韓國旅遊常見Q&A

Hello，大家好，我哋係由韓國人每日提供最新韓國旅行資訊嘅Creatrip。

相信大家時隔3年再飛嚟韓國，可能會有啲地方唔明或者唔記得，或者唔知點做好。今次小編整理咗一個經常會有人喺嚟韓國之前問嘅問題，希望可以幫到大家啦！

韓國旅遊常見Q&A

1. 夜晚10點到仁川機場，仲有冇地鐵可以搭？

有時可能諗住收完工，即刻夜晚飛，不過有時太遲先到，係唔係都會擔心有冇地鐵坐呢？最遲只要喺23:32到機場鐵路月台，就一定可以趕上尾班車。

*23:50有多班車由仁川T2出發，但尾站係數碼科技城，唔會去弘大、首爾。

落機、入境、拎行李大概需要一個鐘左右，如果唔會延誤，22:00到韓國，都應該仲會有地鐵，但如果22:30之後到就未必趕到。

如果你之前已經有先辦理自動通關，入境會快好多（不過而家有時有啲人得/有啲唔得）。

至於仁川機場地鐵首班車會喺05:18開出，而首爾站往仁川機場首班車會喺05:20開出。

2. 可唔可以帶自己風筒/直髮夾去韓國？

香港同韓國電壓都係一樣220V，所以基本上大家只要帶轉插器就可以用。

3. 好晏先會到首爾，到時會唔會換唔到錢？

首爾匯率最好嘅找換店一定係明洞大使館、一品香，呢兩間營業時間通常會去到20:00至21:00（每日都會有啲變動），如果你係19:00先到仁川機場，要去換基本上係趕唔切，建議大家可以先喺機場換定少少，或者如果大家住宿係喺明洞/弘大附近，可以搵Money Box，佢係一部24小時無人換錢機，就算好遲先到，都唔怕冇錢用！

「Money Box」詳細介紹

4. 如果買機票唔小心將姓同名調轉咗點算？

通常（以航空公司為準）LAST NAME係姓氏，FIRST NAME係名；或者FAMILY NAME係姓、GIVEN NAME係名，大家請注意順序。

大細楷都冇咩影響，不過大多數訂票網站都會直接預設大楷，同時唔會俾你輸入空格。

如果只係姓氏同名調轉咗，「通常」改都係唔使錢（建議直接打去問），但如果係打錯字，就有可能會收費。

5. 諗住行超市，點知佢休息？

香港超市好少會休息，不過喺韓國，政府就有定韓國超市每個月都一定要有休息日。

通常超市休息日會係每個月第二同第四個星期日，我哋每個月都會有更新，有需要去嘅朋友，都可以參考一吓。

韓國超市/百貨公司休息日

6. 到底可唔可以帶公仔麵返香港？

不過唔同海關做法都唔一樣，如果大家唔肯定帶唔帶到，返香港時直接去海關申報就最安全。

7. 韓國大眾交通可唔可以食嘢？

首爾巴士係禁止飲食，只要司機見到大家手拎住飲品同食物，都已經會禁止上車，除非係有袋袋住，或者係保溫杯先得。地鐵、火車雖然冇限制範圍，但建議大家都唔好食啲重口味嘅嘢，以免打擾到其他乘客。

機場巴士原則上冇限制（仁川出發），但建議都係唔好帶食物上車會比較好。

仁川機場巴士攻略

8. 找換店可唔可以用其他外幣換？細金額又換唔換得？

目前韓國最普遍係可以用美金、日元、人民幣、台幣、港幣、星幣等換韓幣，相對比較冷門嘅澳幣、泰銖、英鎊、歐元就未必間間可以換到。

至於面額細嘅紙幣，基本上係可以換，但有啲鋪頭未必會收，同時匯率亦有可能會有少少唔一樣。

韓國換錢總整理

9. 係唔係一定要買交通卡？邊一種最好？

交通卡唔係強制要買，不過買咗一定會好方便好多，因為平時搭一次都要準備散紙，但有咗呢張卡就唔使煩，仲可以享有轉乘優惠。

Cashbee同T-Money喺首爾、釜山、仁川、大邱用係通行無阻，搭巴士、的士、地鐵都用得，但要注意Cashbee喺大田用唔到。

韓國交通卡總整理

10. 可唔可以自己一個去韓國餐廳食飯？

可能大家成日聽到韓國好多餐廳都要叫2人份起，所以大家都會擔心自己一個飛韓國，未必有啖好食，不過大家又唔需要太擔心，除咗一啲打邊爐嘅鋪頭同燒肉店之外，大家都可以自己一個人去食。

11. 韓國好多Cafe都唔俾小朋友去？

KOL打卡Cafe、天台Cafe、動物Cafe等可能會禁止小童入場，因為怕可能會打擾到其他人，如果家長要帶小朋友去，可能要留意清楚，鋪頭出面/入面有冇寫到「NO KIDS ZONE」，如果有標明嘅話就真係唔入得。

韓國「NO XX ZONE」現象

12. 觀光客係唔係好易俾人呃？

觀光景點物價通常都會比較高，有啲鋪頭可能仲會俾唔同Menu俾韓國人同外國人，甚至係份量都唔同，建議大家去之前可以先比吓價，同時入去講幾句韓文，等職員覺得唔係咁易蝦。

呢次小編整理咗唔少人嚟韓國都會問嘅問題，如果大家仲有好奇嘅部分，或者有嘢想知，歡迎留言話俾我哋知，我哋會盡量解答大家：）

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購