2026韓國清州機場完整攻略（來回首爾交通、退稅、設施、換錢等）

Hello，大家好，我哋係由韓國人每日提供最新韓國旅行資訊嘅Creatrip。

由香港飛首爾直航機而家只可以飛仁川國際機場，但其實首爾附近仲有一個叫「清州國際機場」嘅地方，距離首爾市區只要個半鐘車程，而且因為人流比仁川機場少，出入境通常會快好多。

好可惜而家香港快運來回香港同清州機場嘅航班停飛，但如果日後復航，或者大家由台灣、日本等地轉飛清州，都可以先參考呢篇交通與機場攻略，由清州機場去首爾交通、換錢、退稅、設施同餐廳資訊都一次過話你知，就算第一次飛清州都唔會手忙腳亂。

韓國清州機場完整攻略

清州國際機場係邊？

• 韓文：청주국제공항（機場代碼CJJ）
• 地址：충북 청주시 오창대로 980

清州國際機場位於韓國忠清北道，係韓國中型機場之一。雖然規模比仁川機場細，但有非常多亞洲航線，尤其係Aero K航空，絕大多數嘅清州航線都係由他們包辦。

而香港快運喺2025年10月尾決定停飛來往香港同清州嘅直航航班，所以香港朋友們基本上都唔會點去到清州機場。不過如果今次旅行想去埋濟州島玩，大家都可以選擇去清州機場搭國內航線，唔需要同咁多人逼，更加舒服快捷。

💡小編小貼士：因為清州國際機場有宵禁，所以唔可以好似喺仁川機場咁過夜！不過亦都因為咁，大部分航班都唔會好夜起飛降落，唔需要擔心交通問題。

點解越嚟越多人揀飛清州機場？

對以首爾做主要行程嘅旅客嚟講，清州機場其實唔算太偏遠。由機場搭巴士去首爾，大約都係1.5小時左右，同仁川入市區嘅體感時間差距未必真係好大；但清州機場整體規模細，流程簡單，對一啲想快啲落機、快啲開始行程嘅旅客同快閃追星族嚟講，確實幾有吸引力。

而且呢度仲有可以去仁川、天安、忠州、世宗、平澤、江陵等城市嘅巴士可以搭，唔需要經過首爾都可以去到，相當方便（不過就冇大邱、釜山等選項）。

清州機場 vs 仁川機場簡單比較

清州機場去首爾最快方法係咩？

如果你喺清州國際機場落機之後想直接去首爾，最方便嘅方法就係搭高速巴士去首爾高速巴士轉運站！

高速巴士班次時間表

※2026年4月更新，實際時間請參考現場時間表
※到達時間為估算時間，可能會因路面情況而有所變動

由清州機場前往首爾高速巴士轉運站嘅巴士每日只有5班，而且班次都幾疏吓，如果miss咗一班、或者因為上一班車客滿而搭唔到嘅話可能要等一段長時間。所以建議大家預先上網買定車飛，咁就可以確保自己上到車啦！

購票方法

清州機場前往首爾高速巴士轉運站嘅車票可以喺現場自助售票機購買，可以用信用卡付款。不過好似頭先所講，因爲班次比較少，而且連韓國人都經常由清州國際機場飛去其他國家，路線亦會停靠清州大學，所以熱門時段好容易客滿。

不過如果去官網買高速巴士車飛會出現一個問題，就係需要韓國本地身份認證，而遊客無辦法做到。為咗可以幫大家預先買定車飛，Creatrip都有提供清州國際機場來回首爾高速巴士轉運站車票代訂服務，唔需要做任何身份認證，直接用繁體中文同港幣就可以買到車飛，預先準備好更安心。

💡小編小貼士：如果你已經買咗來回清州機票，建議順便買埋巴士車飛。呢條線班次唔多，臨場排隊未必一定買到，尤其遇到週末或者假期會更加難買！

[스팟] 首爾⇋清州機場高速巴士車票

	1. 搭乘日期 / 時間
	2. 乘車QR Code
	3. 出發地 / 目的地
	4. 所需時間
	5. 巴士等級
	6. 上車月台
	7. 座位號碼

買完車飛之後你會收到一個電子車票憑證，上面會有齊乘搭巴士嘅日期、時間、出發地點、目的地同車程時間等等。攞到之後記住check清楚最上面嘅日期同時間有冇錯，搭車當日亦需要用到上面嘅QR CODE上車，上車後就要搵返自己嘅座位號碼對號入座。

上車地點

喺清州機場過完關之後喺Gate 1出，你會見到左手邊有幾個巴士站牌，去首爾高速巴士轉運站嘅巴士需要喺1號站牌上車。如果大家怕搵錯，可以確認站牌上面有冇寫住「센트럴시티(Central City)」字眼，如果有就代表你去啱地方啦！

小編親身乘車體驗

喺清州機場搭高速巴士去首爾嘅時候，只要喺開車時間5至10分鐘前喺1號站牌等就得，上車嘅時候記住跟住上面張圖咁掃描車飛上嘅QR Code，然後對號入座。

車上座位空間闊落，有雙人座同單人座，亦都有簾可以拉埋更加舒服。每個座位前方通常有Type-C充電位，如果手機臨時唔夠電，只要有帶充電線就可以即時充。

另外車上亦有提供免費Wi-Fi，如果啱啱落機、仲未開通網絡嘅話都可以暫時用住先。

當然小編會建議大家預先買定韓國SIM卡，開通網絡之後旅行會更加方便。如果你會喺清州機場入境，推薦你買由Wide Mobile提供嘅Data SIM，可以直接喺清州就攞到，唔洗等到出首爾市區先再另外去領取。

如果手機有eSIM功能嘅話都可以直接買eSIM，咁就連櫃檯都唔洗搵，開通就可以喺韓國全國各地高速上網。

[스팟] Wide Mobile 預付SIM卡（無限上網、機場/市區領取）

[스팟] WiFi Dosirak eSIM

趕唔切搭高速巴士仲有咩方法可以去到首爾？

方法一. 先去清州市區再轉巴士

如果喺清州國際機場入境後趕唔上前往首爾嘅巴士，最推薦嘅做法係先搭巴士去清州市區。大家可以喺清州機場Gate 3見到呢個螢幕，螢幕上會顯示前往清州市區嘅巴士會幾時開車，如果唔確定嘅話都可以向現場職員查詢，或者用Naver Map搜尋相關巴士路線。

喺機場Gate 3行出嚟之後過馬路去對面巴士站月台就可以搭到巴士出清州市區。大家都可以選擇搭的士，大約30分鐘就能去到清州市區（車費大約₩17,000~20,000）。

去到清州市區後，大家可以直接喺清州高速巴士轉運站搭高速巴士前往東首爾轉運站（地鐵2號線江邊站）。呢條路線係很多韓國上班族同軍人嘅返放工交通首選，所以建議大家提早買定車飛，保證可以上到車。

方法二. 去五松站搭KTX

如果你之後喺首爾嘅行程比較接近首爾站一帶，亦可以考慮先由清州機場去五松站（오송역），再轉乘KTX或者SRT入首爾。

但要留意，由清州機場去五松站嘅時候無論係搭的士、巴士或者火車都需要頗多時間，流程亦都相對複雜，所以呢個方法唔係最優先選擇，除非你本身係想直接去首爾站附近，或者啱啱配合到列車班次，否則多數都係建議搭巴士更直接。

[스팟] KTX火車票代訂服務 | 首爾、釜山、東大邱、五松(清州)、江陵、慶州、全州、浦項

清州機場→首爾交通方法簡單比較表

※上述費用為平均估算價錢，可能會因車票價錢浮動而有所不同
※到達時間為估算時間，可能會因路面情況而有所變動

💡小編小貼士：因為清州機場去首爾嘅巴士班次唔多，如果航班出現延誤，建議一落機就直接去清州市區搭高速巴士去東首爾轉運站；另外除非真係好趕急，建議千祈唔好直接由機場搭的士去首爾，車費一定會超過₩120,000（120000）！

由首爾去清州機場應該搭咩車？

如果你係由首爾出發去清州國際機場，最常見做法就係去高速巴士轉運站搭巴士！

高速巴士站前往方法

首爾高速巴士轉運站搭地鐵3號線、7號線、9號線就可以去到，喺高速巴士站(고속버스터미널역)落車出閘之後， 只要跟住指示牌上面藍色嘅BUS標誌行就會去到搭高速巴士嘅地方。

如果要去清州國際機場嘅話記住要睇清楚指示牌上面有冇寫住「센트럴(Central Terminal)」同「호남선(Honam Line)」，齋睇出口號碼可能會搞到你行咗出室外地方，到時候會更加難搵路。

💡小編小貼士：去清州國際機場嘅巴士站比較近地鐵3號線同7號線，如果搭9號線就要行多一大段路，建議大家預留更多步行時間，以免錯過上車時間！

前往上車地點路上會經過新世界百貨公司，需要行入去再跟住指示牌搭扶手電梯上去高速巴士轉運站。大家同樣認住「센트럴(Central Terminal)」、「호남선(Honam Line)」呢幾個字眼就可以去到。

上到去如果大家見到有一排螢幕顯示住各條巴士路線嘅時間表，就代表你冇行錯，順利到達首爾高速巴士轉運站！

高速巴士班次時間表

※2026年4月更新，實際時間請參考現場時間表
※到達時間為估算時間，可能會因路面情況而有所變動

由首爾開往清州國際機場嘅高速巴士班次就相對上比較多，全程大約1個半鐘頭。雖然清州機場人流比仁川少，出境流程一般都快，但如果你由首爾搭巴士過去，始終要計埋車程、交通狀況、假日塞車風險。一般嚟講建議至少確保自己喺航班起飛前4小時已經搭上由首爾出發嘅巴士會比較穩陣。

購票方法

同樣地大家可以喺現場買飛，只要去到上圖寫住「TICKETS」嘅售票處，同職員講你想去「清州機場 (청주공항)」就可以。

不過呢條高速巴士路線每逢星期一或週末連假就好容易買唔到飛，建議已經買好往返韓國清州機票嘅朋友們，提前喺Creatrip預訂車票，確保有車可以去到清州機場。

[스팟] 首爾⇋清州機場高速巴士車票

上車地點

前往清州國際機場嘅高速巴士月台通常會係Gate 10、11或者12（大部分情況下係Gate 11），建議上車前再三確認車票同現場月台資訊，以免因為臨時更換搭乘月台而錯過。螢幕上都有韓文、中文同日文標示，確認自己已經去到啱嘅月台之後就可以稍作休息等上車。

小編親身乘車體驗

確定好上車月台之後，出發時間5分鐘前就會開始開放上車，呢個時候準備好車票，上車嘅時候掃QR CODE，然後再搵返車票上顯示座位去坐。

車型同頭先喺清州機場出發嘅高速巴士一樣，座位上同樣都有Type-C充電位，小編當時搭10:50嗰班車，12:18就渠道清州國際機場，都真係幾快吓，

💡小編小貼士：首爾高速巴士轉運站出發之後下一個站就係清州國際機場，不過因為唔係終點站，大家記住要落車，如果唔係就會一路搭到去清州大學站，影響行程！

清州國際機場邊度可以換錢？

• 位置：清州國際機場1樓Gate 3
• 時間：06:00-22:00（國際航班營運時）

清州國際機場1樓有一間新韓銀行提供兌換外幣服務，但只會喺有國際航班出發嘅日子先會提供相關服務。小編去過現場確認匯率，真係同明洞差好遠，而且完全冇標示港幣匯率。建議可以先喺香港換少少錢用嚟搭車或者去便利店等處理基本開支，去到首爾先再另外去明洞找換店換。

清州國際機場VS明洞大使館匯率比較

[블로그] 2026韓國換錢總整理

清州國際機場有冇得搞退稅？

• 位置：清州國際機場1樓Gate 3，鄰近國際線入境大堂

清州國際機場冇退稅機，只可以填表之後退返落信用卡（冇得攞返現金）。只要認住CUSTOM呢個字就可以搵到辦理退稅嘅地方，現場亦都有相關說明，填好資料之後將表格放入「Tax Free」箱就得。

💡小編小貼士：如果你單筆退稅金額較高（超過₩75,000），而現場又啱啱冇工作人員，就有機會需要海關查驗商品。呢個時候就要致電5755搵海關人員協助；小編有特別問過職員當值時間，基本上有國際航班嘅時候都會有人喺度，如果真係冇都可以直接搵現場任何一位職員幫手。

[블로그] 韓國退稅總整理

清州國際機場便利設施

1. 便利店

CU

• 地點：清州國際機場1樓 Gate 2
• 時間：06:00-22:00

如果你啱啱落機想買水、零食、簡單日用品，CU已經足夠應付基本需求。如果等緊車有時間，都可以事先喺度買定交通卡，去到首爾直接用！

2. SIM卡售賣處

Wifi Dosirak

• 地點：清州國際機場1樓Gate2、3中間（CU隔離）
• 時間：06:00-22:00

清州國際機場得一個地方有賣SIM卡，如果大家想去首爾前就可以快速上網，最好都係出發前先準備好eSIM或者預約好SIM卡。

[스팟] Wide Mobile 預付SIM卡（無限上網、機場/市區領取）

[스팟] WiFi Dosirak eSIM

3. 行李保管服務

zimcarry_(짐캐리)

• 地點：清州國際機場1樓Gate 1（往國內線出境手扶梯後方、近廁所）
• 時間：06:00-20:00

如果只係會短暫停留韓國，追星族們睇完演唱會就會直接搭飛機走等，可以將不必要嘅行李寄存喺度，活動更加方便。

4. 藥房

清州機場藥房_{(청주공항약국)}

• 地點：清州國際機場2樓管制區外（國內線出境處前方）
• 時間：08:00-19:00

如果臨時有簡單藥品需要，可以先去藥局睇睇，但選擇一定唔會好似市區咁多。

5. 公用電腦區

Internet Zone

• 地點：清州國際機場2樓管制區外

對大部分旅客嚟講未必最常用，但如果你臨時要查資料、登入某啲網站，仍然算係一個補救選項。

清州國際機場餐廳/Cafe 

1. Mister糖餅_{(미스터 호떡)}
2. COFFEENIE_{(커피니 커피전문점)}

• 地點：清州國際機場1樓Gate 1
• 時間：06:00-20:00

如果想簡單食個韓式小食或者買杯咖啡，喺清州國際機場一樓就可以搵到，非常顯眼。

💡小編小貼士：提提你喺清州國際機場乘搭國內線往返濟州嘅時候可以帶飲品通過安檢，但如果係搭國際線就唔可以！

3. 傳聞的餃子NADRI_{(소문난만두, 나드리)}

• 地點：清州國際機場1樓Gate 1（往國內線出境手扶梯後方、近廁所） 
• 時間：06:00-21:30

如果想食得飽少少，可以考慮呢間。比起純小食，呢度會更似係可以簡單食一餐韓式熱食嘅選擇，落機後或者上機前想食正餐可以考慮去呢度。

4. 美食廣場Flavour 6

• 地點：清州國際機場2樓管制區外
• 時間：06:00至20:30

清州國際機場2樓管制區外有個叫「Flavour 6」嘅美食廣場，提供相當多款韓式料理。大家可以先透過機器點餐、自己搵位坐，之後確認號碼再取餐，歸還餐具都係自助，而食物也算中規中矩。

💡小編小貼士：清州國際機場美食廣場大部分都只可以碌卡，小編試過海外信用卡係用到嘅！如果想用現金就要直接向職員點餐，建議大家碌卡會比較方便！

5. No Brand Burger_{(노브랜드 버거)}

• 地點：清州國際機場2樓管制區外
• 時間：09:00-21:00

「No Brand Burger」可以話係韓國快餐店價錢最平，但CP值又夠高嘅餐廳。如果你想快、方便，又唔想食韓式飯麵類，推薦大家可以去「No Brand Burger」。

6. Gontran Cherrier_{(곤트란쉐리에)}

• 地點：清州國際機場2樓管制區外
• 時間：06:00-21:30

呢間比較適合想食麵包、飲咖啡，或者唔想食太重口味正餐嘅人。可以當早餐、下午茶，亦適合起飛前買少少麵包上路。

7. Beurre Beurre_{(뵈르뵈르)}

• 地點：清州國際機場2樓管制區外
• 時間：06:00-21:30

呢間喺聖水洞超出名嘅雪糕店開到連清州機場都有，主打牛油味雪糕，非常特別。如果需要打發時間，推薦大家可以去邊食雪糕、飲咖啡，邊等。

清州國際機場有冇免稅店？

• 地點：清州國際機場2樓出境管制區
• 時間：06:00至23:00（或有國際線航班時）

清州國際機場官網

麻雀雖小五臟俱全，清州國際機場出境後都有免稅店！不過規模不大，大家唔好抱太大期望。如有事先喺網路免稅店落單揀現場取貨嘅話，清州國際機場都有可以提領免稅品嘅區域。

清州國際機場常見問答FAQ

Q1. 打算去首爾，清州機場同仁川機場邊個更好？

A：如果你係由香港出發，因為而家冇直飛清州國際機場嘅航班，所以只可以揀經仁川機場去首爾。但如果日後加設直航班次，就要睇你比較重視邊方面嘅需求去揀：如果你重視人少、出入境快、機票有機會更平，清州機場會比較好；如果你想要更完整設施、免稅店選擇多、第一次去韓國想穩陣少少，仁川機場會更加啱你。

Q2. 清州機場去首爾要幾耐？

A：搭直達高速巴士去首爾高速巴士站，大約1.5小時左右，實際時間會視乎交通情況而定。

Q3. 清州機場高速巴士需唔需要預先買飛？

A：非常建議大家預先買定高速巴士車票，因為班次唔多，熱門時間有機會客滿，臨場先買唔一定有位。

Q4. 冇韓國電話號碼買唔買到高速巴士飛？

A：有啲官方預訂流程會需要韓國本地認證，對外國旅客唔太方便，所以不少人會選擇透過Creatrip等平台預約👉🏻清州國際機場來回首爾高速巴士轉運站車票代訂服務

Q5. 清州機場可唔可以過夜？

A：唔可以。清州機場有宵禁，凌晨12點之後之後基本上唔會開放俾旅客留喺度過夜。

Q6. 清州機場有冇即場現金退稅？

A：冇。清州機場退稅以填表後退返落信用卡為主，唔係即場現金退稅模式。

Q7. 清州機場匯率好唔好？

A：一般嚟講只適合應急，如果之後會入首爾，通常去明洞找換店匯率會更好。而且因為而家未有開設香港航班，所以現場未必可以兌換港幣。

Q8. 如果錯過咗去首爾嘅直達巴士，仲有咩替代方法？

A：你可以先去清州市區，再轉搭巴士去東首爾；或者視乎行程改去五松站搭KTX。只係時間同轉乘成本會高啲。

Q9. 由首爾出發去清州機場，應該幾早出發？

A：建議你至少確保自己喺航班前4小時已經搭上由首爾出發嘅巴士，咁會穩陣好多。

Q10. 清州市區值唔值得順便留一晚？

A：如果你想行程放慢少少、唔介意體驗比較在地嘅生活氛圍，可以考慮；但如果你主要目的係旅遊景點密集玩樂，首爾通常會更適合。

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！