2022首爾圖書館打卡點整理
朴寶劍新戲就喺呢度拍！首爾6間圖書館打卡點整理，扮文青、影靚相必備書牆都喺曬度
Hello，大家好，我哋係由韓國人每日提供最新韓國旅行資訊嘅Creatrip。
大家有冇發覺唔少韓劇有時都鍾意用圖書館做景點呢？今日小編想同大家介紹6間首爾圖書館打卡景俾大家參考。其中一間仲要早排朴寶劍去過取景，大家又有冇心郁郁想跟住去呢？
首爾圖書館打卡點整理
1. COEX 星空圖書館
- 地址：서울 강남구 영동대로 513 B1
- 營業時間：每日 10:30 - 22:00
- 地點：首爾地鐵2號線三成站（삼성역）5號、6號出口 COEX入面
由三成站行去COEX地下一樓一直行，就可以見到首爾第一個興起嘅圖書館打卡景點「星空圖書館」。如果係熱門時段去嘅話，基本上會太多人好難影到相，所以建議大家可以揀喺平日啱啱開門（10點半）嘅時候去。
雖然星空圖書館唔算好大，但大家都可以喺唔同位到打卡。唔少韓劇亦都曾經喺呢度取過景，之前《青春紀錄》朴寶劍都嚟呢度拍攝過幾場戲㗎！
2. Book Park 書牆天井
- 地址：서울 용산구 이태원로 294
- 營業時間：11:00 - 22:00、逢星期一休息
- 地點：首爾地鐵6號線漢江鎮站（한강진역）2號出口隔離
因為韓劇《芝加哥打字機》而多咗人留意嘅「Book Park」。呢度最吸引人嘅就係高達三層樓以上嘅天井，好靚好壯觀，小編建議大家可以朝早嘅時候去感受日光，陽光直射喺擺放整齊嘅書牆上面，邊個角度影都可以好靚。
呢度好闊落，俾人一種好舒服嘅感覺。
呢度每一層樓都好似去咗唔同世界咁，彷彿同《芝加哥打字機》嘅劇情有啲相似。
3. 首爾書寶庫
- 地址：서울 송파구 신천동 14
- 交通：首爾地鐵2號線蠶室渡口站（잠실나루역）1號出口步行2分鐘
- 時間：平日11:00 - 20:00、週末及公眾假期10:00 - 20:00（逢星期一、1月1號、新年及中秋休息）
因為IU同呂珍九出演嘅《德魯納酒店》而爆紅，原本以為只係個電腦特效做出嘅效果，但原來事實上係真實存在，而且氣氛、質感都係好難用文字表達出嚟。
小編去嘅時候真係好靜，大家都好認真咁嚟搵書同睇書，所以大家嚟到盡量可能都要講得細聲啲，唔好打擾到其他人。
呢度真係好靚，話唔定大家都可以喺度影到人生照。
4. 坡州 智慧之林
- 地址：경기도 파주시 회동길 145
- 營業時間：平日10:00 - 18:00、週末及公眾假期10:00 - 20:00
比較冷門，但亦都係好多韓國人都鐘意嘅圖書館「智慧之林」，瀰漫住濃郁嘅書卷味。溫暖嘅木質色，將成個圖書館好似打造成一個電影場面咁。呢度唔單止係一間圖書館，同時亦係一間Cafe，就算平時唔太點睇書嘅人，只要一嚟到呢度睇書嘅慾望都會上升，增添咗一啲文青知性嘅氣息。
當年《金秘書為何那樣》亦都有喺坡州嘅智慧之林取景，大家係唔係即刻又多咗一個韓劇打卡嘅行程呢？去坡州除咗會去Outlet之外，大家都快啲安排去呢到打卡啦！
5. 新村 Arc.N.Book
- 地址：서울 서대문구 연세로 13 12F
- 營業時間：10:30 - 22:00
- 交通：首爾地鐵2號線新村站（신촌역）
唔知大家對呢個新景點有咩睇法呢？雖然比起星空圖書館、Book Park等等嚟講，規模比較細但氣氛好好，而且同乙支路分店嘅感覺比起嚟，新村嘅顏色更加溫暖。2019年年底先開幕，日後應該會變成打卡新景點。
超大嘅書牆，而且呢度俾人一種好舒適嘅感覺。
6. 書的博物館
- 地址：서울 송파대로 37길 77
- 時間：10:00 - 18:00；（逢星前一、元旦、春節、中秋休息）
首爾松坡區「書的博物館」，係喺新建社區同傳統市場中間，交通非常方便。一入到去就會見到覺得呢到好大，全部都係樓梯同埋座位嘅結合而成。
呢到周不時會舉辦演講、發表活動等，所以慢慢變到更出名。
中間嘅呢個地方佈滿咗裝飾嘅假書同埋紙張之外，將成個空間營造到好夢幻嘅二次元同埋童話感。大家仲可以喺度影相同埋享受俾書本圍繞嘅感覺添！
以上就係小編整理出6間首爾地區必去嘅圖書館打卡景點，唔知大家又有冇邊間最想去呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk