韓國粗口整理
「C八」最粗俗？「泡菜女」係咩意思？學外語嘅樂趣就喺呢度！韓文粗口總整理
Hello，大家好，我哋係由韓國人每日提供最新韓國旅行資訊嘅Creatrip。
最快學一個語言，除咗基本問候、多謝之外，就一定唔少得粗口，廣東話粗口有特色又多元化，大家都知啦～
其實韓國嘅粗口都有好多，大家又知唔知呢啲粗口係咩意思同幾粗俗呢？小編就整理咗日常生活入面常見嘅韓國粗口，但要留意，唔口隨便講啊！
韓國粗口：1. 개ㅇㅇ
呢個係韓國最基本嘅粗口。
개即係狗，但如果擺喺其他字前面，就會令嗰個字降級，對其他人講就會非常冇禮貌。
不過，有啲時候都會喺某些形容詞前面加개，表示程度上面嘅「非常」，例如개 웃겨，就等於「勁好笑」呢種感覺，係唔太正式嘅用法。
개새끼（gae-sae-kki）
呢句係最基本嘅粗口。
小編要講下，새끼本身唔帶貶義，有「新生兒/BB」嘅意思，好多韓劇入面都會見到男女主角互叫對方做새끼（sae-kki），或者係父母對仔女咁講。
不過只要喺새끼前面加字，就會變成唔係咁好嘅用法，如果單純表示新生嘅狗仔、貓仔，就要倒轉用새끼 개、새끼 고양이。
개씨발（gae-ssi-bal）
講到씨발（ssi-bal），相信大家都一定唔陌生，呢句係韓國最基本、亦係最粗俗嘅一個粗口（同問候啊媽Level一樣）。韓國電視只要出現呢句，就一定會消音。
「Si…」，或者「Ah-Si」都係씨발嘅前面發音，大家可能都幾常聽到。
呢句粗口比上面介紹嘅개새끼（gae-sae-kki）粗俗超多！
韓國粗口：2. ㅇㅇ충
충（chung）喺韓文意思係「蟲」咁解，會用呢類粗口就代表鬧嗰個人同條蟲一樣，可以話係超冇禮貌嘅粗口。
급식충（geub-sig-chung）
呢個粗口係近期先有，급식即係學校會提供嘅午餐，暗指中小學生、小朋友。
成句意思就係鬧人仲好似小朋友咁唔經大腦。
틀딱충（teul-ttag-chung）
完整意思係틀니（假牙）딱딱충，係對嗰啲明明已經到咗一定年紀，但就仲係有啲唔恰當諗法嘅老人講嘅粗口。
喺敬老尊賢嘅韓國，呢一句係超級冇禮貌而且會引起公憤嘅粗口嚟。
일베충（il-be-chung）
對於政治光譜極右派嘅人，韓國人會用일베貶低佢哋。
한남충（han-nam-chung）
呢句係한국（韓國）남자（男人）충（蟲）嘅縮寫，係貶低韓國男人嘅話，千祈唔好喺韓國亂講呢個字啊！
基本上충（chung）同啱啱嘅개（gae）用法有啲似，喺單字後面加충，就會變成粗口。
雖然충（chung）喺韓文入面，仲有忠武路嘅「忠」，或者衷、充嘅用法，但韓國人改名嗰陣，絕對唔會將충放喺結尾。
韓國粗口：3. 김치녀（gim-chi-nyeo）
김치係泡菜，而녀係女性嘅意思，泡菜女喺韓文入面係非常貶低女性嘅粗口。
泡菜作為韓國嘅代表性食物，將佢加上녀，就係諷刺緊嗰啲只係諗住男性嘅財產，妄想嫁入豪門嘅韓國女性。
另外韓國仲有一個講法叫「大醬女（된장녀）」都有類似嘅意思，喺韓國千祈唔好亂講啊！
韓國粗口：4. 닥쳐（dag-chyeo）
簡單嚟講，就係「收聲」嘅意思，係超冇禮貌嘅用詞。
不過如果係好friend都可以講笑咁講，唔熟嘅話就真係唔好亂講啦！
SBS
另一個大家可能好熟悉嘅꺼져（kkeo-jyeo）（走開），喺韓劇入面可能會見到，主角鬧完交，好惡咁講出呢句，但有時候非常親嘅朋友或者愛人之間，都會講笑咁用呢句。
韓國粗口：5. ㅇㅇ놈/년
對男生用놈（nom），對女生用년（nyeon），都係好粗俗，字本身嘅意思就唔係太正經（놈直譯就係傢伙）。
如果係好親嘅朋友，講下笑就還好，但對唔熟嘅朋友或者陌生人講呢個字就非常失禮。
미친놈/년（mi-chin-nom/nyeon）
미치다喺韓文入面有「痴線」嘅意思，雖然成日聽到有人用「好食到癲」、「嘈到癲」呢啲用法，但都係唔太正經。
當然，加上놈（nom）或者년（nyeon），就有種喺度鬧你「呢個人痴咗線」、「癲女人」嘅意思。
놈（nom）只係用於男性，同啱啱提到嘅單字一樣，呢個字絕對唔會有人用嚟改名。
년（nyeon）喺韓文字入面仲有「年」嘅意思，會有人用呢個字改名（小編有識第三個字係년嘅韓國人……）。
不過最近就越嚟越少，大家基本上都會避免將呢啲字放喺名入面。
韓國粗口：6. 병신（byeong-sin）
병신又係一個超粗俗嘅粗口，有啲類似於中文嘅白痴、智障、殘廢，如果同上面其他粗口一齊用，真係超嚴重。
降一級嘅粗口係등신（deong-sin），有「蠢材」嘅意思，但完全冇可愛嘅感覺，係超真心認為對方好蠢先會用呢個字；如果想可愛啲，都會用바보（ba-bo）。
韓國粗口：7. 변태（byeon-tae）
聽發音就知呢句其實係「變態」咁解，不過喺韓文意思入面有「病態」嘅貶意。
不過，有時候呢個字會變成調情嘅說話。
韓國粗口：8. 씨발（ssi-bal）
終於嚟到韓國粗口，最經典嘅「C八」啦！
呢個係韓國最粗嘅粗口，唔理係咩單字，只要加呢句就會變成粗口，亦係外國人最熟悉嘅粗口。
씨발（ssi-bal）鬧對方係從事用身體賺錢嘅職業。
如果加埋啱啱介紹嘅놈（nom）/년（nyeon），就會變得非常粗俗，鬧對方係「做X」。
網路上好多人會直接打成ㅅㅂ。
喺同韓國人變成好好好朋友之前，呢類粗口千祈唔好唔小心脫口而出啊！
其實同博大精深嘅廣東話粗口比，韓國粗口好似唔太粗俗。不過睇番兩哋嘅文化差異處，平時用慣敬語、半語嘅韓國人，對於髒話嘅界定其實就係「打破對你嘅尊敬」嚟區分。
佢哋唔似廣東話咁，一個動詞己經千變萬化。
大家認識韓國新朋友嗰陣，千祈唔好唔小心講粗口啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk