弘大「弘益醬蟹」介紹
CP值超高！弘大「弘益醬蟹」放題，嚟韓國時千祈唔好錯過！
Hello，大家好，我哋係由韓國人每日提供最新韓國旅行資訊嘅Creatrip。
韓國有唔少特色美食，雖然睇落去有啲得人驚，但好食程度同擁戴者，一啲都唔輸蝕。其中名列前茅嘅特色美食，就係韓國醬油蟹同醬油蝦啦，小編今日試咗弘大最出名嘅「弘益醬蟹」俾大家參考，究竟味道係點？快啲睇吓小編嘅誠實食記啦。
弘大美食 | 弘益醬蟹（홍익게장）
- 地址：서울 마포구 성산동 232-12
- 營業時間：11:30 - 22:00（Break Time 15:00 - 17:00 ）
- 小Tips：弘大入口站1號出口出嚟之後直行，喺BT21店轉右，直行大約10分鐘，喺GS加油站對面就係弘益醬蟹。
提提大家，因為有Break Time（15:00 - 17:00），所以大家唔好太晏先過去，如果唔係店員有可能唔俾你入去食。小編係平日1點左右到，唔會話太多人，唔需要等。
弘大「弘益醬蟹」有分一般坐席同地席，小編係坐地席，好有傳統嘅感覺，但就會坐得有啲腳痺。
呢度有三款放題俾大家揀，小編揀咗「醬油蟹+醬油蝦放題」（₩24,000），另外仲有₩26,000嘅「醬油蟹、辣醬蟹、醬油蝦放題」同₩22,000嘅「醬油蟹+辣醬蟹放題」 。前面兩款都會送一鍋花蟹湯，而最平嗰款就冇花蟹湯同醬油蝦，大家可以根據個人口味去揀。
每個人都會附贈一碗紫米飯，而且醬油蟹同醬油蝦好快會送到上檯，即刻可以開餐！
啱啱提到花蟹湯只得一鍋，會有少少辣，不過對小編嚟講就覺得還好，如果想食多啲嘅話，可以再另加拉麵落去煮。
除咗蟹籽同泡菜等可以refill嘅小菜，弘大「弘益醬蟹」會每檯再送一份蒸水蛋同泡菜煎餅（唔可以refill），真係好豐富！
大家睇吓呢個咁鮮美嘅螃蟹，係唔係好心動呢？小編一開始其實都唔敢食醬油蟹，但食過一次之後，嗰種味道就令人一世難忘。
呢到仲會另外附上鉸剪同手套，方便大家享用醬油蟹。呢度雖然係任食餐廳，大家可能會覺得質素參差，但呢度嘅海鮮真係一啲腥味都無，完全唔需要擔心。
蟹膏就當然要配飯一齊食啦！大家可以好似韓國人咁，將紫米飯放落蟹蓋之後，同蟹膏、醬油撈埋一齊，大大啖咁食佢落肚，鮮甜嘅蟹膏味，真係令人食到番尋味。(太幸福啦！！)
而醬油蝦呢，小編鍾意將佢剝殼之後，加飯同蟹籽，用紫菜包住一齊食。
小編有注意到蝦腸都有被挑出嚟，所以生食嘅時候，都唔會有腥味，呢點「弘益醬蟹」做得都幾唔錯，加分！
如果食唔飽，只要撳檯上嘅鐘，店員就會即刻過嚟幫你加一盤醬油蟹同醬油蝦，動作超快。
就連蟹腳裡面都係滿滿嘅蟹肉，果然嚟呢到係無錯㗎 ！
令人一試難忘嘅醬蝦，雖然只叫咗一般嘅醬油口味，但都已經好鮮甜，好滿足。小編兩個人食咗三輪，先心滿意足咁離開。
不過要注意嘅係，蟹上面嘅線可能會出現冇清乾淨嘅情況，大家食嘅時候要留意一吓，唔好唔小心食咗落肚。
整體嚟講，弘大呢間「弘益醬蟹」算係CP值非常高，小編兩個人食咗大概10隻醬油蟹，算係超回本，雖然食到最後有啲膩，但都算好食。
店家提供嘅垃圾桶有特別提醒，只可以掉蟹殼同蝦殼，唔好掉紙巾入去啊。
以上係小編最新探訪弘大「弘益醬蟹」之後嘅感想，至於衛生部份，小編算係腸胃唔好嘅人，但係當日食完醬蟹之後成日完全無肚痛，所以大家可以放心！
希望今次呢篇文可以幫到之後要嚟弘大食醬油蟹嘅朋友啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk