韓國交通總整理
嚟韓國前必睇！搭地鐵入錯月台、重新入閘唔洗錢？轉乘優惠要點計？巴士/地鐵/的士常見問答
- 韓國交通總整理 | 交通卡
- 韓國交通總整理 | 韓國各城市交通費用
- 韓國交通總整理 | 轉乘優惠
- 韓國交通總整理 | 地鐵
- 韓國交通總整理 | 巴士
- 韓國交通總整理 | 的士
- 韓國交通總整理 | 火車（KTX、SRT、ITX、無窮花）
- 韓國交通總整理 | 高速巴士
- 韓國交通總整理 | Seoul Bike
- 韓國交通小貼士
Hello，大家好，我哋係由韓國人每日提供最新韓國旅行資訊嘅Creatrip。
嚟韓國玩一定會搭地鐵、巴士、的士等大眾交通工具，而究竟搭邊種交通工具會方便啲咩？相信對於第一次嚟韓國嘅朋友，一定會感到好苦惱同頭痕。首爾大眾交通工具好發達，只要好好運用就可以用超平價錢玩轉韓國各地。呢篇文章小編為大家整理出各種交通工具相關資訊，一次過幫大家解決你哋嘅煩惱！
韓國交通總整理 | 交通卡
1. T-money
小編非常建議大家嚟韓國嘅時候一定要買一張交通卡，最常見係T-Money同Cashbee，無論係搭巴士、地鐵、火車、的士定係便利店都可以用到，搭巴士轉地鐵仲可以有轉乘優惠。
甚至連一啲快餐店（麥當勞、Lotteria等）、麵包店（Paris Baguette、Dunkin' Donuts等）、化妝品店（The Face Shop、Innisfree等）都可以用到。
唔同類型T-Money價錢都會唔一樣，通常大約係₩2,500~₩13,000不等，如果係韓星多數就係₩4,000以上。
2. Cashbee
Cashbee功能同T-money差唔多，搭交通工具或者喺某啲鋪頭都可以用。不過要留意佢唔可以喺大邱無人增值機增值、慶南居昌郡同陜川郡搭巴士唔可以用，的士方面就要有同Cashbee合作嘅先可以用。
3. Creatrip X BELLYGOM 限量聯名交通卡
早前我哋Creatrip爭取到同韓國超紅卡通人物BELLYGOM合作推出限量又獨一無二嘅交通卡，搭車同喺便利店+指定店鋪消費都可以用到！仲會先幫你入定₩5,000，等你可以攞到即用！大家可以透過Creatrip App隨時確認餘額&交易記錄，夠曬方便！
4. Discover Seoul Pass（首爾轉轉卡） 
除此之外，仲有Discover Seoul Pass（首爾轉轉卡），一樣有交通卡功能，同時可享有首爾地區50個景點免費入場、100多個景點入場優惠。
5. VISIT BUSAN PASS
如果話首爾有首爾轉轉卡，釜山就有呢張VISIT BUSAN PASS！只要有一張通行證就可以免費自由參觀超過30個觀光景點，而且有超過100間合作餐廳、商店、住宿同活動場所，隨時可以用優惠價錢享受各種體驗！不過記住要買實體卡先可以當交通卡用！
用交通卡搭巴士或地鐵，票價都會比較平，唔需要換散紙，仲未準備好交通卡嘅朋友唔需要太擔心，韓國各大便利店、地鐵站都有得買！
韓國交通總整理 | 韓國各城市交通費用
首爾(2024更新)
首爾地鐵單程票價
| 交通卡 | 一次性車票 | |
| 成人 | ₩1,400 | ₩1,500 另加₩500按金 |
| 青少年 | ₩800 | |
| 小童 | ₩500 | |
※一次性車票回收後可退回按金
首爾地鐵追加費用
未超過10公里 | / |
超過10至50公里 | +₩100/5公里 |
超過50公里以上 | +₩100/8公里 |
乘搭新盆唐線 | 通過新盆唐線時另收費 唔同區間可能會收₩500~₩1900 |
首爾巴士單程票價（下列為交通卡收費）
| 成人 | 青少年 | 小童 | |
| 藍色巴士 | ₩1,500 | ₩900 | ₩550 |
| 綠色巴士 | ₩1,200 | ₩600 | ₩400 |
| 紅色巴士 | ₩3,000 | ₩1,700 | ₩1,500 |
| 黃色巴士 | ₩1,400 | ₩800 | ₩500 |
大家要注意首爾而家好多巴士都唔收現金！所以大家嚟旅行嘅時候記住要買返張交通卡旁身啦！
釜山(2024更新)
釜山地鐵單程票價
| 交通卡 | 一次性車票 | |
| 成人 | ₩1,450 | ₩1,500 |
| 青少年 | ₩1,050 | ₩1,150 |
| 小童 | 免費 | ₩700 |
※釜山一次性車票唔需要回收
※0-12歲小童出入閘嘅時候需要嘟交通卡先可以免費搭車
釜山地鐵追加費用
| 未超過10公里 | / |
超過10公里 | +₩200 |
搭東海線 | 按距離增加票價 |
搭金海輕軌 | +₩500 |
釜山巴士單程票價（下列為交通卡收費）
成人 | 青少年 | 小童 | |
一般巴士 （藍/綠色） | ₩1,550 | ₩800 | 免費 |
座位巴士 （長途巴士） | ₩2,100 | ₩1,350 | 免費 |
※0-12歲小童出入閘嘅時候需要嘟交通卡先可以免費搭車
大邱
大邱地鐵單程票價
| 交通卡 | 一次性車票 | |
| 成人 | ₩1,250 | ₩1,400 |
| 青少年 | ₩850 | |
| 小童 | ₩400 | ₩500 |
※大邱一次性車票係一個代幣
仁川機場鐵路
| 直通車 | 一般列車 | |
| 停靠車站 | 直達首爾站 | 站站停 |
| 單程票價 | 根據落車地點計算 | |
| 所需時間 | 43分鐘 | 最少56分 |
韓國交通總整理 | 轉乘優惠
| 交通工具 | 地鐵、巴士 |
| 方法 | 上、落車（出入閘）需要啪交通卡 |
| 條件 | 地鐵出站30分鐘內轉搭巴士享優惠 |
| 巴士落車30分鐘內轉搭地鐵享優惠 | |
| 地鐵轉地鐵、同一巴士號碼冇優惠 | |
| 21:00至06:59時，優惠時限延長至60分鐘 | |
| 交通卡餘額須超過₩250 | |
| 早鳥 | 首班車至06:30前搭地鐵、巴士享8折優惠 （只有首爾、京畿道、釜山等有） |
韓國大眾交通轉乘優惠，只限於地鐵轉巴士、巴士轉地鐵，而且必須要喺指定時間內完成，同時以交通卡上落車（出入閘）先可以，只要好好利用，就可以減少交通費支出。
另外唔單止首爾地區，喺釜山、大邱有地鐵嘅城市，只要有交通卡都可以享有換乘優惠。
韓國交通總整理 | 地鐵
韓國有5個城市有地鐵，分別係首爾首都圈（包括仁川+京畿道）、釜山、大邱、大田同光州，呢幾個地方都係人口相對比較多嘅城市。
而首都圈有超過21條地鐵路線，有唔少車站同KTX、ITX火車站相連，如果想去比較遠嘅江原道或者忠清道，地鐵應該會係最方便嘅交通。
Q. 搭地鐵唔小心搭錯邊點算好？
首爾地鐵路線真係幾複雜吓，有時候一唔小心就會搭錯反方向。如果車站都喺同一個月台當然就冇問題，但如果咁啱要過對面嘅話，應該大家都會擔心「係唔係要先啪卡出去，再啪卡入另一邊？」定係「如果出咗去又啪卡，係唔係要俾多次錢呢？」。
如果只係入咗閘仲未上車，喺5分鐘內直接啪卡出站，再啪卡入另一邊就唔需要多俾一次錢。 就算已經去咗另一個站都冇問題，通常閘口都會有一個Help掣，大家只要撳完同職員講入錯閘就得！用簡單英文講一講，大部份職員都會幫手開門俾你去返啱嗰邊。
Q2. 一定要買交通卡先可以搭地鐵？
雖然唔係一定要買交通卡先可以搭到地鐵，不過如果唔買嘅話每次都要買上面呢張一次性車飛，收費亦都會比較貴。
而且出站之後每次都要記得去退款機退返₩500保證金，都幾麻煩吓。
Q3. 點轉車？
轉車嘅時候可以搵指示牌上面寫住嘅「갈아타는 곳（轉車地方）」，睇返想轉幾號線，然後跟住指示牌行就得！
Q4. 喺地鐵入面可唔可以食嘢？
韓國一直以嚟都冇法律規定唔可以喺地鐵入面食嘢（除疫情期間），不過為免影響他人，建議儘量都係唔好食啦！
Q5. 韓國地鐵半夜有冇車？
韓國地鐵唔係24小時營運，通常喺05:30至00:00左右會有車，不過每條路線嘅頭班車同尾班車開出時間都會唔同，大家出發前記住要check清楚。俾個貼士大家，平日尾班車會開夜啲，而weekend尾班車通常會早1個鐘頭開出！
韓國交通總整理 | 巴士
韓國巴士唔似香港係跟巴士公司分，每隻顏色都分別代表呢架係咩類型嘅巴士！想知更多有關韓國巴士嘅資訊，可以撳下面條link瞭解詳情。
Q1. 喺韓國搭巴士有咩需要注意？
韓國巴士同香港最大嘅差別就係，喺香港淨係上車嗰陣拍一次卡就得，但韓國上落車都需要拍卡，如果唔係會被罰款。另外韓國巴士上嚴禁飲食，而且如果你仲拎住未飲完嘅嘢飲或者嘢食嘅話，司機係唔會俾你上車㗎。
Q2. 韓國巴士半夜有冇車？
首爾巴士會開到比較夜，如果路線比較長，可能會夜晚11、12點都仲會有車。另外仲有一款係凌晨先會有嘅「深夜巴士」（N字頭路線），不過得首爾地區有，如果大家晚到好夜趕唔到普通巴士或者地鐵尾班車，都仲有多個選擇！
韓國交通總整理 | 的士
韓國的士主要分成4種，最common嘅係橙色同銀色嘅普通的士，另外仲有黑色嘅模範的士同大型的士。不過模範的士起錶價比較貴，大家上車之前記住要留意清楚啦！
Q1. 韓國的士可唔可以碌卡？
可以！除咗信用卡、用T-money或者俾現金都得。不過對遊客嚟講，小編覺得用T-money會比較好，因為會有交易記錄，如果唔見咗嘢，或者出現紛爭，都可以透過交易記錄搵返你搭過邊架的士啊嘛！
Q2. 有咩App可以叫的士？
大家可以用「Kakao Taxi」或者韓國版UBER —— 「UT」，不過呢個就要先喺飛之前用電話號碼申請咗先用得！
早前首爾市政府專門為外國人開發咗一個Call的士嘅App叫「TABA」，優點係可以直接用自己國家/地區嘅電話號碼，更加可以用當地信用卡俾錢！另外呢個App更加提供有繁體中文同英文等各種語言服務，非常方便！
如果係需要來回機場，建議大家可以提前book定機場接送服務，由專業的士司機送你安全到達機場！
韓國交通總整理 | 火車（KTX、SRT、ITX、無窮花）
韓國火車有超多路線同車種，最常見嘅係高速火車「KTX」、「SRT」，同一般火車「無窮花號」 、「ITX青春號」 。
Q1. 韓國火車同地鐵點分？
最大嘅分別係火車需要提前訂飛，唔可以直接用交通卡搭車！
Q2. 搭韓國火車洗唔洗驗票？
搭KTX嘅時候唔洗驗票，大家只要手機有留低訂票紀錄就得。但如果係搭ITX青春號，入站嘅時候需要出示車飛嘅QR Code，所以建議大家手機要有備份，或者提前印定。
韓國交通總整理 | 高速巴士
高速巴士都係另一個去其他城市嘅交通選擇，同一般巴士唔同，高速巴士要事先買飛劃位，亦都會分成一般巴士、優等巴士、Premium幾種車，價錢不一，大家可以按照需求揀搭邊款。
Q. 去其他城市應該揀搭火車定高速巴士？
火車好處係快去到，而高速巴士優點就係價錢會平啲，亦都可以去到更加多地方。火車同高速巴士一樣都可以喺網上或者APP度預約車飛，不過如果冇韓國手機號碼，有啲地方就一定要去到現場先買得。
韓國交通總整理 | Seoul Bike
韓國越嚟越容易見到Seoul Bike，就算外國人嚟到，就算冇韓國手機號碼都可以租到！
韓國交通小貼士
韓國地圖App
想知道可以搭咩交通工具去目的地，大家可以透過Naver Map、Kakao Map等等嘅App查詢，只要輸入出發地同目的地，就可以查到抵達目的地時間同推薦路徑，同時亦可以知道巴士抵達時間、各地鐵站開車資訊，而且Naver同Kakao都有提供外國語言服務，對於遊客嚟講好方便。
以上係韓國交通嘅介紹，希望呢篇文章可以幫到最近計劃嚟韓國旅行嘅大家！
如果有更多想知嘅內容，都可以隨時留言或者dm話俾我哋知：）
Instagram：creatrip.hk