韓國泡菜（辛奇）文化
韓國泡菜到底有幾多種口味？冬甩泡菜、士多啤梨泡菜，青印提子泡菜你敢唔敢食呢？
Hello，大家好，我哋係由韓國人每日提供最新韓國旅行資訊嘅Creatrip。
人人都知最能代表韓國嘅食物就係「泡菜」（辛奇），佢係流傳已久嘅傳統韓食，由醃製蔬菜而嚟。韓國每個地方會見到最基本嘅泡菜，就係用大白菜整成嘅泡菜，亦因為咁，好多人都認為泡菜就等於白菜泡菜⋯⋯其實唔係，根據唔同材料，可以整成好多種類嘅泡菜㗎！小編今日要介紹除咗一般白菜醃製成嘅辣泡菜之外，仲有啲特別嘅泡菜口味，唔知道大家又食過邊幾種呢？
韓國泡菜文化
今日，我哋要同大家介紹下韓國人到底有幾鍾意食泡菜，同埋一啲你冇諗過嘅韓國泡菜口味。
1. 白菜泡菜（배추 김치）
白菜泡菜係最常見嘅泡菜，基本上喺韓國每間餐廳、每個屋企，都一定會見到呢一款泡菜。白菜用辣椒、辣椒醬醃製，放一段時間脫水之後，食落就會更爽脆。小編可以同大家保證，絕對冇韓國人一生人未食過泡菜。
韓國人甚至仲會將佢加麻油炒，好多時加飯一齊煮就會變成泡菜炒飯。
2. 白泡菜（백 김치）
白泡菜顧名思義，就係白色嘅泡菜，同一般嘅紅色泡菜唔同。佢喺醃製嘅過程入面，冇用到辣椒，係一種唔辣嘅泡菜，食落偏酸。
3. 水蘿蔔泡菜（동 치미）
水蘿蔔泡菜大家可能會有啲陌生，佢都係一款唔辣，泡製喺鹽水、水分多嘅泡菜。「동（Dong）」代表冬天嘅意思，通常韓國人都會喺冬天食呢款泡菜㗎！
4. 蘿蔔泡菜（총각 김치）
蘿蔔泡菜都係好出名嘅泡菜款式。不過佢同一般切段嘅醃蘿蔔唔同⋯⋯呢款泡菜會用成根蘿蔔醃製，有啲人會叫佢做「單身漢泡菜」。
5. 醃蘿蔔（깍두기）
呢款係喺餐廳、韓國人屋企好常見到嘅泡菜種類。通常食有湯嘅料理個陣，就會配呢款切段嘅蘿蔔一齊食。
6. 青瓜泡菜（오이소박이）
顧名思義呢款泡菜主要係用青瓜整，比較特別嘅係醃製過程中除咗辣椒醬，仲會加入海鮮醬，通常會喺春天或者夏天嘅時候食呢款泡菜。
7. 蘿蔔葉泡菜（열무김치）
呢款泡菜有人會叫佢做蘿蔔泡菜，不過特別之處部分，係用咗蘿蔔葉嘅部分去做。
8. 青瓜辣椒泡菜（오이 고추 김치）
守美的飯饌小菜
喺韓綜《守美的飯饌小菜》第59集出現過嘅呢個青瓜辣椒泡菜，含有豐富維他命C、維他命A同多種礦物質，有效排毒，可以預防好多病菌。
之前朴敏英仲有整過青瓜辣椒泡菜俾劉在錫、李昇基、EXO 世勳、Jessica同世正，佢哋食完之後都讚不絕口！
奇怪口味泡菜
응답하라 1994
除咗上述常見嘅泡菜之外，其實仲有好幾百種奇怪嘅泡菜⋯⋯點解呢？因為韓國人熱愛呢種醃製品嘅程度係：佢哋會用唔同食物，醃製成獨一無二嘅泡菜。唔信？小編帶你睇下韓國人有幾瘋狂啦！
1. 芒果泡菜（망고 김치）
芒果最好揀啲冇咁熟嘅，咁樣熱嘅時候就唔會變得軟腍腍，芒果嘅甜味整出嚟嘅泡菜比預期好食，大家之後有機會都可以試吓。
2. 士多啤梨泡菜（딸기 김치）
士多啤梨有豐富嘅維他命C，可以防止生雀斑同皺紋，如果想眼睛好，同時增強免疫力可以試吓士多啤梨水泡菜，切1/3嘅士多啤梨，加芹菜、辣椒、同蔥一齊攪勻，剩低2/3嘅士多啤梨可以溝水整成調味料，咁就大功告成㗎啦！
3. 水蜜桃泡菜（복숭아 김치）
水蜜桃多數都係夏天先會食嘅水果，揀嘅時候特別要揀啲硬身啲，食嘅時候會有甜味。
4. 西蘭花泡菜（브로콜리 김치）
之前Big Mama李慧瓊就有喺節目介紹過可以徹底戰勝高血壓、高血脂同高血糖嘅西蘭花泡菜，將西蘭花切成一粒粒，再加辣椒粉、梅汁、薑汁、洋蔥、蘿蔔、韭菜等調味料撈埋一齊就食得！
5. 西瓜泡菜（수박 김치）
將西瓜切成正方形，然後加白菜、西瓜、紅辣椒、青瓜、芹菜、韭菜同薑汁，再落紅辣椒汁同西瓜汁，用海鹽調味。不過提提大家千祈唔好落太多西瓜汁，如果唔係就會太甜，食泡菜嘅時候就唔會覺得爽！
6. 朱古力泡菜（초콜릿 김치）
係咪冇諗過泡菜竟然可以用朱古力整成？如果覺得普通泡菜太辣，可以試吓由朱古力開始，甜甜地，就好似食緊朱古力餅乾咁。
7. 提子泡菜（포도 김치）
用提子做泡菜最好嘅就係佢唔會好快變酸，反而甜甜地食落唔會覺得膩。
8. 柑橘泡菜（귤 김치）
只要一到冬天，就會令人諗起要食柑橘，不過實際上，喺濟州島唔少人都會用柑橘整泡菜，做法相當簡單，將柑橘同鹽同泡菜本身需要嘅材料一齊撈勻就完成！
9. 石榴泡菜（석류 김치）
石榴係一種好健康嘅水果，對於男女老少都可以防止衰老，不過整嘅時候需要好多時間同精力，因為要將石榴粒同石榴汁加落泡菜水入面，等佢熟成2日，再冷藏一星期左右。
10. 蘆薈泡菜（알로에 김치）
蘆薈本身有助於增強免疫力，腸胃健康同促進血液循環，因為蘆薈超多水份，比起其他泡菜食落嘅時候會更加濕潤。
11. 青印提子泡菜（샤인머스캣 김치）
係咪冇諗過青印提子都可以整成泡菜呢？食落甜甜地又辣辣地，幾過癮！
12. 芫荽泡菜（고수 김치）
雖然芫荽有人鍾意有人唔鍾意，不過其實佢超有益，可以降低膽固醇，對於成日手腳冰冷嘅人超有用處，如果大家怕食芫荽好苦，可以先將去浸兩三日再整泡菜。
13. 菠蘿泡菜（파인애플 김치）
菠蘿除咗同肉夾之外，同泡菜都意外地好食！甜甜地而且好爽。
14. 蘆筍泡菜（아스파라거스 김치）
蘆筍被譽為蔬菜之王，有助緩解疲勞，對血管都幾唔錯，將蘆筍底部切開一半，用鹽醃一個鐘左右，之後同泡菜調味料撈勻，咁就食得㗎啦！
15. 茄子泡菜（가지 김치）
唔講唔知其實韓國好多都會將茄子同調味料一齊撈勻食，喺整泡菜之前，茄子要先用油煎，唔需要煎太熟已經好好味！
16. 番薯泡菜（고구마 깍두기）
番薯有助於提高免疫力，聽講佢仲係一種抗癌菜，如果用佢整泡菜，甚至仲可以有助排毒。
17. 奇異果泡菜（키위 김치）
奇異果好處相當之多，可以幫助大家易消化同排毒。韓國人好多時煮肉嘅時候都會將奇異果磨成汁，甚至仲會將佢哋切成片整泡菜。
18. 大蒜泡菜（마늘 김치）
大家都知韓國人好鍾意食大蒜。
所以佢哋都會用大蒜整成泡菜，不過比起用一粒粒，佢哋會用成個去整，大家又敢唔敢去試呢？
唔知之後韓國人又會諗到咩新口味嘅泡菜呢？如果以上小編冇提到，歡迎留言話俾我哋知仲有邊幾款！如果大家以為上圖嘅右邊係泡菜，咁可能你會中咗泡菜嘅毒，因為其實佢只係一款麵包！
特別泡菜組合
當然韓國人唔單止用各式各樣食物整泡菜，仲會喺食各種食物嗰陣，放埋泡菜一齊食！俾大家睇下一啲令人驚訝嘅泡菜搭配料理啦！
1. 芝士蛋糕配泡菜
自從韓國名廚이연복（李連福）喺節目同大家講，食芝士蛋糕配泡菜，會好好食之後，就有好多人試。試過呢種組合嘅人都話，泡菜可以消除芝士蛋糕嘅甜膩感。小編就覺得食甜嘢，再食泡菜好似有啲怪。XD
2. 冬甩配泡菜
呢個組合好少見，通常只有老人家食甜品先會咁樣搭配。因為佢哋覺得冬甩實在太甜，要中和一下。
3. 蕃薯配泡菜
呢種組合就正常啲，而且有唔少人會咁吃。因為佢哋覺得單食蕃薯太乾，食泡菜可以中和口感。
4. 香蕉配泡菜
原本大家以為食香蕉配泡菜只係講笑，但自從有幾個Youtuber試過之後，好似慢慢多人會咁食。呢個組合食落去會先有辣味，再食到甜味，聽食過嘅人講，食食下其實都唔錯。
5. 炸雞配泡菜
唔知由幾時開始，炸雞同泡菜呢個組合好似習以為常，好多人都會咁食，而上圖更加係泡菜味炸雞。
以上係小編介紹嘅韓國泡菜文化，包括各種泡菜種類，同埋韓國人熱愛泡菜嘅奇異程度，大家有興趣都可以試下呢啲新食法㗎！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
