2024首爾旅行必去景點推薦
一次過幫你整理好首爾有邊幾個景點一定要去！打卡、美食、行街通通有齊！
- 弘大(홍대)
- 弘大延南洞(연남동)
- 明洞(명동)
- 漢南洞(한남동)
- 聖水洞(성수동)
- N首爾塔/南山塔(N서울타워/남산타워)
- 樂天世界塔(롯데타워)
- 貞洞展望台(정동전망대)
- 首爾樂天世界(롯데월드)
- 龍馬樂園(용마랜드)
- 慶熙大學(경희대학교)
- 梨花女子大學(이화여자대학교)
- 景福宮(경복궁)
- 昌德宮秘苑(창덕궁 후원)
- 星空圖書館(별마당 도서관)
- 首爾林(서울숲)
- 天空公園(하늘공원)
- 北村韓屋村(북촌한옥마을)
- 益善洞(익선동)
- 東大門/興仁之門(동대문/흥인지문)
- DDP東大門設計廣場(동대문디자인플라자)
- 東廟市場(동묘시장)
- 廣藏市場(광장시장)
- 清溪廣場(청계광장)
- 首爾路7017(서울로7017)
- 盤浦漢江公園(반포한강공원)
- 麻浦大橋(마포대교)
- The Hyundai Seoul(더현대서울)
- 鷺得島(노들섬)
- 63大樓(63빌딩)
- 文化儲備基地(문화비축기지)
- 首爾植物園(서울식물원)
- 鷺梁津杯飯街(노량진컵밥거리)
- 望遠市場(망원시장)
- 南大門市場(남대문시장)
- 孔德市場(공덕시장)
- 仁寺洞(인사동)
- 奧林匹克公園/孤獨的樹(올림픽공원/나홀로나무)
- Common Ground(커먼그라운드)
- 駱山公園(낙산공원)
- 書的博物館(송파책박물관)
- 洪陵樹木園(홍릉수목원)
- 正讀圖書館(정독도서관)
- 梨泰院解放村(해방촌)
- 恩平韓屋村(은평한옥마을)
- 南山谷韓屋村(남산골 한옥마을)
- 兒童大公園(어린이대공원)
- 狎鷗亭羅德奧/島山公園(압구정로데오/도산공원)
Hello，大家好，我哋係由韓國人每日提供最新韓國旅行資訊嘅Creatrip。
首爾係韓國人口最密集、發展速度最快嘅城市，而幾乎所有嚟韓國自由行嘅遊客都會揀嚟首爾旅行！到底首爾有邊幾個景點必去，你又去過邊幾個？一齊睇吓小編今日幫大家整理嘅呢篇blog啦！
首爾旅行必去景點推薦
弘大(홍대)
- 前往方法：弘大入口站（홍대입구역）8號、9號出口
「弘大」係首爾最熱門嘅商圈之一，無論係餐廳Cafe、購物、醫美定夜生活都聚集喺呢個地方！而且因為弘大交通夠方便，所以好多人都會揀住弘大附近，相信嚟過韓國嘅你都一定會去過弘大！
弘大行程攻略💡
弘大延南洞(연남동)
- 前往方法：弘大入口站（홍대입구역）3號出口
「延南洞」雖然就喺弘大附近，不過氣氛非常唔同！而位於延南洞嘅林蔭道就好似一個大型公園咁，有好多人會喺度散步曬太陽，享受悠閒時光。而且延南洞有唔少小店同Cafe，推薦大家嚟行吓！
明洞(명동)
如果話弘大係當地人都會去嘅人氣地點，「明洞」就係外國遊客最鍾意嘅觀光景點！無論係換錢、食嘢定掃貨都可以喺度一次搞掂！
明洞行程攻略💡
漢南洞(한남동)
- 前往方法：漢江鎮站（한강진역）3號出口
「漢南洞」位於梨泰院附近，係近期新興嘅景點！呢度有唔少特色Cafe同小眾設計師品牌時裝店，好啱同姐妹們一齊行街shopping，消磨午後時光！
聖水洞(성수동)
- 前往方法：聖水站（성수동）3號、4號出口
聖水洞同漢南洞都有幾分相似，同樣都係以小眾品牌同時裝為主。小編個人覺得聖水洞比較好行（至少唔洗行斜路XD），而且搭地鐵2號線就去到，交通夠方便，附近亦都有唔少美食！
N首爾塔/南山塔(N서울타워/남산타워)
- 地址：서울 용산구 남산공원길 105
- 開放時間：
- 星期一至四 12:00-22:00
- 星期五至日 11:00-22:30
首爾最出名嘅景點，同時亦都係首爾地標嘅「N首爾塔」（即係大家所知嘅南山塔），係第一次嚟韓國玩必去嘅景點！推薦大家夜晚上觀景台，俯瞰首爾超靚夜景！
樂天世界塔(롯데타워)
- 地址：서울 송파구 올림픽로 300
- 開放時間：
- 星期日至四 10:30-22:00
- 星期五及六 10:30-23:00
- 前往方法：蠶室站（잠실역）1號出口
首爾另外一棟最有代表性嘅高樓大廈就係位於蠶室嘅「樂天世界塔」啦！樂天世界塔係韓國最高嘅建築物，上到頂部嘅Seoul Sky觀景台更加可以睇到首爾全景，非常震撼！
貞洞展望台(정동전망대)
- 地址：서울 중구 덕수궁길 15 13F
- 營業時間：
- 星期一至五 13:30-17:30
- 星期六及日 09:00-17:30
- 前往方法：市廳站（시청역）12號出口
喺市廳站一出就可以去到嘅「貞洞展望台」，雖然只係得13層樓高，不過喺呢度可以眺望到德壽宮同周邊現代化建築相融嘅景色，相當特別！
首爾樂天世界(롯데월드)
- 地址：서울 송파구 올림픽로 240
- 營業時間：10:00-21:00
- 前往方法：蠶室站（잠실역）3號出口
「樂天世界」係首爾最出名同最有代表性嘅主題樂園，好多韓國人都會趁放假同朋友一齊租套校服去樂天世界玩，一齊踏入呢個夢幻國度啦！（BTW前排釜山樂天世界開咗幕，有機會可以去埋！）
龍馬樂園(용마랜드)
- 地址：서울 중랑구 망우로70길 118
- 營業時間：10:00-18:00
- 前往方法：忘憂站（망우역）1號出口
「龍馬樂園」係一個廢棄主題樂園，而家轉型成為打卡景點，入面嘅設施經過歲月洗禮，呈現出獨特嘅懷舊感覺，更加係無數KPOP韓星拍MV同綜藝嘅地方！
慶熙大學(경희대학교)
- 地址：서울 동대문구 경희대로 24
- 前往方法：回基站（회기역）1號出口
「慶熙大學」係韓國私立三大名校之一，除咗有好多出名嘅校友同學術研究夠發達之外，慶熙大學更加因為校園有好靚嘅歐式建築，成為唔少人嚟首爾玩嘅時候必去嘅校園之一，特別係春天櫻花盛開嘅時候記住一定要去打卡啊！
梨花女子大學(이화여자대학교)
- 地址：서울 서대문구 이화여대길 52
- 前往方法：梨大站（이대역）2號、3號出口
講起首爾最靚校區，一定唔少得「梨花女大」！每個季節去都可以睇到唔同嘅景色，不過小編私心推薦大家秋天或者冬天嚟，秋冬嗰種feel同學校建築風格好夾！
景福宮(경복궁)
- 地址：서울 종로구 사직로 161
- 開放時間：09:00起（各季節不同、星期二休館）
- 前往方法：景福宮站（경복궁역）5號出口
首爾最有代表性嘅古蹟，就係光化門同位於光化門嘅「景福宮」，呢度係朝鮮時代國王居住同工作嘅地方，蘊含崇高歷史文化價值，唔少遊客都會著住韓服參觀景福宮，就好似穿越咗時光咁。
昌德宮秘苑(창덕궁 후원)
- 地址：서울 종로구 율곡로 99
- 開放時間：10:00起（各季節不同、星期二休館）
「昌德宮秘苑」係預約制，一定要事先買飛先可以入場參觀。推薦大家秋天紅葉盛開嘅時候嚟，感覺就好似行咗入韓劇咁，係首爾最令人印象深刻嘅私藏景點。如果買唔到飛入秘苑，就咁參觀昌德宮都好靚，而且人流會少過景福宮，影相都會舒服啲！
星空圖書館(별마당 도서관)
- 地址：서울 강남구 대치동 955-9
- 前往方法：三成站（삼성역）6號出口
雖然話係「星空圖書館」，不過其實現場一啲都唔似星空咁靜，反而好熱鬧XD COEX商場入面呢個成千上萬本排列整齊嘅書牆，第一次見到真係會令人嘆為觀止！
首爾林(서울숲)
- 地址：서울 성동구 뚝섬로 273
- 前往方法：首爾林站（서울숲역）3號出口
「首爾林」係首爾市中心一個規模超大嘅綠化公園，春天可以欣賞到五顔六色嘅鮮花，夏天可以欣賞翠綠樹林，秋季就可以睇到超靚紅葉，而冬天就可以睇到浪漫雪景，而且入面仲有好多秘密景點等緊大家去發掘！
天空公園(하늘공원)
- 地址：서울 마포구 하늘공원로 95
- 前往方法：世界盃競技場站（월드컵경기장역）1號出口
講起首爾秋天必去景點，一定唔少得「天空公園」！超靚芒草配埋黃昏夕陽，成個景色勁夢幻（有時候仲會有粉紅芒草睇）！（小編OS：千祈唔好春天去，因為真係冇咩好睇XD）
北村韓屋村(북촌한옥마을)
- 前往方法：安國站（안국역）1號出口
「北村韓屋村」亦都係首爾相當出名嘅景點之一，位於景福宮另一邊，但係感覺就完全唔同。通常大家去北村韓屋村都會順便去埋三清洞行吓，體驗更多當地美食同特色。
益善洞(익선동)
- 前往方法：鐘路三街站（종로3가역）4號出口
「益善洞」被譽為迷你韓屋村，係小編一定會帶香港朋友去嘅首爾景點！呢度好多餐廳Cafe都係由韓屋改建，建築夠特別又復古，個vibe真係好正，好似穿梭咗時光，返到好多年前仍然叫做漢城嘅首爾咁。
益善洞行程攻略💡
東大門/興仁之門(동대문/흥인지문)
- 地址：서울 종로구 종로 288
- 前往方法：東大門站（동대문역）7號出口
「東大門」呢個地方相信大家都一定聽過，呢度嘅批發同代購可以話撐起咗韓國嘅時尚產業XD 大家如果想用比較平嘅價錢買衫褲鞋襪同首飾，不妨都可以去東大門批發商場睇睇（不過通常都有件數限制，如果係一個人去就可能比較難買到嘢啦）！
東大門行程攻略💡
DDP東大門設計廣場(동대문디자인플라자)
- 地址：서울 중구 을지로 281
- 前往方法：東大門歷史文化公園站（동대문역사문화공원역）1號出口
東大門一帶最能夠代表歷史同過去嘅景點，係上面有提及過嘅「興仁之門」；而最能夠代表現在同未來嘅就係「DDP」設計廣場啦！除咗建築設計夠新穎特別，唔少特別活動、展覽同Fashion Show都會喺呢度舉辦！
東廟市場(동묘시장)
- 前往方法：東廟前站（동묘앞역）3號出口
東大門附近仲有一個首爾最大嘅二手市集——「東廟市場」，每個weekend都爆多人。大家可以喺度搵到各種古著同二手商品，有時候好彩嘅話可能可以用超平價錢尋到寶添啊！
廣藏市場(광장시장)
- 地址：서울 종로구 창경궁로 88
- 前往方法：鐘路五街站（종로5가역）8號出口
首爾最出名嘅傳統市場相信係「廣藏市場」，歷史悠久之餘佔地大，而且位於首爾市中心，係好多人嚟首爾一定會去朝聖嘅景點。呢度最出名食綠豆煎餅、生牛肉同各種韓國料理，大家記住準備個胃去掃街啦！
清溪廣場(청계광장)
提起漢江，韓國人一定會聯想起「清溪川」。呢條河川由光化門、市廳開始一路向東流，然後同中浪川會合，流入漢江。推薦大家可以沿住河邊漫步，喺首爾享受一絲悠閒。
首爾路7017(서울로7017)
- 地址：서울 중구 청파로 432
- 前往方法：首爾站（서울역）前
首爾站附近有一條天橋行人路景點叫「首爾路7017」，好多韓劇都有嚟取過景，大家可以自由穿梭首爾市中心，行到最後仲可以去到首爾站同樂天超市！
盤浦漢江公園(반포한강공원)
- 地址：서울 서초구 신반포로11길 40
- 前往方法：高速巴士站（고속터미널역）8-1號出口
韓國有好多個漢江公園，而「盤浦漢江公園」嘅特別之處就係可以睇到季節限定嘅盤浦大橋月光彩虹噴泉，以流行歌曲做背景音樂，配合色彩繽紛嘅噴泉燈光表演，嚟韓國旅行點都要睇返次！
麻浦大橋(마포대교)
- 前往方法：汝矣渡口站（여의나루역）2號出口
首爾「麻浦大橋」有個花名叫做自殺大橋，每年都有唔少人喺度跳江自殺。而韓國政府為咗防止呢個問題，喺大橋欄杆上寫上各種心靈雞湯+安慰人嘅句子。不過聽講見到呢啲字之後加深自殺念頭嘅人變得更加多...
The Hyundai Seoul(더현대서울)
- 地址：서울 영등포구 여의대로 108
- 營業時間：
- 星期一至四 10:30-20:00
- 星期五至日 10:30-20:30
- 休息日：撳我睇今個月幾時休息
首爾而家最受歡迎嘅商場/百貨公司，相信一定係位於汝矣島嘅「The Hyundai Seoul」！呢度有無數品牌進駐，而且仲一直會搞pop-up store，無論係想掃貨定普通行街食飯都好啱！
鷺得島(노들섬)
- 地址：서울 용산구 양녕로 445
- 前往方法：鷺得站（노들역）2號出口
「鷺得島」呢個景點大家可能比較少聽到，不過呢度係最近首爾市民們weekend都會去chill嘅地方！鷺得島係一個漂浮喺漢江上嘅小島，提供複合式文化同綠地空間俾大眾休息，原來韓劇《Start Up》都係喺呢度拍㗎！
63大樓(63빌딩)
- 地址：서울 영등포구 여의도동 63로 50
- 前往方法：汝矣渡口站（여의나루역）4號出口
除咗樂天塔之外，首爾另一棟最有代表性嘅建築係汝矣島「63大樓」！「63大樓」係呢一帶最高嘅建築物，亦都有好多餐廳，附近仲有汝矣島最靚嘅漢江公園，大家有機會記住去睇吓啦！
文化儲備基地(문화비축기지)
- 地址：서울 마포구 증산로 87
- 前往方法：世界盃競技場站（월드컵경기장역）2號出口
「文化儲備基地」位於剛剛頭先都有介紹過嘅天空公園附近，雖然冇咁出名，但係仍然係好多韓國人秋天嘅時候會去嘅景點（天空公園太多人嘅時候大家都可以考慮轉戰呢度XD）
首爾植物園(서울식물원)
- 地址：서울 강서구 마곡동로 161
- 前往方法：麻谷渡口站（마곡나루역）3號出口
「首爾植物園」一開幕就成為唔少首爾市民週末好去處，呢度有成千上萬種植物，大型庭院裝修更加充滿科技感，亦都係一個寓教於樂嘅空間。
鷺梁津杯飯街(노량진컵밥거리)
- 地址：서울 동작구 노량진동 148-88
- 前往方法：鷺梁津站（노량진역）3號出口
鷺梁津係首爾一帶青年比例最高嘅地方，因為呢度有好多準備緊各大正式考試嘅學生，無論係重考大學入學考試，定係想考公務員或者入職大型企業，都會紛紛聚集喺補習班、考試院林立嘅鷺梁津生活。所以呢度嘅消費模式都同首爾其他地區唔太一樣，物價都相對地低少少，更加形成咗杯飯街呢種小食街文化。
望遠市場(망원시장)
- 地址：서울 마포구 포은로8길 14
- 前往方法：望遠站（망원역）2號出口
位於弘大附近嘅望遠站附近有個叫「望遠市場」嘅傳統市場，呢度比起廣藏市場會冇咁似觀光景點，反而有好多簡單嘅攤檔仔賣緊各種經典韓國美食，價錢亦都相對上比較平！
南大門市場(남대문시장)
- 地址：서울 중구 남대문시장4길 21
- 前往方法：會賢站（회현역）5號出口
「南大門市場」可以話係遊客會去嘅首爾傳統市場當中最貼近韓國人日常生活、最地道嘅市場。呢度唔單止有雜貨、童裝同花店，仲有各種傳統美食等緊你去試！
南大門市場行程攻略💡
孔德市場(공덕시장)
- 地址：서울 마포구 공덕동 256-6
- 前往方法：孔德站（공덕역）5號出口
韓國有好多「ㅇㅇ一條街」（好似一隻雞一條街、葱煎餅一條街等等），咁豬腳一條街又喺邊呢？首爾豬腳一條街位於麻浦「孔德市場」，喺呢個超local嘅傳統市場會發現到一條深藏當中嘅豬腳街，超多老字號豬腳餐廳，大家可以選擇買外賣或者直接食完先走~
仁寺洞(인사동)
「仁寺洞」位於「益善洞」附近，兩個地方氣氛都幾似吓，不過呢度比起韓屋個種傳統風情，反而係復古感會比較重，沿住主街行隨時可以尋到寳！
奧林匹克公園/孤獨的樹(올림픽공원/나홀로나무)
- 地址：서울 송파구 올림픽로 424
- 前往方法：夢村土城站（몽촌토성역）1號出口
「奧林匹克公園」係為咗紀念1988年漢城奧運會建設而成，而呢度最出名嘅景點一定係位於公園中央嘅「孤獨的樹」，一大片草地中間得一棵樹，影出嚟超有feel，唔少準新郎新娘都會嚟影婚紗相！
Common Ground(커먼그라운드)
- 地址：서울 광진구 아차산로 200
- 前往方法：建大入口站（건대입구역）6號出口
建大藍色貨櫃屋「Common Ground」係韓國年輕人打卡聖地，呢度一共分為2個部份，除咗有Cafe同餐廳，仲有買各種潮牌同生活文創小物嘅地方，非常好行！
駱山公園(낙산공원)
- 地址：서울 종로구 이화동 낙산길 41
- 前往方法：惠化站（혜화역）1號、2號出口
惠化大學路附近有個叫做「駱山公園」嘅景點，同梨花壁畫村非常近，不過呢度就多咗一層古色古香嘅感覺，小編推薦大家夜晚去，一邊沿著城郭散步，一邊欣賞超靚首爾夜景！
書的博物館(송파책박물관)
- 地址：서울 송파구 송파대로37길 77
- 前往方法：松坡站（송파역）4號出口
「書的博物館」位於蠶室附近嘅松坡區，大家可能聽到博物館就會覺得係一個好嚴肅嘅地方，不過呢度係一個好舒服嘅閱讀空間，無論係市民定觀光客都可以享受療癒時光，大家仲可以影到唔少靚相𠻹！
洪陵樹木園(홍릉수목원)
- 地址：서울 동대문구 회기로 57
- 前往方法：高麗大站（고려대역）3號出口
「洪陵樹木園」位於高麗大學同慶熙大學中間，得weekend先會開放，係當地人最鍾意去散步嘅地方，幾乎唔會有遊客，秋天更加會開滿紅葉超壯觀！
正讀圖書館(정독도서관)
- 地址：서울 종로구 북촌로5길 48
- 前往方法：安國站（안국역）1號出口
「正讀圖書館」係另一個首爾必去賞櫻景點，自從喺《換乘戀愛》出現過之後就變得更加受歡迎，推薦大家春天嘅時候去影相，可能仲會俾你發現到幾個隱藏打卡位！
梨泰院解放村(해방촌)
- 地址：서울 용산구 용산동2가
- 前往方法：綠莎坪站（녹사평역）2號出口
位於梨泰院附近嘅「解放村」 其實係韓國近代史嘅縮影，韓戰後避難嘅人聚集後喺呢度形成咗一個巨大村落，而近幾年透過首爾市嘅都市規劃後，唔少餐廳Cafe都陸續喺度開鋪，重生成為一個超有氣氛嘅景點，係呢排最多韓國後生仔女會去玩嘅地方。
恩平韓屋村(은평한옥마을)
- 地址：서울 은평구 진관동 193-14
- 前往方法：舊把撥站（구파발역）
唔想去北村韓屋村同人逼，推薦大家去位於首爾近郊嘅「恩平韓屋村」！呢度每間韓屋結構同建築都唔一樣，每一間都有自己獨有特色，打卡一流！
南山谷韓屋村(남산골 한옥마을)
- 地址：서울 중구 퇴계로34길 28
- 開放時間：09:00-21:00（逢星期一休息）
- 前往方法：忠武路站（충무로역）4號出口
大家知唔知原來明洞附近就有一條咁古色古香嘅韓屋村呢？「南山谷韓屋村」就好似一個被時間遺忘嘅空間咁，大家可以欣賞到幾百年前嘅韓式傳統建築，而且比起周邊更加安靜，推薦大家嚟散步影相！
兒童大公園(어린이대공원)
- 地址：서울 광진구 능동로 216
- 開放時間：05:00-22:00
- 前往方法：兒童大公園站（어린이대공원역）1號出口
建大附近嘅兒童大公園站隔離有一個非常大型嘅綠色空間，入面仲有動物園同遊樂設施，氣氛夠悠閒，比想像中好玩！
狎鷗亭羅德奧/島山公園(압구정로데오/도산공원)
- 前往方法：狎鷗亭羅德奧站（압구정로데오역）
以前好多人嚟韓國都一定會去新沙洞林蔭大道一帶玩，不過小編個人就比較推薦大家去狎鷗亭羅德奧同島山公園一帶，有唔少潮牌都有喺呢度開分店，更加有好多韓星都會親自去嘅餐廳、Cafe同髮型屋，另外想享受夜生活都不妨可以嚟呢度！
以上呢幾個景點唔知大家有去過邊幾個呢？歡迎留言同小編分享，亦都要記住save低篇blog，下次去齊呢幾個地方啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com