弘大美食 | Butter Milk
弘大超人氣排長龍Brunch餐廳！未開門已經要排隊咁巴閉？
Hello，大家好，我哋係由韓國人每日提供最新韓國旅行資訊嘅Creatrip。
相信好多遊客去韓國揀酒店都會係弘大呢邊，但弘大有冇邊間早午餐店係好食？就等吃貨小編今日為大家介紹呢一間超受歡迎嘅「Butter Milk」啦！
佢人氣高到未開門已經要排隊？到底點解佢會咁好食？有興趣嘅朋友就繼續睇落去啦！
弘大美食 | Butter Milk
- 地址：서울 마포구 와우산로 130
- 時間：10:00 - 17:00 (材料用完會提早閂門)；逢星期三休息
呢間鋪頭10點開門，小編10:10去到已經開始要排隊 (人氣真係好誇張！)。出面大約有9張櫈，大家可以坐住等，老闆亦都會好貼心咁比張毛氈等緊嘅客人。
等嘅期間，大家可以先睇下Menu。因為只可以叫一次嘢食，冇得加單，所以大家一定要叫齊啊！
小編大約等咗一個鐘10分鐘左右，終於入到去啦！入面位唔係好多只得6張枱，因為係即叫即整，所以都要等多陣先食到 但為咗食好西！係值得㗎！
因為呢度個廚房係開放式嘅，所以等緊嘅期間，大家都可以聞到勁香蛋味同鬆餅味。廚房內部唔比影相，小編淨係影到一小部分比大家睇。
等咗咁耐小編點嘅餐終於嚟啦！小編叫咗佢哋最出名嘅Ricotta-cheese pancakes set，同埋期間限定嘅士多啤梨芝士蜜糖乳酪沙律。
食物一上到枱，鬆餅真係好香。鬆餅厚度適中，感覺好軟熟~
Ricotta-cheese pancakes set 包含兩塊鬆餅、煙肉、炒蛋、蔬菜同薯仔沙律。鬆餅甜甜地一啲都唔乾，好鬆軟，小編覺得加蛋同煙肉一齊食最夾。而薯仔沙律唔係淨係得薯蓉，仲有啲大粒少少嘅薯仔，食落去好有口感。
整體嚟講都唔錯，有驚喜，唔怪得咁多人會為咗食佢而排隊。
小編另外點嘅士多啤梨芝士蜜糖乳酪沙律係期間限定 (11月~5月)，士多啤梨好新鮮，但唔算話好甜或好酸。因為有芝士、蜜糖同乳酪，一開始以為會好漏，但點知食食吓都覺得都幾開胃。
整體嚟講，小編覺得都算唔錯，幾好食，但唯一唔好係店舖太細，所以要等好耐 如果大家有興趣想去，小編建議可能要開門前先喺門口等一陣，咁就可以成為第一位客人。如果唔係就要好似小編咁，可能要等一個鐘先入到去㗎啦！
希望大家會鍾意小編呢次嘅分享，留言話俾我哋知你鍾意去邊間Brunch Cafe啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk