃子放入去煮。
平時煮任何食物，好多時都會提供食物夾，但呢度放餃子嘅時候會用膠手套。因為餃子好大粒，如果用夾去夾會好易令餃子變形同散開，小編覺得呢一點真係好貼心，超值得加分！
大家睇唔睇到餃子有幾咁大粒呢？呢度嘅餃子有分兩款，一款係豬肉餃，另一款係泡菜餃。如果係叫兩人份，一上檯個陣每款都會有各4粒。
大家可以落單嗰陣，根據自己喜好同職員講要邊款，例如：每樣4粒、全豬肉餃或全泡菜餃都可以。
大家可以睇到，每一粒餃子都有好多餡，而且皮一啲都唔厚，啱啱好！如果大家問小編鍾意食邊款多啲⋯⋯小編會比較推薦豬肉餃～
食餃子嘅同時，大家亦可以將刀削麵放入去一齊煮，麵夠煙韌，食落去好爽口，而且同個湯好夾，超推薦！
第二款要為大家介紹嘅係白湯。
其實紅湯同白湯材料無分別，白湯除咗唔辣之外，比較特別嘅係同紅湯嘅煮法完全唔一樣。首先一開始放餃子入去煮，煮之前一定！一定！一定！要先攪吓佢，然後再冚蓋煮。
大家睇唔睇到餃子嘅光澤感！小編打到呢度又開始餓啦....開始食之後，可以加埋菜同肉一齊煮。
職員同小編講，紅湯可以任何調味料都唔加，但係白湯嘅話食肉嘅時候一定點豉油。呢度嘅豉油同香港唔同，有種酸酸甜甜嘅口感？同肉又真係幾夾！而且雖然係白湯，但係一啲都唔會覺得無味，而係有種好清好鮮嘅味道。
走之前，竟然俾小編見到呢一幕！聖經餃子料理專門店每日只要到12點，就會有職員喺到現場包餃子。為咗公平公正，佢哋每包一隻餃子都會秤過，每一隻都確保係62g。大家絕對係可以食得安心又放心！
鐘路3街美食「聖經餃子料理專門店」前往方法
鐘路3街15號出口出嚟。
出嚟之後直行。
去到十字路口之後轉左。
直行大約30秒就會見到聖經餃子料理專門店喺左手邊。
點先可以享有鐘路3街「聖經餃子料理專門店」9折優惠呢？
現場消費Click下面網址下載Creatrip專屬優惠券，出示畀店員睇即可享有獨家優惠。
以上係鐘路3街「聖經餃子料理專門店」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
