弘大住宿總整理
一次過整理曬弘大最受歡迎住宿俾你睇！下次嚟韓國旅行唔使煩惱住邊好！
Hello，大家好，我哋係由韓國人每日提供最新韓國旅行資訊嘅Creatrip。
幾乎所有外國人嚟韓國玩，都會嚟弘大呢個交通方便又多嘢行/玩嘅聖地。Book一間位於弘大嘅住宿，就唔使買到成手都係嘢之後仲要山長水遠返酒店！今日小編就幫大家整理咗2022弘大推薦住宿清單，快啲一齊睇落去啦！
弘大住宿總整理
1. 首爾弘大美居大使酒店
- 地址：서울 마포구 양화로 144
- 價錢：₩100,000起/晚
- 小Tips：弘大入口站（홍대입구역）9號出口行3分鐘
「首爾弘大美居大使酒店」係一間位於弘大入口站9號出口徒步3分鐘距離嘅4星級酒店，超近地鐵站，就算攞住好多行李都唔使擔心！
而且呢度設施齊全，可以住得開心之餘，所有職員亦都識講英文，唔需要怕溝通唔到。
環境非常乾淨企理，而且乾濕分離，衛生得嚟又方便！行街行到攰都好快可以返到呢個溫暖小窩休息，充滿電再繼續玩！
2. 首爾弘大樂天L7酒店
- 地址：서울 마포구 양화로 141
- 價錢：₩90,000起/晚
- 小Tips：弘大入口站（홍대입구역）9號出口行5分鐘
「首爾弘大樂天L7酒店」係一間4星級酒店，好多韓國人都會嚟呢度Staycation！呢間酒店位於弘大主街同延南洞之間，行去地鐵站都只需要5分鐘，非常適合鍾意弘大嘅朋友。呢度最出名嘅就係位於天台嘅露天泳池，夜晚嚟可以影到超多靚相！
除此之外，相信有啲朋友旅行嘅時候鍾意留喺酒店玩，「首爾弘大樂天L7酒店」入面仲有一個叫「L7 Floating」嘅餐廳&酒吧，可以俯瞰到弘大全景，夜晚嚟真係超靚超浪漫。
呢間酒店新起好冇耐，所以所有設施都非常新淨，而且大部分房間都有塊落地玻璃可以睇到弘大街頭風景。呢度環境靚，地理位置又方便，準備嚟韓國玩嘅朋友們可以考慮吓住「首爾弘大樂天L7酒店」！
3. RYSE Hotel
- 地址：서울 마포구 양화로 130
- 價錢：₩200,000起/晚
- 小Tips：弘大入口站（홍대입구역）9號出口行5分鐘
「RYSE Hotel」位於弘大入口站9號出口附近，只要行5分鐘就到，交通非常方便。大家睇到個價錢可能會嫌佢有少少貴，不過呢間4星級酒店真係超豪華，口碑亦都非常好。
呢度最特別嘅就係有一個可以俯瞰弘大嘅天台，無論係同家人朋友，定係同另一半一齊嚟，都可以喺度享受到浪漫時光。
酒店同弘大主街好近，而且設施更加有5星級水準，相信大家一定可以住得舒服，玩得開心！
4. 首爾弘大智選假日酒店（Holiday Inn Express Seoul Hongdae）
- 地址：서울 마포구 양화로 188
- 價錢：₩90,000起/晚
- 小Tips：弘大入口站（홍대입구역）4號出口行3分鐘
喺弘大出口站4號出口行出嚟向後行會見到一間叫「AK&」嘅商場，而「Holiday Inn Express Seoul Hongdae」就係位於呢個商場嘅上蓋！
酒店設施非常新淨，而且因為酒店係起喺商場上蓋，所以非常高，可以俯瞰到弘大嘅熱鬧街頭，景色唔錯。
由濟州航空營運嘅「Holiday Inn Express Seoul Hongdae」入面仲有一個以飛機為主題嘅體驗區，事先預約嘅話可以體驗模擬揸飛機，相信會係一個特別又難忘嘅經驗！
5. Amanti Hotel Seoul
- 地址：서울 마포구 월드컵북로 31
- 價錢：₩90,000起/晚
- 小Tips：弘大入口站（홍대입구역）1號出口行10分鐘
比起上面介紹嘅住宿，「Amanti Hotel Seoul」相對嚟講距離地鐵站比較遠，不過裝修靚，設施齊全，有好多韓國人會選擇喺呢度搞婚禮，亦都有唔少人係為咗呢個夏天先會開放嘅室外游泳池而嚟！
酒店房裝修簡約，仲可以離遠望到弘大夜景！
雖然要行10分鐘先到地鐵站，不過正正就係因為咁，呢度嘅優點係附近唔會咁嘈，瞓教都瞓得舒服同安樂！
以上就係小編為大家整理嘅弘大推薦住宿，下次嚟韓國玩想住弘大，不妨參考吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
