韓方足浴 | 北村韓屋村 Tea Therapy
嚟韓國旅行行到好攰？不如一邊飲傳統韓方茶，一邊浸腳relax吓啦！
Hello，大家好，我哋係由韓國人每日提供最新韓國旅行資訊嘅Creatrip。
講起韓國嘅飲品，大家應該第一時間諗起路上人手一杯嘅Americano。不過其實最近呢幾年韓國傳統茶Cafe越嚟越受歡迎，因為除咗可以打卡，仲可以飲返杯有益健康嘅茶，一舉兩得。韓國傳統茶全部都係用對身體好嘅食材調配而成，熱飲可以暖胃、凍飲清涼解渴，各有各嘅魅力。
而今次要介紹嘅Cafe就係位於景福宮北村嘅Tea Therapy啦！呢間Cafe嘅特別之處係大家可以諮詢茶療師嘅意見，瞭解自己身體狀況之後，揀選符合自己身體狀況嘅茶。另外仲有提供足部Spa服務嘅室外座位，大家可以一邊浸腳、一邊享受悠閒寧靜嘅氣氛。透過我哋預約仲可以有更多優惠，有興趣嘅朋友們不妨可以去試吓！
韓方傳統茶&足浴Cafe「Tea Therapy」資訊
- 景福宮分店地址：서울 종로구 윤보선길 74
- 營業時間：10:00 - 21:00（最後入場時間 21:00）
韓方傳統茶&足浴Cafe「Tea Therapy」推薦理由
- 除咗可以享用符合你體質嘅韓方茶，從中瞭解韓國醫學文化之外，仲可以浸吓腳舒緩旅行嘅疲勞。
- Tea Therapy位於北村韓屋村，喺呢度就好似返咗古代咁，可以放慢節奏relax吓。
- 旅行雖然開心，但係都難免會覺得攰，嚟到呢度可以一邊飲韓方茶，一邊做韓式足部Spa，幫你充滿電。
韓方傳統茶&足浴Cafe「Tea Therapy」價格
足浴體驗 + 韓方茶(一壺)（20分鐘） | ₩18,000 |
韓方傳統茶&足浴Cafe「Tea Therapy」注意事項
- 最遲三日前更改或者取消預約。
- 價格淨係包含體驗項目，唔包含任何附加服務。
- 其他需要自費嘅小食、飲品、餐點需要喺現場俾錢。
- 請遵守預約時間，如遲到恕不退款。
- 如果需要增加人數，請重新預約及付款。
- 如因天氣因素被逼取消足浴體驗，將進行退款。
- 韓方茶體驗、韓方茶文化體驗只限禮拜六、日14:00 - 18:00提供。
- 因天氣寒冷，足浴體驗將會喺12月1號至3月1號暫停開放預約。
韓方傳統茶&足浴Cafe「Tea Therapy」預約流程
- 撳我預約。
- 請詳細輸入所有相關資訊。
- 是次預約需要事先付款。
- 完成預約後，我哋會喺1-3個工作天內確認訂單。
- 如果需要修改資訊，請喺付款前進行。
- 完成預約後你可以撳呢度查詢訂單。
- 如需取消及進行退款，最遲喺預約日期3日前完成手續。
- 去到現場出示預約紀錄就可以進行體驗。
韓方傳統茶&足浴Cafe「Tea Therapy」介紹
Tea Therapy景福宮分店位於北村韓屋村，身處喺一棟有多年歷史嘅建築物入面。呢間Cafe仲有埋韓國美食餐廳指標——藍蝴蝶結標誌！
大部分韓屋村附近嘅餐廳都會沿用返韓屋嘅風格，呢間Cafe都唔例外，非常有韓國傳統建築特色。而且外面仲有一個可以浸腳嘅Spa添。
Cafe内部亦都裝飾得好靚好溫馨，加上韓式窗花設計，令人有種身處喺以前韓國人屋企嘅感覺。現場仲可以見到各式各樣嘅韓方藥材，藥材嘅香味會令人不自覺咁慢慢放鬆落嚟。
Cafe除咗有賣韓方茶同調製傳統茶嘅材料之外，仲有幾款果醬、零食同韓式補藥賣，價錢都唔貴，有興趣嘅朋友可以不妨買嚟試吓。而呢度嘅韓方傳統茶亦都有凍有熱，任君選擇。
今日就嚟介紹吓調配韓方傳統茶加足浴體驗呢個course啦！每個weekend現場都會有識中文嘅職員，就算唔識韓文都唔使怕溝通唔到。
一開始會先填一份問卷，瞭解吓自己嘅身體狀況同想要改善嘅地方。職員就會按照你嘅答案，用韓國醫學嘅角度去分析症狀嘅成因。
經過大約10至20分鐘嘅諮詢之後，職員會幫你揀三種藥材，調配專屬你嘅韓方傳統茶。如果有唔鐘意嘅藥材或者味道，可以事先同職員講㗎！今次職員就幫小編調配咗一杯有橘皮、枸杞同大棗嘅茶。
整好你杯專屬韓方茶之後，職員會叫你揀一款做足部Spa嘅時候用嘅韓方藥材包。Relaxing A添加咗薄荷成分，有助放鬆。而Warming B就添加咗肉桂成份，有助促進血液循環，令身體變得更暖。
老闆娘仲同小編講，所有足浴韓方藥材包完全冇任何人工添加劑，全部都係用有機嘅天然藥材製成，就算飲都冇問題。
揀完足浴藥材包就可以行出室外嘅足浴池，職員會幫你放熱水同加藥材包落去，同時亦都會送上頭先調配好嘅韓方傳統茶。等到側邊漏斗啲沙漏完之後，就可以飲啦！大家可以用附上嘅茶隔隔走啲藥材。
呢度嘅足浴池非常古色古香，大家可以喺度一邊浸腳，一邊飲韓方傳統茶，脫離平時忙碌嘅生活，享受吓悠閒。而且嚟旅行通常都要行好多路，喺呢度你可以舒緩吓對腳，充滿電之後再繼續盡情玩。
除咗一壺茶之外，呢度仲會提供黑豆乾同紅棗乾，食落非常脆卜卜，味道同韓方傳統茶都非常夾。如果冲出嚟嗰壺茶唔啱飲，大家可以同職員講，重新調配一壺新嘅茶。
結束成個體驗之後，大家仲可以將頭先調配好嘅韓方傳統茶材料帶返屋企，每個樽上面都有寫冲一次茶要落幾多，而呢度嘅量總共可以冲二十次左右，真係好化算。
小編非常推薦大家旅行嘅時候嚟Tea Therapy體驗吓，唔單止可以舒緩壓力休息吓，仲有得食有得拎添！
呢度除咗頭先介紹嘅足浴+韓方傳統茶體驗，仲有提供一個60分鐘嘅韓方茶文化體驗。呢個course有三個大主題，分別係舒緩壓力療法、專屬女性保養療法，同埋養身抗老療法。
大家可以聽到韓方傳統茶嘅文化同藥材嘅介紹之餘，仲可以試到十幾款唔同嘅韓方茶，Cafe亦都會提供韓國傳統小食俾大家品嘗。上完堂之後，大家仲可以攞到三樽整韓方茶嘅藥材同三個茶包添啊。
現場亦都有賣好多款嘅韓方傳統茶，小編非常推薦大家試吓呢款叫五味子茶嘅嘢飲，酸酸甜甜，非常解渴。
Cafe入面仲有單獨賣韓方藥材、茶包，仲有傳統韓式小食，大家可以買嚟做手信送俾親朋戚友。
平時成日見到韓國人會飲一包包嘅韓藥補身，原來呢度都有賣啊！小編去嘅時候就見到有賣大棗茶、枸杞茶同雙和茶。除此之外仲可以買到整人參雞嘅藥材包，想返到香港都食到正宗韓式人參雞嘅朋友千祈唔好錯過啦！
頭先浸腳嘅時候用嘅韓方藥材包都有得單獨買，不妨買返香港孝敬吓屋企人！
除咗傳統茶之外，呢度都有賣啲健康又好食嘅menu（重點係唔貴啊！），大家如果去嘅時候未食lunch都可以喺度填飽嗰肚~
韓方傳統茶&足浴Cafe「Tea Therapy」前往方法
安國站一號出口出嚟向右行。
見到Olive Young之後向右轉。
行到尾喺T字路口向右行。
以上係韓方傳統茶&足浴Cafe「Tea Therapy」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com