弘大「豬腳小姐」食後感

• 地址：서울 마포구 어울마당로 123-1
• 營業時間：12:00至04:00

由弘大8號或9號出口出嚟，喺弘大最熱鬧餐廳商街就會見到弘大豬腳小姐嘅身影，而且因為太熱門，短短一條街就連續開咗兩間店面係隔離。

基本上兩間店都係一樣，如果用餐時段人太多，就需要係門口前抽號碼牌等位，但如果唔洗等嘅話，只要好似小編一樣推開門，入去同店員講幾位就得㗎啦。

店入面大小一般，如果多人一齊去嘅話，絕對係需要等，但如果係兩三人、四五人，基本上只要有位就可以直接入座。

小編點咗中份蒜味豬腳（마늘족발/₩37,000），跟住會附上一份湯同麵、沙律同其他小菜。

湯嘅味道就係一般泡菜湯，唔會到非常辣，只要滾起將麵放落去煮熟就好，都尚算OK。

至於豬腳送到上檯嘅時候，真係令小編有啲surprise，雖然係兩個人點中份（最細尺寸就係中，最大為大份），但份量多到有啲誇張，蒜蓉醬淋喺上面，令人好好奇到底係咩味道。

食第一啖嘅時候超乎想像，幾乎無蒜頭辣味，只保留蒜鹹香同醬料嘅甜，整體嚟講，啱啱入口係甜，但食到最後會變到有啲鹹。

亦建議大家可以用沾其他醬一齊食，小編最鍾意中間嗰隻醬，食嘅時候稍為中和返豬腳嘅鹹味。

食完跟餐嘅麵、沙律同小菜都唔飽嘅朋友，可以好似小編咁加個鮪魚沙律醬手抓飯，戴上膠手套將飯整成一個個飯糰就食得啦。

比起其他美食，弘大「豬腳小姐」嘅豬腳確實係有一定水準，可能因為搭配咗蒜頭醬而有小小特色，但小編覺得實在有啲太過獎啦，哈哈。

豬腳係好食，但平心而論，食到最後會有啲膩。可能因為兩個人點一份，份量有啲太多（原份量適合3人）。

雖然係咁講，但小編都幾乎都食哂，算係小編食過嘅觀光客美食當中，少數可以稍為理解點解會咁受歡迎嘅鋪頭。

以上係小編最新探訪弘大「豬腳小姐」之後嘅感想。或者係期望太高，導致食嘅時候覺得有啲普通，如果無期望過，可能會有中上水準。本身唔太愛豬腳嘅人，可能會覺得前三啖幾好食，但之後豬味太重，就會覺得還好。

歡迎大家都同我哋分享一下你地嘅感想，或者有邊間希望小編去試食，提供誠實食記，都歡迎留言比我哋。

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購