探討韓國高自殺率原因
年輕生命嘅逝去...點解韓國嘅自殺率咁高？惡評？壓力？青年死因嘅第一位係自殺？
Hello，大家好，我哋係由韓國人話你知每日最新韓國資訊嘅Creatrip。
喺最近11月頭，韓國搞笑藝人朴智宣同佢媽媽就被發現陳屍喺自己屋企。根據現場調查結果顯示，無任何外力闖入嘅痕跡，仲喺現場搵到朴智宣媽媽嘅書信（有韓國媒體擅自公開咗遺書嘅內容，俾韓國網友討伐）。
而呢次嘅事件都係近幾年嚟韓國娛樂圈令人震驚嘅演藝人員自殺事件之一。除咗留低俾大家無限嘅悲痛同埋思念，亦都引起社會對於韓國高自殺率嘅關注。
到底係咩理由令到咁多韓國人會選擇以呢個咁極端嘅方式結束自己嘅生命？我哋一齊瞭解下呢個沉重嘅韓國社會現象。
娛樂圈嘅自殺死訊...
朴智宣
韓國知名嘅女搞笑藝人朴智宣喺無幾耐之前就發現同佢嘅媽媽一齊陳屍喺屋企，警方嘅調查結果顯示現場無外界入侵嘅痕跡，仲發現朴智宣媽媽留低嘅書信，所以會以自殺嘅方向調查。
據了解，朴智宣生前一直受到皮膚病困擾，雖然個人嘅身心都受到健康問題折磨，但佢仲會喺鏡頭面前擺出自己最樂觀嘅表現。
擔任過嘅電台DJ、活動主持人同埋綠葉角色都為韓國人帶嚟好深嘅印象。喺韓國娛樂圈人緣相當之好，所以佢嘅死訊都令到好多好友心碎。
具荷拉
KARA成員具荷拉，之前都一直有自殺未遂嘅消息傳出，原因係受到前男友嘅性暴力對待，再加上社會上對佢嘅非議。
佢嘅好朋友雪莉過身之後，雖然佢喺直播入面崩潰咁喊咗好耐，但都講過會連埋雪莉嗰一份好好咁生存落去。
結果就喺日本回歸冇幾耐之後傳出自殺嘅死訊，好多人都猜測係韓網上面嘅惡評將佢推上去絕路。
雪莉（崔真理）
喺退出f(x)之後以自己嘅真本性生活，但就一路都遭受唔少網友抨擊嘅雪莉，喺毫無預兆嘅情況之下選擇左離開呢個世界，留俾粉絲同埋大眾難以忘懷嘅悲痛。
即使佢嘅離開令到大眾意識到網上嘅惡意評論真係會將唔少人推上絕路，但仍然阻止唔到啲人喺網絡上面任意咁留惡評。
全美善
韓國資深女演員全美善，喺酒店自殺身亡。當時仍然係佢有份出演嘅電影《王的文字》嘅宣傳期，佢自殺嘅消息一出即刻震驚咗全國。
推測係因為佢嘅母親臥病在床、又有親人嘅離世，導致心力交瘁嘅全美善選擇走上絕路。
鐘鉉
SHINee嘅成員鐘炫喺2017年年底燒炭自殺，留俾粉絲同埋屋企人無盡嘅傷痛。
喺生前一直受到憂鬱症困擾，甚至期間都不停透過音樂療傷同埋傳遞求救訊號，結果都係冇辦法阻止悲劇嘅發生。
韓國嘅高自殺率
韓國自殺率高居世界頭幾，沉重嘅生活同埋經濟負擔、尊卑文化，令韓國有「地獄朝鮮」呢一個稱號。
因為好多野就算努力都係冇辦法改變，亦都因為攰啦，而自己嘅痛苦冇人可以理解同埋承擔……好多人都以自殺離開人世作為自己嘅最後一個選擇。
冇人可以評論呢一個選擇對佢哋來講係好事定壞事，我哋可以做嘅就係將佢哋留俾後人嘅痛苦減少。
另外一個令韓國自殺率居高不下嘅原因就係 欺凌問題 ，網民喺網上肆意咁留嘅惡意評論令好多藝人就算有幾強大嘅心理狀況都係難以承受，最後行上絕路。
隱藏喺螢幕背後，以假嘅身份進行評論同挑剔，喺韓國各大論壇都見到呢啲惡毒、不懷好意嘅評論，到底呢啲惡評有幾多會比藝人本人睇到呢？
喺真正咁令留惡評嘅人要負上佢哋嘅責任之前，因為咁而患上心理疾病、甚至自殺嘅人唔會減少。
2018年韓國自殺死亡嘅人數係13,670人，同2017年相比增加左1,207人，增幅接近一成，平均每10萬人當中有26.6個人自殺：再睇返OECD嘅數據分析，更加係有令人驚訝嘅結果。
OECD嘅國家入面，韓國嘅年均工作時間係1,993小時，遠高於OECD嘅平均值1,734小時；生活滿意度僅得6.1分，低於OECD平均嘅7.4分；每10萬人當中，老人嘅自殺率係53.3人、30代壯年嘅自殺率係24.6人，遠高於OECD平均入面，19.4人嘅老人自殺率同12.6人嘅30代自殺率。
高自殺率年輕化
歷年自殺率(每10萬名)
韓國10代嘅死因入面，自殺竟然佔咗22.1%，呢啲選擇結束自己生命嘅年輕人入面，有五分之一嘅比例竟然係親手結束自己嘅生命，亦都令人反思到底係點樣嘅壓力先會令一個啱啱先開始佢哋嘅青春年華嘅小朋友選擇走上絕路。
喺呢啲數據當中， 10代、40代、30代分別係自殺率增加得最多嘅三大族群，顯示韓國高自殺率年輕化，已經唔單止係個人問題，而係成個世代共同承擔嘅痛苦。
喺亞洲已開發嘅國家當中，韓國嘅自殺率都係第一名。
而藝人自殺之後，韓國社會嘅整體自殺率都會呈現上升嘅趨勢，對政府嚟講，應該點樣解決呢個模仿效應都係相當之需要處理嘅課題。
點解韓國自殺率偏高？
조선일보
上面係2018年嘅統計資訊，喺韓國嘅死亡人口入面，自殺竟然係排喺癌症、心臟病、肺炎、腦血管疾病後面第五位嘅死亡原因。
喺年齡層分布當中， 10代、20代、30代嘅死亡原因第一名竟然都係自殺，而40代、50代嘅自殺死亡比例，居然都佔據第二位，顯示咗南韓嚴重嘅社會問題。
雖然自從2013年起，韓國嘅自殺率已經係呈現持續下降嘅趨勢，但睇返2018年嘅資料，自殺率又重新上升返去之前嘅中間點。
喺OECD國家當中，韓國嘅自殺率仍然係第一名，政府甚至為咗防止大眾自殺，喺漢江大橋一帶貼上咗鼓勵嘅句子。
韓國係咪變得越嚟越痛苦？定係嗰啲問題從來都冇解決過？
隨住近年來表面光鮮亮麗嘅藝人好多都選擇結束自己嘅生命，一般市民已經開始質疑美好嘅表面同埋真實嘅內在係唔係統一，而導致每個結果嘅原因都需要大家繼續留意。
娛樂圈嘅心理疾病...
全美善、鐘鉉、崔真實、U;Nee、鄭多彬、張紫妍、具荷拉，仲有好多已經離開人世嘅藝人，都用緊呢啲方式將佢哋嘅痛苦傳達俾我哋。
並唔係要怪責或者鼓勵呢一種情況，而係喺每個人嘅心入面，都希望呢啲逝去嘅人可以安息。
就算佢哋選擇用偏激嘅方式結束自己嘅生命，但喺某種程度上都係帶領緊我哋理解，原來喺亮麗光鮮嘅舞台後面，其實有一個悲傷嘅面貌。
而好多藝人都喺節目或者社交媒體上面透露過自己內心嘅痛苦，好多甚至影響到佢哋嘅行程，甚至選擇暫時中斷活動，嚴重嘅更加會退出娛樂圈。
但係點解佢哋會作出呢一個選擇呢？除咗係工作上嘅壓力，仲有網友嘅惡評、不實指控等等造成嘅壓力，都一而再再而三咁令每一個職業係對住大眾微笑嘅藝人唔敢透露出自己承受嘅痛苦。
希望睇完呢一篇文章嘅大家，可以嘗試主動關心身邊嘅人。
一味嘅鼓勵同埋正能量未必會有實際嘅幫助，我哋要做嘅就係令每一個痛苦嘅人知道佢哋自己並唔孤單，身邊係會有人喺度，只要佢哋肯講，我哋就會聽。
而且網絡世界嘅匿名惡評都非常之值得重視。雖然話有言論自由，但係自由唔應該建立係呢啲無意義嘅攻擊之上。
Creatrip提醒您
珍惜生存嘅機會
香港撒瑪利亞防止自殺會：
2389 2222 (24小時熱線)
如果有更多想知嘅內容，都可以隨時留言或者dm話俾我哋知：）
Instagram：creatrip.hk