益善洞Cafe | MIL Toast House
期望越大，失望越大？人氣蒸籠吐司又係咪真係咁好食？小編誠實作答！
Hello，大家好，我哋係由韓國人每日提供最新韓國旅行資訊嘅Creatrip。
益善洞出名多特色Cafe，呢間「MIL Toast House」更係大排長龍，朝早11點去到，已經開始要排隊等入去，點解佢會咁出名？又係咪真係咁好食？今日小編親自去咗試食，想知道小編嘅誠實食評就要繼續睇落去啦！
益善洞Cafe「MIL Toast House」
- 地址：서울 종로구 수표로28길 30-3
- 營業時間：每日10:00-23:00
小編個日朝早11點就去到呢間最近超Hit嘅「MIL Toast House」，見到咁多人排隊，小編都好期待！
因為天氣凍加上多人等嘅關係，店員都好親切咁為等緊嘅客人送一杯熱茶，同時大家可以係窗邊睇到甜品嘅製作過程。
大約等咗20分鐘左右就入到去啦！大家睇上面嘅圖片就知道呢度幾受歡迎啦！
入到去之後小編即刻叫咗佢地最出名嘅蒸籠麵包同兩杯飲品。
栗子蒸包
粟米蒸包
蒸籠麵包有3款口味可以選擇(栗子、粟米、南瓜)，小編就揀咗粟米同栗子麵包！講真個句，可能真係期望越高，失望越大，呢度嘅嘢食真係令小編有啲失望，同想像中相差得有啲遠... 唔可以話佢好難食，但小編覺得有啲太乾。
兩款比較起上嚟，粟米相對上好食啲 (可能因為有沙律醬，無咁乾)，但栗子真係完全大失望！太過乾！唯一加分可能就係啲栗子夠甜。
如果大家去到都係想叫栗子味嘅話，小編建議大家可以揸啲牛油係面，會冇咁乾，不過牛油偏甜。
飲品方面，小編叫咗兩杯，第一杯係Almond cream mocha，上面cream部分好甜唔夠紮實，而且咖啡有啲酸，凍咗之後變得有啲苦，唔太推！
另外，小編仲點咗好多客人都點嘅士多啤梨鮮奶。嗯...小編覺得有啲太稀，唔夠濃郁，奶味重過士多啤梨味，都係唔太推薦。
最後小編覺得，可能真係期望越大，失望越大，佢哋嘅甜品同飲品都唔算平，但味道就...真係唔太成正比。如果大家之後會去試，都可以話比小編知您哋嘅感覺係點。
益善洞Cafe「MIL Toast House」 菜單
唯一可以讚嘅就係佢哋除咗有韓文Menu之外，仲有英文Menu，同職員溝通完全唔會有問題。
益善洞Cafe「MIL Toast House」前往方法
鐘路3街4號出口出嚟轉左過對面。
到第一個十字路口，見到首飾鋪轉右。
直行會經過望遠洞Tiramisu。
去到盡頭轉左直行。
見到鴨頭直行就會見到㗎啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk